រាជធានីភ្នំពេញ ៖ បុរសម្នាក់ធ្លាប់ជាប់ពន្ធនាគារព្រៃស២ឆ្នាំ ពីបទប្លន់ និងធ្លាប់ជាប់មណ្ឌលកែប្រែបន្សាបគ្រឿងញៀន «ឱកាសខ្ញុំ» រយៈពេល៦ខែ លុះពេលចេញមកវិញមិនត្រឹមតែមិនព្រមរាងចាលរកការងារធ្វើ ដើម្បរកប្រាក់ចិញ្ចឹមខ្លួនឯង និងក្រុមគ្រួសារប៉ុណ្ណោះទេ បែរជាយកស្រាធ្វើជាត្រីមុខផឹកស្រវឹងរាល់ថ្ងៃ ។
មិនតែប៉ុណ្ណោះថែមទាំងស្រែកឡូឡាជេរគេជេរឯងគ្មានរើសមុខ និងវាយបំផ្លិចបំផ្លាញទ្រព្យសម្បត្តិក្នុងផ្ទះ បណ្ដាលឲ្យរងការខូចខាតខ្ទេចខ្ទី ក្រោយពេលឃើញកាយវិការបែបនេះជីតាដែលមានអាយុ៩០ឆ្នាំ ទៅហើយបានឃាត់កុំឲ្យមានខ្មាសអ្នកជិតខាង ។
ប៉ុន្តែខណៈនោះចៅតិរច្ឆានមិនត្រឹមតែមិនស្ដាប់ប៉ុណ្ណោះទេ ថែមទាំងខឹងសម្បារយ៉ាងខ្លាំង រួចបានស្ទុះវឹងទៅដាល់ជីតា បណ្ដាលឲ្យរងរបួសបែកមុខធ្ងន់ធ្ងរ បន្ទាប់មកនគរបាលបានចុះទៅអន្តរាគមន៍ឃាត់ខ្លួនភ្លាមៗដែរ ។ ហេតុការណ៍នោះបានកើតឡើងកាលពីវេលាម៉ោង៩ព្រឹកថ្ងៃទី០១ ខែកក្កដានេះ នៅក្នុងភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ជនដៃដល់ជាចៅដែលសងគុណជីតាខ្លួនឯង ដោយកណ្ដាប់ដៃនោះឈ្មោះ រស់ សេរីវិចិត្រសត្យា ហៅរាជ អាយុ៣៨ឆ្នាំ ស្នាក់នៅក្នុងភូមិខាងលើ ។ ចំណែកជីតារងគ្រោះឈ្មោះ ងួន ឡាយ អាយុ៩០ឆ្នាំ រស់នៅផ្ទះកើតហេតុ និងមានស្រុកកំណើតនៅក្នុងស្រុកពារាំង ខេត្តព្រៃវែង ។
តាមប្រភពព័ត៌មានបានឲ្យដឹងថា នៅមុនពេលកើតហេតុជនសង្ស័យខាងលើបានផឹកស៊ីនៅខាងក្រៅរហូតទល់ស្រវឹងទើបត្រឡប់ចូលផ្ទះ និងបានរករឿងក្រុមគ្រួសារតាមទម្លាប់ដែលគេតែងតែធ្វើក្នុងពេលកន្លងមក ជននេះបានស្រែជេគេជេរឯង និងស្រែកឡូឡាថែមទៀតផង ។
ក្រោយពេលឃើញទិដ្ឋភាពច្រង៉េងច្រង៉ាងបែបនេះ ក្រុមគ្រួសារពិបាកចិត្តខ្លាំងណាស់ ហើយភ្លាមៗនោះជីតាដែលមានវ័យ៩០ឆ្នាំទៅហើយនោះ បានឃាត់កុំឲ្យជននេះមាត់ខ្មាសអ្នកជិតខាង ។ ប៉ុន្តែបែរជាបង្កឲ្យជននេះរឹតតែខឹងខ្លាំងឡើង ក៏បានវាយទាត់ធាក់បំផ្លិចបំផ្លាញទ្រព្យសម្បត្តិនៅក្នុងផ្ទះ បណ្ដាលឲ្យរងការខូចខាតខ្ទេច ព្រមទាំងស្ទុះទៅដាល់ជីតាបង្កើតរបស់ខ្លួនបណ្ដាលឲ្យរងរបួសបែកមុខយ៉ាងធ្ងន់ធ្ងរ ។
មិនតែប៉ុណ្ណោះបានបង្កឲ្យមានការភ្ញាក់ផ្អើលយ៉ាងខ្លាំង ហើយភ្លាមៗនោះកម្លាំងនគរប៉ុស្តិ៍ចោមចៅ៣ បានចុះអន្តរាគមន៍ឃាត់ខ្លួនជននោះនាំយកទៅសាកសួរភ្លាមៗដែរ ។ នគរបាលបានឲ្យដឹងថា ក្រោយពេលសួរនាំទើបដឹងថា ជននេះ គឺជាមុខសញ្ញាចោរប្លន់ដែលកន្លងមកធ្លាប់ជាប់ពន្ធនាគារព្រៃស២ឆ្នាំពីបទប្លន់ ហើយក៏ធ្លាប់ជាប់មណ្ឌលកែប្រែបន្សាបគ្រឿងញៀន «ឱកាសខ្ញុំ » រយៈពេល៦ខែផងដែរ ។
លុះចេញមកវិញមិនបានរាងចាល សូម្បីតែបន្តិចបន្តួចសោះ ចំណែកការងាររកស៊ីចិញ្ចឹមជីវិតក៏គ្មានដែរ បែរជាដើរផឹកស៊ីស្រវឹងរករឿងក្រុមគ្រួសាររាល់ថ្ងៃរហូតបង្ករបួសស្នាមលើជីតាខ្លួនឯងបែបនេះទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
