ការគេងចាំបាច់ណាស់សម្រាប់សុខភាពរបស់យើង ដោយវាជួយឲ្យភ្នែក និងខួរក្បាលយើងសម្រាក និងជួយបង្កើនថាមពលក្នុងខ្លួនឡើងវិញ។ គ្នាយើងភាគច្រើនក៏បានដឹងដែរថា គេមិនគ្រប់គ្រាន់ប៉ះពាល់ដល់សុខភាព ហើយបើមានទម្លាប់ចូលគេងមិនទៀងទាត់ទៀត វាពាក់ព័ន្ធនឹងជំងឺ ៣ មុខ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការសិក្សារបស់អាមេរិករកឃើញថា អ្នកទម្លាប់ចូលគេងមិនទៀងទាត់ប្រឈមការវិវត្តកើតជំងឺធាត់ ជំងឺលើសឈាម និងជំងឺទឹកនោមផ្អែម។ ការសិក្សានេះអ្នកស្រាវជ្រាវ ផ្ដោតលើបម្រែបម្រួលការគេងពីមួយថ្ងៃទៅមួយថ្ងៃ ខុសពីការសិក្សាមុនៗ ដែលផ្ដោតលើការគេងមិនគ្រប់គ្រាន់។ ការសិក្សានេះ ធ្វើឡើងដោយអ្នកស្រាវជ្រាវមកពីមន្ទីរពេទ្យស្ត្រី Brigham និងសាលាវេជ្ជសាស្ត្រ Harvard នៅក្រុង Boston របស់អាមេរិក។
អ្នកស្រាវជ្រាវមានអ្នកជំងឺ ២.០០៣ នាក់ នៅមជ្ឈមណ្ឌលជំងឺទឹកនោមផ្អែម ហើយបានសិក្សា និងវាយតម្លៃលើការគេងរបស់ពួកគេរយៈពេល ១ សប្ដាហ៍។ ជាមធ្យមអ្នកជំងឺ គេង ៧ ម៉ោង ១៥ នាទី/យប់ និងចូលគេងនៅម៉ោង ១១:៤០ នាទី។ ប៉ុន្ដែ ២/៣ នៃអ្នកជំងឺ មានបម្រែបម្រួលរយៈពេលគេង ជាង ១ ម៉ោង ហើយ ៤៥% នៃអ្នកជំងឺនេះមានបម្រែបម្រួលពេលចូលគេង ជាង ១ ម៉ោងផងដែរ។
លទ្ធផលរកឃើញថា អ្នកជំងឺ ៧០៧ នាក់ ឬ ៣៥% មានរោគសញ្ញាមេតាប៉ូលិស ឬមេតាប៉ូលិសខុសប្រក្រតីច្រើនប្រភេទ ដែលបង្កើនហានិភ័យនៃជំងឺបេះដូង រួមទាំងបង្កើនសម្ពាធឈាម ជាតិស្ករខ្ពស់ក្នុងឈាម និងជម្រុញឲ្យមានខ្លាញ់ជុំវិញចង្កេះ។
អ្នកជំនាញថា មូលហេតុដែលបម្រែម្រួលការគេង ប៉ះពាល់សុខភាពមេតាប៉ូលិស ប្រហែលពាក់ព័ន្ធនឹងម៉ោងជីវសាស្ត្រ ដែលជាយន្ដការខាងក្នុងសារពាង្គកាយ គ្រប់គ្រងលើបម្រែបម្រួលមេតាប៉ូលិស។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet