ចិន៖ ក្មេងស្រីអាយុ ៩ឆ្នាំម្នាក់ រស់នៅក្នុងប្រទេសចិន ត្រូវបានរកឃើញថា នាងមានដុំសក់ប្រមាណ ១៨សង់ទីម៉ែត្រនៅក្នុងពោះវៀន ខណៈពេលនាងមានអាការក្អួតចង្អោរនិងពុំសូវចង់ហូបបាយ។
ដំបូងឡើយ ឪពុកម្តាយនាងគិតថា កូនស្រីគ្រាន់តែមានបញ្ហាធម្មតាប៉ុណ្ណោះ។ ដូច្នេះ ពួកគេក៏បាននាំកូនស្រីទៅឱ្យគ្រូពេទ្យពិនិត្យ។ ឆ្លងកាត់ការស្កេន CT រួច គ្រូពេទ្យបានរកឃើញថា កូនស្រីម្នាក់នេះ មានដុំសក់ជាង ១៨សង់ទីម៉ែត្រនៅក្នុងពោះវៀន បណ្តាលឱ្យគ្រូពេទ្យ និងឪពុកម្តាយនាងមានការភ្ញាក់ផ្អើលជាខ្លាំង។
យោងតាមប្រភពបានឱ្យដឹងថាក្មេងស្រីម្នាក់នេះរស់នៅក្នុងទីក្រុងហាប៊ីន ខេត្តហីឡុងជាំង ប្រទេសចិន។ នាងគឺជាក្មេងស្រីម្នាក់ដែលមានរូបរាងស្គមតាំងតែពីតូចមកម្ល៉េះ ព្រោះតែនាងរមែងហូបអាហារតែបន្តិចបន្តួចតែប៉ុណ្ណោះ។
ប៉ុន្តែ នាងជាក្មេងស្រីម្នាក់ដែលរីករាយនិងមានអត្តចរិតល្អ ដូច្នេះឪពុកម្តាយនាងពុំដែលរកឃើញអ្វីប្លែកចំពោះកូនស្រីនោះទេ។
យ៉ាងណាមិញ កាលពីនាងមានអាយុ៨ឆ្នាំ ម្តាយនាងធ្លាប់ឃើញកូនស្រីហូបសក់ខ្លួនឯងម្តង ប៉ុន្តែមិនដែលបានឃើញទៀតទេ។
លុះដល់ថ្មីៗនេះ ទើបកូនស្រីធ្លាក់ខ្លួនឈឺ ទើបគាត់សង្កេតឃើញថា សក់របស់កូនស្រីចាប់ផ្តើមទំពែកតិចៗ ហើយក៏សង្ស័យថានាងបានហូបសក់ខ្លួនឯងហើយ។
ក្រោយមក ម្តាយនាងក៏ចាប់ផ្តើមសួរនាំនាង ចុងក្រោយនាងបានសារភាពថា នាងបានហូបសក់ខ្លួនឯងតាំងពីនៅក្មេងមកម្ល៉េះ។
ដោយឡែក គ្រូពេទ្យបានរកឃើញថា នាងអាចនឹងមានជំងឺ Pica ដែលជំងឺនេះគឺជាជំងឺប្លែកម្យ៉ាង ដែលនឹងឃ្លានហូបតែរបស់ណាដែលគ្មានជីវជាតិប៉ុណ្ណោះ។ ដូច្នេះបានជានាងហូបសក់ខ្លួនឯងបែបនេះ។
យ៉ាងណាមិញ ឆ្លងកាត់ការវះកាត់ចំនួន២ដង គ្រូពេទ្យអាចយកសក់ចេញបានតែពាក់កណ្តាលតែប៉ុណ្ណោះ។
ម្យ៉ាងវិញទៀត គ្រូពេទ្យបានរកឃើញថា នាងមានដំបៅពណ៌សនៅជញ្ជាំងក្រពះរបស់នាងជាច្រើន។ បច្ចុប្បន្ន នាងត្រូវសម្រាកព្យាបាលនៅក្នុងមន្ទីរពេទ្យមួយរយៈទៀត ដើម្បីទទួលការវះកាត់ជាលើកទី៣៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]