ខេត្តប៉ៃលិន ៖ បុរសជាប្តីដែលលួចលាក់មកសំងំរស់ជាមួយប្រពន្ធចុងយ៉ាង សុខសាន្តអស់រយៈពេលជិត២ឆ្នាំ រហូតដល់នាងក្រោយមានផ្ទៃពោះជិត៣ខែ ត្រូវបានស្ត្រីជាប្រពន្ធដើមឈ្មោះសុន ប៊ុនណា អាយុប្រហែល៥១ឆ្នាំ មានទីលំនៅក្នុងភូមិវត្ត សង្កាត់ប៉ៃលិន ក្រុងប៉ៃលិនចូលទៅវាដល់ក្នុងផ្ទះទាំង ថ្ងៃត្រង់ រួមជាមួយប្តី ។
ជម្ងឺប្រចណ្ឌដល់កនេះ បណ្តាលឱ្យរងរបួសទាំង២នាក់ ដោយស្ត្រីជាប្រពន្ធចុងរងរបួសធ្ងន់បែកក្បាលផ្នែកខាងឆ្វេង និងរយះខ្នងដៃខាងស្តាំហូរឈាមដូចគេអារ.កមាន់ ត្រូវបានអ្នកជិតខាងដឹកយកទៅសង្គ្រោះនៅមន្ទីរពេទ្យបង្អែកខេត្ត ហើយប្តីវិញបានរងរបួសស្រាល ដោយត្រូវនឹងកូនសោបែកក្បាល និងចុងកាំបិតឆូតខ្នងរយះប្រវែងជិត១ ចំអាមមិនបានចូលពេទ្យទេ ។ ហេតុការណ៍នេះបានកើតឡើងនៅវេលាម៉ោង១២និង៣០នាទីថ្ងៃ ត្រង់នៅថ្ងៃទី ១៩ មីនា ២០១២ ក្នុងផ្ទះជួលឈ្មោះបឹងកាឡូ បន្ទប់លេខ៣ ភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។ បុរសជាប្តីដែលលួចមានប្រពន្ធចុងនេះឈ្មោះ ប៊ុន ឡុង អាយុ៥៤ឆ្នាំ។
សាក្សីបាននិយាយថា នៅមុនពេលកើតហេតុវេលាម៉ោង៩និង៣០នាទីព្រឹក គេឃើញបុរសជាប្តីបានជិះម៉ូតូមកបញ្ឈរទុកនៅមុខផ្ទះជួលដូចសព្វ មួយដង រួចក៏ចូលសំងំក្នុងផ្ទះ ។ ប្រហែលជាង១ម៉ោងក្រោយមកទៀត គេសង្កេតឃើញមានស្ត្រីចំណាស់ម្នាក់បានជិះម៉ូតូមួយ គ្រឿងឆ្វែលមើលផ្ទះជួលនេះ ដោយសម្លឹងមើលទៅម៉ូតូ និងផ្ទះជួលចុះឡើងៗ រួចក៏ជិះម៉ូតូត្រឡប់ទៅវិញ ។ សាក្សីបានបន្តទៀតថា លុះក្រោយមកបុរសជាប្តីបានជិះម៉ូតូចេញទៅបាត់ រហូតដល់ពេលអាហារថ្ងៃត្រង់ ក៏ឃើញត្រឡប់មកវិញ សម្រាកនៅរហូតដល់ពេលកើតហេតុវេលាម៉ោង ១២និង៣០នាទីថ្ងៃត្រង់ ទាំង២នាក់ប្តីនិងប្រពន្ធចុងបាននាំគ្នាសម្រាកនៅ ក្នុងផ្ទះដោយមិនបានចាក់សោ ឬខ្ទាស់គន្លឹះទេ ។ ស្រាប់តែស្ត្រីចំណាស់ដែលគេស្គាល់ថាជាប្រពន្ធដើមរបស់បុរសរូប នេះ បានមកដល់ដោយកាន់កូនសោសម្រាប់ដោះរថយន្ត និងកូនកាំបិតចិតបន្លែចុងស្រួចមួយ បានរុញទ្វារចូលទៅហើយក៏យកកូនសោវាយក្បាលប្តីបែកហូរឈាមកក្លាក់ និងគ្រវាត់ដៃដែលកាន់កូនកាំបិត ទៅមុតខ្នងប្តីរយះប្រហែល១ចំអាមដូចគេឆូត ។ ក្រោយមកទៀតស្ត្រីជាប្រពន្ធដើម ក៏បានចាក់ទៅលើប្រពន្ធចុងបណ្តាលឱ្យនាងត្រូវរបួសចំសៀតផ្កាខាង ឆ្វេងចំនួន២កាំបិត និងមុតត្រូវខ្នងដៃខាងស្តាំរងរបួស ២កន្លែង ។
ដោយសារតែការចាក់ប្រហារមិនបានដឹងមុននោះ ស្រ្តីជាប្រពន្ធចុង បាន រត់ចេញមកខាងក្រៅផ្ទះស្រែកឱ្យគេជួយ ទើបមានបុរសម្នាក់ឈ្មោះស សារឿន មកជួយដឹកជនរងគ្រោះជាប្រពន្ធចុង គេនោះយកទៅសង្គ្រោះនៅមន្ទីរពេទ្យ បង្អែកខេត្ត ។ ប្រភពបានបន្តទៀតថា បុរសលួចលាក់មានប្រពន្ធចុង មិនដែលបានមកដេកនៅជាមួយប្រពន្ធចុងជាប់លាប់នោះទេ គឺប្រហែលជា៤ទៅ៥ថ្ងៃមកម្តង ដោយមកជារបៀបលួចលាក់ ។ លុះដល់ថ្ងៃកើតហេតុ ប្រហែលជាប្រពន្ធដើមស៊ើបដឹងថា បុរសកំហូចរូបនេះ មានប្រពន្ធចុងលួចលាក់ នាំគ្នាស្នាក់នៅក្នុងផ្ទះជួល ទើបបានជាគាត់មានចិត្តក្តៅក្រហាយស្ទើរផ្ទុះបែកដើមទ្រូង គ្រាន់តែចុះពីម៉ូតូភ្លាម ក៏ស្ទុះទៅវាយ និងចាក់អ្នកទាំង២នាក់ ដោយមិននិយាយរកហេតុផលអ្វីទាំងអស់ ទើបធ្វើឱ្យប្តីនិងប្រពន្ធចុងរកតដៃមិនកើត ព្រោះពួកគេកំពុងសម្រាកភ្លេចខ្លួននៅក្នុងផ្ទះ ។
ប្រភពដដែលបានបន្តទៀតថា ស្ត្រីជាប្រពន្ធចុងមានកូនស្រីម្នាក់រួចទៅហើយជាមួយប្តីមុន មានអាយុប្រហែល១២ឆ្នាំ មុនពេលដែលបុរសរូបនេះយកនាងធ្វើជាប្រពន្ធចុង ។ ពេលនេះស្ត្រីជាប្រពន្ធចុងរូបនេះ មានផ្ទៃពោះប្រហែល៣ខែ ទៅហើយ ។ នៅយប់ថ្ងៃដដែលបុរសជាប្តីរបស់នាងបានទៅនាំយកមក សម្រាកនៅផ្ទះជួលវិញ ដដែល ។ លុះដល់ព្រឹកថ្ងៃ២០ មីនា ស្ត្រីជាប្រពន្ធចុងបានទៅស្នងការដ្ឋានទាំងខ្លួនឈឺចាប់មុខរបួស ដោយសុំឱ្យប៉ូលិសធ្វើអន្តរាគមន៍ជួយរូបនាង គឺនាងមិនបានប្តឹងប្តល់អ្វីដល់ប្រពន្ធដើមនោះទេ បើទោះជាគេវាយដំកាប់ចាក់មកលើខ្លួនយ៉ាងណាក៏ដោយ គឺនាងសុំត្រឹមតែបានប្តីរបស់ខ្លួននេះមក រស់នៅជាមួយវិញ ហើយសុំកុំឱ្យប្រពន្ធដើមមករករឿងវាយដំនាងប៉ុណ្ណោះ ។ នាងនិយាយថា នាងស្រឡាញ់ប្តីដូចជាប្រពន្ធដើមស្រឡាញ់ប្តីដែរ ណាមួយនាងមានផ្ទៃពោះជិត៣ខែហើយ មិនអាចឱ្យប្តីរបស់នាងទៅណាងាយៗនោះទេ ។
ប្រភពពីអ្នករស់នៅជិតខាងផ្ទះរបស់នាង ប្រពន្ធចុងបានបង្ហើបថា បើនាងនៅតែបន្តយកប្តីរបស់គេតទៅ ទៀត នៅថ្ងៃណាមួយនឹងទទួលរងរបួស ដោយសារទឹកអាស៊ីត ឬអ្វីម៉្យាងរហូតដល់ស្លាប់ក៏មិនដឹង ព្រោះស្ត្រីជាប្រពន្ធដើមបានព្រមានប្រាប់ពួកគេថា រូបគាត់សុខចិត្តស្លាប់ មិនព្រមឱ្យប្តីរបស់ខ្លួនទៅមានប្រពន្ធចុងលួចលាក់នៅខាងក្រៅ នោះទេ បើមិនព្រមឈប់ទាក់ទងប្តីរបស់គាត់ទេ នាងប្រពន្ធចុងរូបនេះនឹងទទួលរងគ្រោះថ្នាក់ នៅថ្ងៃណាមួយជាមិនខានឡើយ ។
ឃើញគេមានប្រពន្ធមួយទៀត បែបនេះ នឹកឃើញភ្លាមដល់បទចម្រៀងលោកស៊ីន ស៊ីសាមុត មួយឃ្លាបានច្រៀងទាក់ទងនឹងវិបត្តិ បុរសមានប្រពន្ធ២ថា « ទុក្ខអ្វីមិនស្មើទុក្ខប្រពន្ធ២ ធំជាងគីរី ធ្ងន់ជាងធរណីវារីសមុទ្រ រលកគ្រាំៗឱ្យខ្ញុំតក់ស្លុត ទោះខំប្រយុទ្ធ ក៏មុខអាវុធលែងមុតទៅហើយ»។ បើ ផ្អែក ទំនុកច្រៀងនេះមិនគួរបុរសទូទៅប្រថុយ បង្កើតបញ្ហាបែបនេះទេ ៕
ដោយ ៖ ប្រុសកោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
