ខេត្តកំពង់ធំ ៖ បើតាមសេចក្តីរាយការណ៍បឋមបានឱ្យដឹងថា រថយន្តកូរ៉េមួយគ្រឿងបានលួចដឹកសត្វព្រៃប្រវឹកចំនួន១០៦៨ក្បាល ហើយត្រូវលោកព្រះរាជអាជ្ញាអមសាលាដំបូងខេត្តកំពង់ធំ និងផ្នែករដ្ឋបាលព្រៃឈើស្ទោ ស្ទាក់ចាប់បាននៅរសៀលថ្ងៃទី១៣ ខែកក្កដា ឆ្នាំ ២០១៩ ស្ថិតនៅតាមផ្លូវជាតិលេខ៦ ចេញពីខេត្តសៀមរាប ឆ្ពោះទៅរាជធានីភ្នំពេញ ។
បើតាមលោក ឈឿង គុណ នាយផ្នែកនៃរដ្ឋបាលព្រៃឈើស្ទោង បានឲ្យដឹងថា មុនពេលឈានដល់ការបង្ក្រាបរថយន្តដឹកសត្វព្រៃនេះ លោកបានទទួលព័ត៌មានពីបណ្តាញសម្ងាត់មកថា មានរថយន្តកូរ៉េមួយគ្រឿងចំណុះ១តោនកន្លះ ពាក់ស្លាកលេខ ភ្នំពេញ 2AJ.8329 ដែលប្រើប្រាស់ស្លាកសញ្ញារបស់ក្រុមហ៊ុនCP កំពុងតែធ្វើដំណើរតាមផ្លូវជាតិលេខ៦ បានលួចដឹកសត្វព្រៃ ចេញពីខេត្តសៀមរាប ឆ្ពោះទៅភ្នំពេញ ហើយឆ្លងកាត់ខេត្តកំពង់ធំ លោកក៏សុំបទបញ្ជាពីលោក អុិត សុធា ព្រះរាជអាជ្ញាអមសាលាដំបូងខេត្តកំពង់ធំ ដើម្បីស្ទាក់ចាប់រថយន្តនោះមកត្រួតពិនិត្យ ។
ប្រភពដដែលបន្តថា ក្រោយពីឃាត់រថយន្តត្រួតពិនិត្យ កម្លាំងរបស់យើងក៏ប្រទះឃើញមានកេសជ័រចំនួន៧៦កេស នៅក្នុងកេសទាំងអស់ដាក់សុទ្ធតែសត្វប្រវឹកព្រៃ ក៏នាំរថយន្ត និងឃាត់មនុស្ស៣នាក់មកកាន់ផ្នែករដ្ឋបាលព្រៃឈើស្ទោង ដោយមានឈ្មោះ ងួន សុភា អាយុ៣៨ឆ្នាំ រស់នៅភូមិព្រៃស រាជធានីភ្នំពេញ បានសារភាពថា រូបគេដឹកចេញពីខេត្តសៀមរាប ទៅភ្នំពេញជាមួយនឹងកម្មករ២នាក់ ៖
១-ឈ្មោះ ព្រេន និង ២-ឈ្មោះ នី រួមទាំងវត្ថុតាងទាំងអស់ត្រូវនាំមកផ្នែករដ្ឋបាលព្រៃឈើស្ទោង ដើម្បីធ្វើកំណត់ហេតុ និងរាប់ចំណែកសត្វប្រវឹកទាំងអស់ គឺមានចំនួន១០៦៨ក្បាល បន្ទាប់ពីសួរនាំរួច ម្ចាស់រថយន្តត្រូវបានកសាងសំណុំរឿងបញ្ជូនទៅតុលាការ។
ចំណែកសត្វប្រវឹកទាំងអស់ត្រូវលោកព្រះរាជអាជ្ញា អិត សុធា រួមទាំងមន្ត្រីផ្នែករដ្ឋបាលព្រៃឈើស្ទោង នាំយកទៅលែងឲ្យមានសេរីភាពវិញ ចូលក្នុងបឹងធម្មជាតិរមណីយដ្ឋានប្រិយប្រស់នៅរសៀលក្នុងថ្ងៃដដែលនោះផងដែរ។
ក្នុងនោះដែរលោកព្រះរាជអាជ្ញារមានប្រសាសន៍ថា លោកមានការសង្ស័យថា រថយន្តនេះអាចនឹងលួចប្រើប្រាស់ស្លាកសញ្ញារបស់ក្រុមហ៊ុន CP ក្លែងបន្លំដឹកបទល្មើសខុសច្បាប់ក៏មិនដឹង លោកនឹងឲ្យជំនាញបើកការស៊ើបអង្កេតឲ្យបានច្បាស់ រកម្ចាស់ពិតចាត់វិធានការតាមច្បាប់ ។ (កែសម្រួលដោយ ៖ បុប្ផា)
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]