ខេត្តស្វាយរៀង ៖ សេចក្តីរាយការណ៍បឋម មានចោរលួចគាស់សោបន្ទប់ក្រោមផ្ទះរបស់ប្រជាពលរដ្ឋលួចយកមាសអស់២តម្លឹង៨ជី៥ហ៊ុន ជញ្ជៀនផ្លាកទីន២ជី និងប្រាក់១,២៣៥ដុល្លារ ។ ករណីចោរលួចកាត់សោយកមាសប្រាក់នេះកើតឡើង កាលពីថ្ងៃទី១២ ខែកក្កដា ឆ្នាំ២០១៩នៅវេលាម៉ោង៧និង៤៥នាទីយប់ នៅភូមិខ្នុរ ឃុំរមាំងថ្កោល ស្រុកស្វាយទាប ។
សេចក្តីរាយការណ៍បន្តថា បើតាមលោកអនុសេនីយ៍ទោ នាងចាន់រតនាបុប្ផា នាយរងប៉ុស្តិ៍រដ្ឋបាលឃុំរមាំងថ្កោល បានឲ្យដឹងថា ប្រជាពលរដ្ឋរងគ្រោះឈ្មោះតូច ទាន ភេទប្រុស អាយុ៥៧ឆ្នាំ មានប្រពន្ធឈ្មោះមុំ រស់នៅភូមិខ្នុរឃុំរមាំងថ្កោល ត្រូវក្រុមចោរមិនស្គាល់អត្តសញ្ញាណបានចូលមកលួចគាស់យកទ្រព្យសម្បត្តិរបស់គាត់ ដែលទុកក្នុងបន្ទប់ខាងក្រោមផ្ទះអស់គ្មានសល់រួមមានប្រាក់ចំនួន១,២៣៥ដុល្លារ ខ្សែកមាស២ខ្សែ ទម្ងន់១តំឡឹង៧ជី៥ហ៊ុន ខ្សែដៃមាស២ខ្សែទម្ងន់៨ជី ចិញ្ចៀនមាស១វង់ ទម្ងន់៣ជី និងចិញ្ចៀនប្លាទីន២វង់ ទម្ងន់២ជី យកទៅបាត់ ហើយដាក់ការសង្ស័យថា ជាមនុស្សស្គាល់គ្នាធ្លាប់ចេញចូលផ្ទះរបស់ជនរងគ្រោះ ។
ប្រភពដដែលបន្តទៀតថា បើតាមការស្រាវជ្រាវ ជនរងគ្រោះដូចជា មិនច្បាស់ថា ចោរចូលលួចយកតាំងពីថ្ងៃណាទេ គឺកេសដាក់លុយកាក់ និងមាស គឺទុកក្នុងទូ ក្នុងបន្ទប់ក្រោមផ្ទះ ហើយចោរ គឺគាស់ទូរួចគាស់កេសយកលុយ និងមាសទៅបាត់ហើយ នៅយប់កើតហេតុជនរងគ្រោះទៅបើកទូទើបដឹងថា មានចោរគាស់កេសយកលុយ និងមាសខ្សែក ខ្សែដៃ និងជញ្ជៀនទៅបាត់ទើបឆោឡោ និងប្តឹងសមត្ថកិច្ចតែម្តង ។
ទោះបីជាយ៉ាងណា សមត្ថកិច្ចបានកោះហៅមនុស្សពីបីនាក់ ដែលធ្លាប់ចេញចូលក្នុងផ្ទះជនរងគ្រោះហើយមានទីលំនៅក្នុងភូមិកើតហេតុមកសាកសួរ លទ្ធផលយ៉ាងណាសមត្ថកិច្ច និងផ្តល់ព័ត៌មានពេលក្រោយ តែសមត្ថកិច្ចនិយាយថា វាដូចរាវរកម្ជុលនៅក្នុងបាតសមុទ្រអីញ្ចឹង៕ កែសម្រួលដោយ ៖ សុឃាក់
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]