ម៉ាឡេស៊ី៖ សត្វឆ្កែ Husky ដ៏គួរឲ្យស្រលាញ់មួយក្បាល ត្រូវបានជួយសង្គ្រោះជីវិតជាថ្មី ក្រោយត្រូវម្ចាស់បោះបង់ចោលក្នុងផ្ទះជួល អស់ពេលជាច្រើនខែ និងត្រូវបានគេសង្ស័យថា វាអាចរស់បានដោយសារតែស៊ីលាមកខ្លួនឯងធ្វើជាអាហារ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សបើយោងតាមប្រភពសារព័ត៌មានបានឲ្យដឹងថា សត្វឆ្កែ Husky មួយក្បាលនេះ ត្រូវបានម្ចាស់របស់វាទុកចោលនៅក្នុងផ្ទះជួលមួយកន្លែង (ឬអាផាតមិនជួល) ក្នុងរដ្ឋ Johor ប្រទេសម៉ាឡេស៊ី អស់រយៈពេលប្រមាណជា២ខែមកហើយ ប៉ុន្តែជាសំណាងល្អ ដែលត្រូវបានម្ចាស់ផ្ទះប្រទះឃើញកាលពីថ្ងៃទី១ សីហា កន្លងទៅនេះ។
វាត្រូវបានគេសង្ស័យថា ទំនងជាស៊ីលាមកខ្លួនឯងដើម្បីរស់ជីវិត។ ព្រោះជាក់ស្ដែង ម្ចាស់ផ្ទះជួលនោះពិតជាមានការភ្ញាក់ផ្អើលយ៉ាងខ្លាំង នៅពេលដែលបើកទ្វារចូលទៅពិនិត្យមើលក្នុងផ្ទះជួលរបស់ខ្លួន ក៏ស្រាប់តែប្រទះឃើញឆ្កែ Husky នេះ ស្ថិតក្នុងសភាពស្គមស្គាំង ថ្ងូររកជំនួយ យ៉ាងគួរឲ្យអាណិត និងមានទាំងលាមក នោម និងរបស់របររាយប៉ាយក្នុងផ្ទះ ដែលត្រូវបានម្ចាស់របស់វាទុកចោល ក្រោយចេញពីទីនោះ។
យ៉ាងណាមិញ ក្រោយបានឃើញសភាពបែបនេះ ម្ចាស់ផ្ទះជួលខាងលើ ក៏បានទូរស័ព្ទសួរនាំស្រ្តីដែលជាម្ចាស់ឆ្កែ Husky នេះ ដែលធ្លាប់ជួលផ្ទះរបស់ខ្លួនស្នាក់នៅពីមុននោះផងដែរ។
ស្រ្តីជាម្ចាស់ឆ្កែនោះបែរជាបាននិយាយអះអាងថា ខ្លួនមិនបានទុកឆ្កែរបស់ខ្លួនចោលដោយអត់អ្វីឲ្យវាស៊ីនោះទេ។ ព្រោះថាខ្លួនតែងតែព្យាយាមទៅដាក់ចំណីឲ្យវាស៊ីនៅរៀងរាល់៣ថ្ងៃម្តង។ ហើយមុន៣ថ្ងៃ ដែលម្ចាស់ផ្ទះជួលចុះមកមើលផ្ទះនោះ ខ្លួនក៏បានពឹងឲ្យមិត្តភក្តិឲ្យមកដាក់ចំណីឲ្យឆ្កែស៊ីដែរ ប៉ុន្តែគ្រាន់តែថា មិនបានបោសសម្អាតលាមករបស់វាចេញ។
ស្រ្តីជាម្ចាស់ឆ្កែក៏បានប្រកែកមិនទទួលយកចំពោះពាក្យសម្ដីចោទប្រកាន់ ពីសំណាក់ម្ចាស់ផ្ទះជួល ថាខ្លួនទុកឆ្កែខ្លួនឯងចោល និងបង្អត់អាហារវាស៊ីនោះឡើយ។
ប្រភពដដែលបន្តថា បើទោះបីជាយ៉ាងណា ម្ចាស់ផ្ទះជួលក៏បានសម្រេចចិត្តយកឆ្កែ Husky នេះទៅជួបគ្រូពេទ្យសត្វដើម្បីជួយពិនិត្យសុខភាពវាផងដែរ។ គ្រូពេទ្យសត្វនិយាយថា ឆ្កែ Husky នេះ ស្គមស្គាំង នៅសល់ទម្ងន់ត្រឹមតែ ១២គីឡូក្រាមប៉ុណ្ណោះ ដោយសារតែ វាកង្វះអាហារូបត្ថម្ភ ឬនិយាយឲ្យស្រួលស្តាប់ អត់អាហារគ្រប់គ្រាន់ដើម្បីស៊ី និងបានបង្កឲ្យមានអាការស្លេកស្លាំង។
មិនថាយ៉ាងណា ចុងក្រោយ ម្ចាស់ផ្ទះជួលក៏បានសម្រេចចិត្តថា នឹងយកឆ្កែ Husky នេះ ទៅចិញ្ចឹមវិញ និងថែមទាំងបានប្តូរឈ្មោះឲ្យវា ពី Chou Chou មកជា Qiang Qiang ដែលមានន័យថា «Strong» ឬ «ខ្លាំង» ផងដែរ។
គួរឲ្យដឹងផងដែរថា ជុំវិញនឹងករណីនេះ ក៏មានបណ្តាអ្នកលេងបណ្តាញសង្គមជាច្រើន បានសម្ដែងការរិះគន់ ចំពោះទង្វើមិនគប្បីរបស់ម្ចាស់ឆ្កែ Husky និងបានសរសើរដល់ម្ចាស់ផ្ទះជួល ដែលមានចិត្តសណ្តោសប្រណីទទួលយកវាទៅចិញ្ចឹមវិញផងដែរ៕
តើសម្រាប់ប្រិយមិត្តវិញយល់យ៉ាងណាដែរ?
ទស្សនាវីដេអូខាងក្រោម៖