សូមសរសើរ! លោកយាយចំណាស់ម្នាក់ ក្លាយជាតារាម៉ូដែលដ៏ល្បីក្នុងអាយុ ៧៧ឆ្នាំ (មានវីដេអូ)

កូរ៉េខាងត្បូង៖ ផ្ទុះការភ្ញាក់ផ្អើល ក្រោយលោកយាយអាយុ ៧៧ឆ្នាំម្នាក់ ក្លាយជាតារាម៉ូដែល ដែលមានវ័យចំណាស់បំផុតប្រចាំប្រទេសកូរ៉េខាងត្បូង។

យោងតាមប្រភពបានឱ្យដឹងថា លោកយាយម្នាក់នេះមានឈ្មោះ Choi Soon-Hwa អាយុ ៧៧ឆ្នាំ មុខរបរជាតារាម៉ូដែលដ៏ល្បីម្នាក់ក្នុងប្រទេសកូរ៉េខាងត្បូង។

កាលពីមុនលោកយាយ Choi ធ្វើការជាគិលានុបដ្ឋាយិកានៅក្នុងមន្ទីរពេទ្យមួយកន្លែង ក្នុងប្រទេសកូរ៉េខាងត្បូង ហើយលោកយាយបាននិយាយថា ការងារពីមុនរបស់លោកយាយ ត្រូវធ្វើការច្រើនម៉ោង សម្ពាធក៏ច្រើន មិនសូវរកប្រាក់ចំណូលបានច្រើនប៉ុន្មាននោះទេ។

នៅថ្ងៃមួយ ស្រាប់តែលោកយាយបានឃើញពាណិជ្ជកម្មទូរទស្សន៍មួយ ដែលគេផ្សាយអំពីតារាម៉ូដែលវ័យចំណាស់។

ដូច្នេះ លោកយាយក៏សាកល្បងដាក់ពាក្យ ហើយក៏បានចូលរួមវគ្គបណ្តុះបណ្តាលដើរម៉ូត។ ព្រោះតែលោកយាយមានទេពកោសល្យខ្ពស់ មិនយូរប៉ុន្មានលោកយាយក៏ត្រូវបានខាងភ្នាក់ងារ (Agency) ជ្រើសរើសយកលោកយាយសម្រាប់ការដើរម៉ូត។

អ្នកនាង Kim Hee-jin ដែលជាអ្នករចនាម៉ូតសំលៀកបំពាក់ដ៏ល្បីម្នាក់ បាននិយាយថា នាងជ្រើសរើសយកលោកយាយ Choi សម្រាប់ការដើរម៉ូត ព្រោះតែគាត់មានរូបរាងស្រស់ស្អាត និងខុសប្លែកពីគេ។

«លោកយាយ Choi គឺមានលក្ខណៈពិសេសខុសពីគេ។ គាត់មានគុណភាពខុសពីគេនៅក្នុងជំនាន់របស់គាត់ ហើយខ្ញុំគិតថាសំលៀកបំពាក់ដែលខ្ញុំច្នៃនោះ គឺពិតជាសាកសមសម្រាប់គាត់ខ្លាំងណាស់។»

ដោយឡែក កាលពីក្មេងលោកយាយ Choi ជួបប្រទះនូវរឿងលំបាកច្រើន ដោយត្រូវប្តីបោះបង់ចោល ហើយត្រូវចិញ្ចឹមកូនប្រុស-ស្រីពីរនាក់ថែមទៀត។

ពេលនេះ លោកយាយ Choi ទទួលបានប្រជាប្រិយភាពច្រើនគួរសម ហើយគាត់ក៏រកប្រាក់ចំណូលបានច្រើនផងដែរ។ ដូច្នេះគាត់បាននិយាយថា ដល់ពេលគាត់ត្រូវរីករាយនិងសប្បាយជាមួយជីវិតរបស់គាត់ហើយ៕

ទស្សនារូបភាពនិងវីដេអូខាងក្រោម៖

• ម៉ូត
• វីដេអូ