រាជធានីភ្នំពេញ ៖ គូស្នេហ៍មួយគូបានដឹកដៃគ្នាចូលទៅរួមមេត្រីនៅក្នុងផ្ទះសំណាក់មួយកន្លែង ប៉ុន្តែពេលទៅដល់មិនទាន់វាចាប់ផ្ដើមបើកប្រតិបត្តិការនៅឡើយរវល់តែឆ្លៀតបឺតបង្ហុយថ្នាំញៀនយ៉ាងឆ្ងាញ់មាត់មុនសិន។ ស្រាប់តែកម្លាំងនគរបាលចូលទៅទាន់ក៏បានចាប់ខ្លួនទាំង២នាក់ ដោយដកហូតបាន ថ្នាំញៀន១កញ្ចប់ ព្រមទាំងដបសម្រាប់សេពថ្នាំញៀន១ទៀតផងដែរ បន្ទាប់មកក៏បាននាំទៅធ្វើការ សាកសួរ នៅប៉ុស្តិ៍ដើម្បីកសាងសំណុំរឿងចាត់ការតាមផ្លូវច្បាប់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សហេតុការណ៍នោះបានកើតឡើង កាលពីវេលាម៉ោង២រសៀល ថ្ងៃទី៥ ខែសីហា ឆ្នាំ២០១៩ នៅក្នុងបន្ទប់ផ្ទះសំណាក់យីហោ «សំបូរពេជ្រ» ដែលមានទីតាំងស្ថិតនៅក្នុងភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។ គូស្នហ៍១គូនោះខាងប្រុសឈ្មោះ លឹម សំអាង អាយុ២៤ឆ្នាំ រស់នៅក្នុងភូមិច្រប ឃុំព្រះនិព្វាន ស្រុកគងពិសី ខេត្តកំពង់ស្ពឺ ចំណែកខាងស្រីឈ្មោះ ព្រឹម ស្រីមុំ ហៅស្រីស អាយុ២៥ឆ្នាំ ស្នាក់នៅក្នុងភូមិព្រៃទា សង្កាត់ចោមចៅ៣ និងមានស្រុកកំណើតនៅក្នុងស្រុកដងទង់ ខេត្តកំពត។
នគរបាលបានឲ្យដឹងថា នៅមុនពេលកើតហេតុគូស្នេហ៍វ័យក្មេង១គូនេះបាននាំគ្នាចូលទៅកាន់ ផ្ទះសំណាក់ខាងលើ ដើម្បីរួមមេត្រីជាមួយគ្នា ដោយខាងប្រុសបាននាំយកថ្នាំញៀនទៅជាមួយផង លុះពេលទៅដល់មិនគិតរួមមេត្រីសិនទេ បែរជាសេពគ្រឿងញៀនយ៉ាងឆ្ងាញ់មាត់ទៅវិញ។ ខណៈនោះដោយមានការសហការណ៍ល្អជាមួយម្ចាស់ផ្ទះសំណាក់ ជុំវិញករណីខាងលើ ទើបកម្លាំងនគរបាលប៉ុស្តិ៍កាកាប១ ក្រោមការបញ្ជាពីសំណាក់លោកវរសេនីយ៍ឯក យឹម សារ៉ាន់ អធិការនគរបាលខណ្ឌពោធិ៍សែនជ័យ បានចុះទៅធ្វើការឆែកត្រួតពិនិត្យ ក៏រកឃើញថ្នាំញៀន១កញ្ចប់ ដបសម្រាប់ជក់ថ្នាំ១ ទើបចាប់ខ្លួនទាំង២នាក់តែម្ដង។
ក្រោយពេលចាប់ខ្លួនបាន នគរបាលបាននាំ គូស្នេហ៍ទាំង២នាក់នេះរួមជាមួយវត្ថុតាង នាំទៅសាកសួរនៅប៉ុស្តិ៍កាកាប១ ដើម្បីសាកសួរ និងកសាងសំណុំរឿង បញ្ជូនទៅផ្នែកព្រហ្មទណ្ឌនគរបាលខណ្ឌពោធិ៍សែនជ័យ ដើម្បីបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់៕
ប្រភព៖ កោះសន្តិភាព