ខេត្តកំពង់ស្ពឺ៖ វត្តព្រះពុទ្ឋត្រ័យរ័ត្នសាមគ្គីរំលេចដោយព្រះពុទ្ធរូបធំស្កឹមស្កៃ បានដាក់ឲ្យប្រើប្រាស់ជាផ្លូវការហើយកាលពីព្រឹកថ្ងៃទី១៦ កក្កដា ឆ្នាំ២០១៩ ។ វត្តនេះស្ថិតនៅភូមិទី៦ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ សម្ពោធក្រោមវត្តមានលោកខៀវ កាញារីទ្ឋ រដ្ឋមន្ត្រីក្រសួងព័ត៌មាន និងលោកជំទាវ ។
លោកខៀវ កាញារីទ្ឋ បានថ្លែងនាពិធីកាត់ខ្សែបូសម្ពោធឲ្យប្រើប្រាស់នោះថា«វត្តអារាមនៅតំបន់ពេជ្រនិលមួយនេះពិតជាស្រស់សោភាប្រកបដោយធម្មជាតិពណ៌បៃតង ។ រំពឹងថាភ្លៀវទេសចរមិនមើលរំលង ឬជិះហួសនោះទេ »។
ពិធីករលោកសុខ សំណាង ដែលបានចូលរួមកសាងនៅវត្តនោះបានលើកឡើងថា«គោលបំណងបង្កើតឡើងចង់ឲ្យមានវត្តមានព្រះបដិមានៅទីលានខាងក្រៅព្រះវិហារដើម្បីឲ្យពុទ្ឋបរិស័ទចូលដល់បរិវេណវត្តគោរពប្រតិបត្តិដោយចង់ឲ្យប្លែក គឺមិនថាព្រះក្នុងព្រះវិហារ ឬនៅខាងក្រៅអាចគោរពបានទាំងអស់គ្នា ។
ដូចនេះរំពឹងថាទីតាំងដែលមានពុទ្ឋបដិមានៅទីលានខាងក្រៅ ពិតជាទទួលបានការទាក់ទាញខ្លាំងលើផ្នែកទេសចរណ៍បែបពុទ្ឋសាសនា ។ ទីអារាមនេះពិតជាកន្លែងដ៏ស្រស់សោភាបែបធម្មជាតិព្រោះមានដងភ្នំខៀវស្រងាត់នៅអែបសងខាងពិតជាធ្វើឲ្យអ្នកមកធ្វើបុណ្យមានអារម្មណ៍ស្រស់ស្រាយរំភើបជាមិនខាន »។
សប្បុរសជន និងគ្រូព្រះចៅអធិការវត្ត រួមគ្នាកសាងព្រះពុទ្ធបដិមា មានដូចតទៅ ៖ 1-ព្រះពុទ្ធបដិមា ទ្រង់ប្រទានអភ័យ ពណ៌សំរឹទ្ធិ កម្ពស់៤,២ និងបល្ល័ង្ក អស់ប្រាក់ចំនួន ៨០០០ដុល្លារ កសាងដោយព្រះវិជ្ជារង្សី ឈឹម សំអាត គង់នៅសហរដ្ឋអាមេរិក និងព្រះចៅ អធិការវត្ត ។ 2-ព្រះពុទ្ធបដិមា ទ្រង់រំពឹង ពណ៌សំរឹទ្ធិ មានកម្ពស់ ៤,២ និងបល្ល័ង្ក អស់ប្រាក់ចំនួន ៨០០០ដុល្លារ កសាងដោយលោកនួន សុខ និងលោកជំទាវ ។
3-ព្រះពុទ្ធបដិមា ចូលបរិនិព្វាន មានបណ្តោយ៦ម៉ែត្រ អស់ប្រាក់ចំនួន១៧៥០ដុល្លារ កសាងដោយប្រាក់លោកតាំង កក់ និងក្រុមញាតិមិត្តរបស់លោក ដោយឡែកបល្ល័ង្កព្រះបរិនិពាន្វ កសាងប្រាក់វត្តអស់ចំនួន៣៨៥០ដុល្លារ ។
4- ព្រះពុទ្ធបដិមា និងនាងសុជាតា និងខឿន កសាងដោយលោកអ៊ូ ទូច និងលោកជំទាវអន សុផាន់នី លោកសុខ សារី និងអ្នកស្រី ផាន់ ស្រីទូច និងវេជ្ជបណ្ឌិតណក់ ពេជ្រពិជ័យ អស់ថវិកាចំនួន៦៧៤៥ដុល្លារ ។
នៅក្នុងពិធីនោះលោកខៀវ កាញារីទ្ធ និងលោកជំទាវទេព រស្ស៊ី បានប្រគេនបច្ច័យកសាង ដល់វត្តព្រះពុទ្ធត្រ័យរ័ត្នសាមគ្គី ចំនួន១០លាន រៀល ហើយជាមួយនេះលោកបានអញ្ជើញចូលបច្ច័យ សរុប៧ លាន៣សែន ៨ ម៉ឺនរៀល និង៣០០ដុល្លារ ។ ជាមួយគ្នានេះដែរបណ្តាសប្បុរសជន និងបណ្តាក្រុមហ៊ុនឯកជន ចំនួន៤បានចូលរួមជាបច្ច័យ កសាង ចំនួន៣ ពាន់១រយដុល្លារ និង១លានរៀល ដល់វត្តព្រះពុទ្ធត្រ័យរ័ត្នសាមគ្គី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]