កូនតូចរាក ធ្វើឲ្យបាត់បង់ជាតិទឹក ខ្វះនូវសារធាតុចិញ្ចឹម តម្រូវឲ្យម៉ាក់ប៉ាយកចិត្តទុកដាក់ចំពោះរបបអាហារ ទាំងអាហារដែលជួយបំពេញជាតិទឹក និងអាហារដែលរឹតតែធ្វើឲ្យបាត់បង់ជាតិទឹកថែមទៀត។ តើអាហារណាខ្លះគួរឲ្យកូនញ៉ាំ និងមិនគួរឲ្យកូនញ៉ាំ ពេលរាករូស?
បើតាមកូនសៀវភៅដែលចងក្រងដោយមន្ទីរពេទ្យកុមារជាតិ បានបែងចែករបបអាហារសម្រាប់ក្មេងរាក ទៅតាមអាយុ ចាប់ពីពេលកើត រហូតដល់អាយុ ៦ ខែ ពីអាយុ ៦ ខែ ដល់ ២៣ ខែ និងក្មេងចាប់ពីអាយុ ២៤ ខែឡើងទៅ។
១- អាយុ ០ – ៦ ខែ
– ត្រូវបំបៅដោះកូនញឹកញាប់ជាងធម្មតា
– ឲ្យកូនញ៉ាំទឹកអូរ៉ាលីត (ORS) បើចាំបាច់។
២- អាយុ ៦ – ២៣ ខែ
– បន្តបំបៅដោះកូនធម្មតា
– ឲ្យកូនញ៉ាំទឹកឲ្យបានច្រើន
– ឲ្យកូនញ៉ាំបបរខាប់គ្រប់គ្រឿង
– ឲ្យកូនញ៉ាំអាហាររឹង បាយ ឬនំប៉័ង (បើកូនធំអាចញ៉ាំបាយបាន)។
៣- ចាប់ពីអាយុ ២៤ ខែឡើង
ចំពោះកុមារដែលមានអាយុចាប់ពី ២៤ ខែ ឡើងទៅរាករូស ម៉ាក់ប៉ាត្រូវឲ្យកូនញ៉ាំអាហារណាទន់ៗ ងាយរំលាយ ដូចជាបបរពងទាជាមួយល្ពៅ បបរត្រី ឬបន្ថែមអាហាររឹងដូចជា បាយ នំប៉័ង ឬមី ពិសេសត្រូវឲ្យកូនញ៉ាំទឹកឲ្យច្រើន។
អាហារមិនគួរឲ្យកូនញ៉ាំ៖
បើកូនរាករូស ម៉ាក់ប៉ាមិនត្រូវឲ្យញ៉ាំប្រភេទអាហារផ្អែមៗ អាហារត្រជាក់ អាហារហឹរ អាហារពិបាករំលាយ ព្រោះរឹតតែធ្វើក្មេងបាត់បង់ជាតិទឹក និងធ្វើឲ្យប៉ះពាល់ដល់ពោះវៀន។
– អាហារ ឬភេសជ្ជៈផ្អែមៗ៖ ទឹកដោះស្រស់ ឬទឹកដោះគោឆៅ ការ៉េម ភេសជ្ជៈកំប៉ុងត្រជាក់ៗ។
– អាហារហឹរ៖ អាហារមានជាតិហឹរគ្រប់ប្រភេទ មិនថាអាហារមានដាក់ម្ទេស ឬម្រេចនោះទេ។
– អាហារពិបាករំលាយ៖ អាហារខ្លាញ់ អាហារបំពង សាច់ជាប់ខ្លាញ់ អហារមានសរសៃច្រើន ដូចជាផ្សិត ទំពាំង ក្រអៅឈូក ឬសារ៉ាយសមុទ្រ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
