បើក​ត្រាក់​ទ័រ​ភ្ជួរ​​ចម្ការ​កិន​ប៉ះ​មីន​តោន​ផ្ទុះ​​កក្រើក​ដាច់​​ត្រាក់​ទ័រ​២​កំណាត់​​អ្នក​បើក​បរ​របួស​​ស្រាល​

ខេត្តបាត់ដំបង ៖ ត្រាក់ទ័រម៉ាកហ្វ័ត១គ្រឿង បានដាច់ជា២កំណាត់ រីឯអ្នកបើកបរគ្រាន់តែរងរបួសស្រាល ដោយសារបើកភ្ជួរដី ចម្ការកិនចំគ្រាប់មីនតោន កាលពីវេលាថ្ងៃត្រង់ថ្ងៃទី១៣ កុម្ភៈ ២០១៣ នៅក្នុងភូមិសាស្ត្រភូមិអូរត្រាវជួ ឃុំសេរីមានជ័យ ស្រុកសំពៅលូន ដែលគេសន្និដ្ឋានថា ជាគ្រាប់កប់ក្នុងដីសេសសល់តាំងពីអំឡុងសម័យសង្គ្រាម ។

លោកឈិត សេង នាយផ្នែកព្រហ្មទណ្ឌនៃអធិការដ្ឋាន ស្រុកសំពៅលូនបានប្រាប់ថា ត្រាក់ទ័រដែលភ្ជួរដីចម្ការជាន់មីនតោននោះម៉ាកហ្វ័ត បើកបរដោយបុរសម្នាក់ឈ្មោះលីន អាយុ២៨ឆ្នាំ ។ លោកបញ្ជាក់ថា ត្រាក់ទ័រនោះ បានដាច់២កំណាត់ ខណៈអ្នកបើកបរខ្ទាតចេញពីត្រាក់ទ័រដោយសារកម្លាំងខ្យល់ ប៉ុន្តែគ្រាន់តែរងរបួសស្រាល ពេលបើកកិនគ្រាប់មីនចំកង់ខាងក្រោយ ។ លោកឈិត សេង បានបន្ថែមថា តាមការពិនិត្យលើភូមិសាស្ត្រតំបន់នោះ គឺជាដីវាលរហោឋានគ្មានព្រៃទេ តែពោរពេញដោយដំណាំកសិកម្មរបស់ប្រជាកសិករ ។ លោកថា កន្លែងដែលផ្ទុះគ្រាប់មីននោះ គឺជាដីដែលម្ចាស់ធ្លាប់ភ្ជួរដាំដុះរាល់ឆ្នាំ តែកាលពីមុនក៏ធ្លាប់មានផ្ទុះ ហើយក្រុមកម្ចាត់មីន «ស៊ីម៉ាក់» ក៏ធ្លាប់ចូលទៅដោះបានគ្រាប់មីននៅទីនោះដែរ តែមិនដឹងយ៉ាងម៉េចស្រាប់តែនៅមានគ្រាប់មីនផ្ទុះទៀត ដែលទំនងគ្រាប់មីននេះត្រូវគេកប់ជ្រៅ ៕

បញ្ចូលអត្ថបទ ៖ បុប្ផា កោះ