អង់គ្លេស៖ ក្លិបបាល់ទាត់មាន់ខ្នាយមាស Tottenham Hotpsur មានសង្ឃឹមច្រើនក្នុងការទិញយកខ្សែបម្រើម្នាក់ពី Real Betis គឺកីឡាករ Giovani Lo Celso ជាមួយតម្លៃខ្លួន ៤៥លានផោន។
ក្លិបដែលកំពុងប្រកបអាជីពនៅក្របខណ្ឌ La Liga, Real Betis ធ្លាប់បានដាក់តម្លៃខ្លួនសម្រាប់ ខ្សែបម្រើ ជម្រើសជាតិអាហ្សង់ទីនរូបនេះ ៦០លានផោន ប៉ុន្តែពួកគេអាចនឹងយល់ព្រមទទួលសំណើដែលមាន តម្លៃទាបជាងនេះ ក្រោយការទិញបាន Nabil Fekir ពី Lyon ក្នុងតម្លៃខ្លួន ២២.៦លានផោន។
កីឡាករ Lo Celso ធ្លាប់បាននិយាយថារូបគេចង់ចូលរួមជាមួយក្លិបមានមូលដ្ឋាន នៅទីក្រុងឡុងដ៍ Tottenham Hotspur បើទោះបីជាបានទទួលការចាប់អារម្មណ៍ពីសំណាក់ក្លិបបិសាចក្រហម Manchester United ក្ដី។
កីឡាករវ័យ ២៣ឆ្នាំរូបនេះត្រូវបាន Betis ខ្ចីជើងពីក្លិបអ្នកមាននៅបារាំង Paris Saint-Germain កាលពីរដូវកាលមុន ដោយអាចរកគ្រាប់បាល់បាន ១៥ គ្រាប់ក្នុងនាមជាខ្សែបម្រើ មុននឹងត្រូវ Real Betis ទិញផ្ដាច់ពី PSG ជាមួយតម្លៃខ្លួន ២០លានផោន។
បើសិនជាការផ្ទេរ Lo Celso កើតឡើងមែននោះ ក្លិប PSG នឹងទទួលបានប្រាក់ ២០% ពីការផ្ទេរ ដែលនេះជាអ្វីដែលបានចុះក្នុងកិច្ចសន្យា ខណៈក្លិបនៅអាហ្សង់ទីន ដែលលក់ Le Celso ឲ្យ PSG ក្នុងតម្លៃ ៨.៥លានផោន កាលពីឆ្នាំ ២០១៦ ក៏នឹងទទួលបានប្រាក់ ៣% ពីការផ្ទេរផងដែរ។
សូមបញ្ជាក់ផងដែរថា រដូវកាលនេះ Spurs ហាក់ចំណាយលុយច្រើនប្លែកក្នុងការទិញកីឡាករ ដោយក្លិបជើងឯករង Champions League មួយនេះទើបតែចំណាយប្រាក់ ៦៥លានផោន ដើម្បីបំបែកឯតទគ្គកម្មក្លិប ក្នុងការទិញយកខ្សែបម្រើជម្រើសជាតិបារាំង Tanguy Ndombele៕
ប្រភព៖ The Sun
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]