នៅចាំ ពៅ ធាវី ម្ចាស់ជ័យលាភីលេខ១ កម្មវិធី«ស្រីស្រស់ប្រុសស្អាត»ទេ? បាត់មុខយូរ វ័យរាងជ្រេ តែសម្រស់នៅតែខ្ញង់ដដែល

ភ្នំពេញ៖ បើនិយាយពីម្ចាស់ជ័យលាភីលេខ១ ស្រីស្រស់ប្រុសស្អាតអ្នកនាង ពៅ ធាវី ប្រិយមិត្តមួយចំនួន ប្រហែលជានៅចាំមិនទាន់ភ្លេចនោះទេ បើទោះបាត់មុខនាងមួយរយៈធំក៏ដោយ ព្រោះថាអតីតតារាសម្តែងរូបនេះ ធ្លាប់លេចមុខក្នុងរឿងល្បីៗជាច្រើន ជាពិសេសនោះគឺក្នុងរឿង “កុមារី២៥ឆ្នាំ” តែម្តង។

យ៉ាងណាមិញ ស្រាប់តែប៉ុន្មានម៉ោងមុននេះនៅលើបណ្តាញសង្គម លោក អ៊ុន សុធា ដែលជាតារាសម្តែងដ៏មានប្រជាប្រិយភាព បានធ្វើឲ្យមហាជន ក៏ដូចជាអ្នកលេងបណ្តាញសង្គមភ្ញាក់ផ្អើលយ៉ាងខ្លាំង ក្រោយពីឃើញលោកបង្ហោះរូបជាមួយអ្នកនាង ពៅ ធាវី ដោយភ្ជាប់ជាមួយសារមួយឃ្លាថា៖ “តើអ្នកទាំងអស់គ្នានៅចាំទេ ? តើគាត់ជាអ្នកណា ?”។

ក្នុងនោះដែរ ផ្អែកតាមរូបមួយសន្លឹកនោះ បើទោះជាអ្នកនាង ពៅ ធាវី បាត់មុខមួយរយៈធំ ហើយវ័យរបស់អតីតតារាស្រីរូបនេះរាងជ្រេបន្តិចមែន ក៏ប៉ុន្តែសម្រស់របស់នាងនៅតែស្អាត និងក្មេងជាងវ័យដដែល ដែលធ្វើឲ្យអ្នកគាំទ្រជាច្រើននាំគ្នាលាន់មាត់ពីសម្រស់របស់នាង។

ម៉្យាងវិញទៀត បើតាមការសង្កេតលើការបញ្ចេញមតិរបស់អ្នកគាំទ្រ បានឲ្យឃើញថា អ្នកគាំទ្រជាច្រើននៅតែចាំឈ្មោះរបស់តារាស្រីរូបនេះជានិច្ច ហើយអ្នកគាំទ្រថែមទាំងចាំនូវខ្សែភាពយន្តដែលនាងធ្លាប់សម្តែងថែមទៀតផង៕

តើប្រិយមិត្តយល់យ៉ាងណាដែរ? 

• តារាខ្មែរ