ករណីមានការឈឺចុកចាប់ត្រង់បរិវេណពោះខ្លាំងឡើងៗ និងមានអាការៈក្ដៅខ្លួនស្ទិញៗ ឬក្តៅខ្លួនខ្លាំង អាចមានការសង្ស័យថាកើតជំងឺគ្រុនពោះវៀន ឬពោះវៀនដុះខ្នែង។ ដូចនេះត្រូវប្រញាប់ទៅមន្ទីរពេទ្យ ដើម្បីពិនិត្យរកមើលមូលហេតុពិតប្រាកដ បើសិនជារលាកខ្នែងពោះវៀនមែន ត្រូវព្យាបាលជាបន្ទាន់។
បើតាមសម្ដីរបស់លោកស្រីវេជ្ជបណ្ឌិត អូន រចនា ឯកទេសជំងឺវះកាត់ទូទៅ និងប្រព័ន្ធរំលាយអាហារ នៅមន្ទីរពេទ្យមិត្តភាពខ្មែរ-សូវៀត បានរៀបរាប់ថា រលាកខ្នែងពោះវៀន ប្រសិនបើមកព្យាបាលមិនទាន់ពេលទេ អាចគ្រោះថ្នាក់ដល់ជីវិត ព្រោះខ្នែងពោះវៀនរលាកកាន់តែខ្លាំង បែកធ្លាយធ្វើឲ្យរលាកស្រោមពោះ ហើយមានមេរោគចូលក្នុងចរន្តឈាម។
វេជ្ជបណ្ឌិតខាងលើបានឲ្យដឹងទៀតថា ជំងឺរលាកខ្នែងពោះវៀន និងគ្រុនពោះវៀនមានអាការៈស្រដៀងគ្នាដែរ គ្រាន់តែគ្រុនពោះវៀនឈឺចាប់មានសភាពយូរជាង ដោយអាចលេបថ្នាំផ្សេងៗ ២-៣ ថ្ងៃ តែពោះវៀនដុះខ្នែងវិញ មានភាពឈឺចុកចាប់ផ្នែកក្រោមពោះខាងស្ដាំខ្លាំង ក្អួត រាក ក្ដៅខ្លួន ហើយមិនអាចអូសបន្លាយយូរទេ។
ប្រសិនបើអ្នកជំងឺស្ថិតក្នុងសភាពមិនទាន់ធ្ងន់ធ្ងរ ពេទ្យអាចពិនិត្យឈាម និងមើលអេកូ ដើម្បីឲ្យកាន់តែច្បាស់ ប៉ុន្តែសម្រាប់អ្នកជំងឺស្ថិតក្នុងដំណាក់កាលធ្ងន់ធ្ងរ គ្រាន់តែមើលរោគវិនិច្ឆ័យមួយចំនួនពីខាងក្រៅ និងស្ទាបពោះ គ្រូពេទ្យជំនាញអាចដឹង និងរៀបចំវះកាត់ឲ្យបានទាន់ពេលវេលា។ មួយវិញទៀតប្រសិនបើការវះកាត់ខ្នែងពោះវៀនរលាកលើកមុនមិនអស់ មិនស្អាត ពេលក្រោយអាចកើតឡើងម្ដងទៀត និងត្រូវវះកាត់ឡើងវិញ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]