(សៀមរាប)៖ កម្លាំងនគរបាលអន្តោប្រវេសន៍ប្រចាំនៅព្រលានយន្តហោះអន្តរជាតិខេត្តសៀមរាប បានឃាត់ខ្លួនជនជាតិកូរ៉េខាងត្បូង២នាក់ នៅថ្ងៃទី៧ ខែកក្កដា ឆ្នាំ២០១៩ ដោយរឹបអូសយកដុល្លារ បានជាង២លានដុល្លារ។

យោងតាមរបាយការណ៍សមត្ថកិច្ចបានបង្ហាញថា កាលពីម្សិលមិញ ជនជាតិកូរ៉ែខាងត្បូងដែលរងការចាប់ខ្លួននោះ បានធ្វើដំណើរតាមជើងហោះហើរលេខ UO-706 (HKG-REP) មកពីទីក្រុងហុងកុង ប្រទេសចិន។

ពេលមកដល់ព្រលានយន្តហោះ កម្លាំងប៉ុស្តិ៍នគរបាលអន្តោប្រវេសន៍ បានសហការជាមួយកម្លាំងការិយាលយ័គយ និងរដ្ឋាករប្រចាំអាកាសយានដ្ឋានអន្តរជាតិសៀមរាប ក៏ឃាត់ជនជាតិកូរ៉េខាងត្បូង ចំនួន០២នាក់ នោះតែម្តង។

ជនជាតិកូរ៉េខាងត្បូងទាំង២នាក់នោះរួមមាន៖

*ទី១៖ ឈ្មោះ YOON WONGI អាយុជាង៣០ឆ្នាំ

*ទី២៖ ឈ្មោះ SONG HYUNHOO អាយុជាង៤០ឆ្នាំ។

បុរសបរទេសទាំង២នាក់នេះ បាននាំចូលប្រាក់ដុល្លារខុសច្បាប់ ចំនួន ២,២០០,០០០$ នាំយកមកពីទីក្រុងហុងកុង ប្រទេសចិន។ ក្នុងនោះរួមមាន៖

*ក្រដាស់ប្រាក់ ១០០$ ចំនួន ២១,៩០០សន្លឹក

*ក្រដាស់ប្រាក់ ៥០$ ចំនួន ២០០សន្លឹក។

យោងតាមបញ្ជារបស់នាយឧត្តមសេនីយ៍ អគ្គនាយកអន្តោប្រវេសន៍ ជនជាតិកូរ៉េទាំង០២នាក់ខាងលើ ត្រូវបានប្រគល់ជូន ក្រុមប្រតិបត្តិការទី១ (សៀមរាប) នាយកដ្ឋានស៊ើបអង្កេត និងអនុវត្តនីតិវិធី ចំណែកឯប្រាក់ដុល្លារចំនួន ចំនួន ២,២០០,០០០$ រក្សាទុកបណ្តោះអាសន្ននៅការិយាល័យគយ និងរដ្ឋាករប្រចាំការក្នុងអាកាសយានដ្ឋានអន្តរជាតិសៀមរាប ដើម្បីបន្តនីតិវិធី៕

ប្រភព៖ freshnews

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]