អូស្រ្តាលី៖ ដំណឹងនៃការចាកចេញរបស់កីឡាករជម្រើសជាតិបារាំង Paul Pogba ពីក្លិបបិសាចក្រហម Manchester United ហាក់មានលេចលឺច្រើនក្នុងអំឡុងទីផ្សារដោះដូរកីឡាកររដូវក្ដៅលើកនេះ ប៉ុន្តែលោក Ole Gunnar Solskjaer បាននិយាយថាមិនទាន់មានសំណើសុំទិញកីឡាកររូបនេះពីក្លិបណាមួយនៅឡើយទេ។
មិនត្រឹមតែកីឡាករ Paul Pogba តែម្នាក់នោះទេលោក Ole Gunnar Solskjaer បានឲ្យដឹងថាក្លិបដែលមានអ្នកគាំទ្រច្រើនមួយនេះ មិនទាន់ទទួលបានសំណើទិញកីឡាកររបស់ខ្លួនសូម្បីតែម្នាក់។ ខណៈដែលព័ត៌មានបានចុះផ្សាយជាច្រើនថា Pogba អាចនឹងទៅ Real Madrid ហើយ Lukaku អាចនឹងទៅលេងនៅទឹកដីអ៊ីតាលីជាមួយ Inter Milan។
ថ្លែងប្រាប់ក្នុងសន្និសីទសារព័ត៌មានពីប្រទេសអូស្រ្តាលីលោក Ole Gunnar Solskjaer បានមានប្រសាសន៍ថា “មានការនិយាយច្រើនជុំវិញកីឡាកររបស់យើង ទាំងការចាកចេញ និងការទិញចូល, សម្រាប់ខ្ញុំនេះគឺជារឿងធម្មតានោះទេ។ មានការលេចលឺជាច្រើនជុំវិញការចាកចេញរបស់ Pogba, Lukaku, Rashford និង Lingard ប៉ុន្តែគិតមកទល់ពេលនេះខាងយើងមិនទាន់ទទួលបានសំណើណាមួយនៅឡើយទេ។ Pogba និងកីឡាករជាច្រើនទៀតនៅសល់កុងត្រាច្រើនឆ្នាំជាមួយក្លិប។” លោកបានបន្តដោយសង្កត់ធ្ងន់ទៀតថា “ ពួកយើងគឺ Man United ពួកយើងមិនត្រូវការលក់កីឡាករនោះទេ”។
គួរបញ្ជាក់ផងដែរថា ពេលនេះក្លិបបិសាចក្រហម Manchester United កំពុងតែហ្វឹកហាត់ Pre-Season ត្រៀមរដូវកាលថ្មីក្នុងប្រទេសអូស្រ្តាលី និងត្រូវប្រកួតមិត្តភាពជាមួយក្រុមក្នុងលីគកំពូលអូស្រ្តាលី Perth Glory នៅថ្ងៃសៅរិ៍នេះ៕
ប្រភព៖ Fox Sports Asia
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
