ទីបំផុត! ក្រោយចំណាយពេល ១៧ឆ្នាំនៅទឹកដីអឺរ៉ុប Dani Alves ត្រឡប់ទៅលេងឲ្យក្លិបធំមួយនៅប្រេស៊ីលវិញ

ប្រេស៊ីល៖ កំពូលខ្សែការពារស្ដាំរបស់ក្រុមជម្រើសជាតិប្រេស៊ីល កីឡាករ Dani Alves បានត្រឡប់ទៅប្រកបអាជីពលើទឹកដីកំណើតវិញ នៅក្លិប Sao Paulo ជាមួយកិច្ចសន្យារយៈពេល ៣ឆ្នាំ កាលពីយប់ថ្ងៃព្រហស្បតិ៍ម្សិលមិញ។

Alves បានប្រកាសចាកចេញដោយមិនមានតម្លៃខ្លួនពីក្លិបអ្នកមាននៅបារាំង Paris Saint-Germain ក្នុងទីផ្សារដោះដូរកីឡាកររដូវក្ដៅនេះ ហើយក៏មានក្លិបធំៗពីរនៅអង់គ្លេសចង់បានរូបគេទៅរួមក្លិបផងដែរគឺ កាំភ្លើងធំ Arsenal និងមេឃខៀវ Manchester City។

Alves បានត្រឡប់ទៅលេងនៅប្រទេសប្រេស៊ីលវិញក្នុងអាជីពបាល់ទាត់ ក្រោយចាកចេញពីក្លិប Bahia ទៅចូលរួមជាមួយក្លិបអេស្ប៉ាញ Sevilla ក្នុងឆ្នាំ ២០០២។ គេបានចំណាយរយៈពេល ៦ឆ្នាំជាមួយ Sevilla មុននឹងទៅចូលរួមជាមួយអ្នកមានបុណ្យ Barcelona ក្នុងឆ្នាំ ២០០៨។

រយៈពេល ៨រដូវកាលជាមួយក្លិបមានមូលដ្ឋាននៅតំបន់កាតាឡាន់ Barcelona ខ្សែការពារជម្រើសជាតិប្រេស៊ីលរូបនេះ ចូលលេងបាន ២៤៧ប្រកួត និងឈ្នះពានបានរហូតដល់ ២២ ជាមួយក្លិបមួយនោះ។

មិនត្រឹមតែប៉ុណ្ណោះ Alves ក៏ធ្លាប់បានឈ្នះពាន Serie A ជាមួយ Juventus ផងដែរ មុននឹងទៅចូលរួមជាមួយ PSG និងឈ្នះពាន Ligue1 នៅទីនោះ។ ហើយនាពេលថ្មីៗនេះ ប្រធានក្រុមជម្រើសជាតិប្រេស៊ីលរូបនេះ ក៏ទើបតែនឹងជួយក្រុមជម្រើសជាតិរបស់ខ្លួន គ្រងតំណែងម្ចាស់ជើងឯកពានរង្វាន់ Copa America 2019 ផងដែរ៕

ប្រភព៖ Daily Mail