មិននឹកស្មាន! Koulibaly រម្លឹកប្រវត្តិជូរចត់ជាមួយ Maurizio Sarri កាលនៅ Napoli

អ៊ីតាលី៖ កីឡាករ Kalidou Koulibaly បានទម្លាយប្រាប់រឿងដ៏ហួសចិត្តមួយសម្រាប់លោក កាលដែលលោក Maurizio Sarri នៅដឹកនាំ Napoli ដែលកាលណោះលោក Sarri បានកោះហៅរូបគេមកចូលរួមក្នុងបញ្ជីឈ្មោះកីឡាករត្រៀមប្រកួត ទាំងដែលប្រពន្ធរបស់គេទើបតែសម្រាលកូន ប៉ុន្តែបែរជាដាក់ឱ្យគេស្ថិតនៅកៅអីបម្រុងទៅវិញ។

Koulibaly បានរម្លឹករៀបរាប់អំពីរឿងហេតុនាពេលនោះថា កាលពីខែមករា ឆ្នាំ ២០១៦ កំឡុងពេលហ្វឹកហាត់ និងវិភាគវីដេអូប្រកួតដែលពន្យល់ដោយលោក Sarri មុននឹងការប្រកួតទល់នឹង Sassuolo គ្រានោះដែរ ប្រពន្ធរបស់ខ្លួនគឺនាង Charline បានទូរស័ព្ទមកប្រាប់ថា នាងកំពុងត្រៀមនឹងសម្រាលកូនហើយ។ ពេលនោះដែរ Koulibaly មានការខ្លាចរអារចំពោះលោក Sarri និងមិនហ៊ានលើកទូរស័ព្ទនិយាយឡើយ។ Koulibaly ក៏បានបន្ថែមថា ពេលនោះប្រពន្ធរបស់គេ បានទូរស័ព្ទមក ៥ ទៅ ៦ ដងឯណោះ តែដោយសារខ្លាចលោក Sarri ធ្វើឱ្យគេមិនចង់ទទួលទូរស័ព្ទឡើយ។

ខ្សែការពារសញ្ជាតិសេណេហ្កាល់រូបនេះបន្តប្រាប់ថា៖ “ដោយទ្រាំមិនបាន ខ្ញុំក៏រត់ចេញមកក្រៅដើម្បីទទួលទូរស័ព្ទ ហើយប្រពន្ធរបស់ខ្ញុំនាងបានប្រាប់ឱ្យខ្ញុំត្រូវតែទៅជួបនាង ដោយសារតែកូនប្រុសរបស់ខ្ញុំជិតកើតហើយ”។ Koulibaly បានបន្តថា៖ “ពេលនោះខ្ញុំបានចូលទៅជួបលោក Sarri និងបាននិយាយប្រាប់ថា ខ្ញុំពិតជាត្រូវទៅមែន ប៉ុន្តែដំបូងឡើយលោក Sarri បានបដិសេធដោយគាត់ប្រាប់ថា គាត់ពិតជាត្រូវការខ្ញុំខ្លាំងណាស់សម្រាប់ការប្រកួតនេះ (ទល់នឹង Sassuolo)។ ប៉ុន្តែខ្ញុំបានប្រាប់គាត់ថា ខ្ញុំមិនអាចនៅបានទេ មិនខ្វល់ថាលោកចង់ពិន័យ ចង់ព្យួរ ឬធ្វើយ៉ាងម៉េចឡើយ។ Sarri បានជក់បារីជាច្រើន ហើយចុងក្រោយគាត់ក៏បានយល់ព្រម ប៉ុន្តែបានតម្រូវឱ្យខ្ញុំត្រឡប់មកវិញសម្រាប់ការប្រកួតនាយប់នោះ”។ យ៉ាងណាមិញ Koulibaly ក៏បានត្រឡប់មកមន្ទីរពេទ្យទាន់ពេលដែលភរិយាគេសម្រាលបានកូនប្រុសម្នាក់ ដែលពេលនោះដែរ ខ្សែការពាររូបនេះបានចាត់ទុកថា នោះជាថ្ងៃដែលរីករាយបំផុតក្នុងជីវិត។ 

យ៉ាងណាក្តី Koulibaly បានបន្តថា៖ “នៅថ្ងៃដដែលនោះ លោក Sarri បានទូរស័ព្ទមកខ្ញុំនៅម៉ោង ៤ ហើយបាននិយាយអង្វរខ្ញុំថា គាត់ពិតជាត្រូវការខ្ញុំខ្លាំងណាស់សម្រាប់ប្រកួតនោះ។ ប៉ុន្តែរឿងហួសចិត្តបំផុតនោះគឺ ពេលដែលខ្ញុំទៅដល់កីឡដ្ឋាន និងបានត្រៀមលក្ខណៈសម្រាប់ការប្រកួតរួចរាល់ ខ្ញុំបែរជាមិនឃើញមានឈ្មោះរបស់ខ្ញុំក្នុងបញ្ជី ១១នាក់ដំបូងទៅវិញ។ ពិតណាស់! Sarri គាត់ដាក់ខ្ញុំក្នុងបញ្ជីបម្រុង ហើយគាត់ប្រាប់ថានេះជាសិទ្ធិរបស់គាត់”។ យ៉ាងណាក្តី Koulibaly ក៏បានបង្ហាញខ្លួន ២២នាទីចុងក្រោយផងដែរ ខណៈដែលការប្រកួតនោះ Napoli បានយកឈ្នះ Sassuolo ៣-១៕

ចុះចំណែកប្រិយមិត្តវិញ! យល់យ៉ាងណាដែរចំពោះរឿងនេះ??