ខេត្តបាត់ដំបង ៖ នាព្រឹកថ្ងៃទី២៣ មិថុនា នៅក្នុងភូមិអូរដា ឃុំបួរ ស្រុកភ្នំព្រឹក អាជ្ញាធរមូលដ្ឋាននិងអ្នកភូមិ រួមទាំងក្រុមគ្រួសារសាច់ញាតិរបស់ជនរងគ្រោះដែលមកពីទីជិតឆ្ងាយបាននាំគ្នាសង់រោងបុណ្យ ដើម្បីរង់ចាំទទួលសពជនរងគ្រោះទាំង២នាក់ប្ដីប្រពន្ធ ដែលបានស្លាប់ក្នុងព្រឹត្តិការណ៍បាក់អគារកម្ពស់៧ជាន់ នៅឯខេត្តព្រះស៊ីហនុ កាលពីថ្ងៃទី២២ មិថុនា ឆ្នាំ២០១៩។
កំពុងស្ថិតក្នុងទិដ្ឋភាពដ៏សោកសៅ ក្រោមការជួយជ្រោមជ្រែងពីអាជ្ញាធរមូលដ្ឋាន និងមានការចូលរួមពីប្រជាពលរដ្ឋនៅទីនោះយ៉ាងមមាញឹកផងនោះ លោកកើត ចិន្តា មេឃុំបួរ បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី២៣ មិថុនា ឱ្យដឹងថា ខណៈនេះអាជ្ញាធរ និងប្រជាពលរដ្ឋជាច្រើនបាននឹងកំពុងចូលរួមរំលែកទុក្ខជាមួយនឹងក្រុមគ្រួសារនៃសពដែលបានស្លាប់នៅក្នុងព្រឹត្តិការណ៍បាក់អគារនៅខេត្តព្រះសីហនុ។
លោកមេឃុំបួរបានថ្លែងថា ជាមួយនឹងការចូលរួមរំលែកទុក្ខដ៏ក្រៀមក្រំនាពេលនេះ អាជ្ញាធរ និងអ្នកភូមិ ក៏កំពុងសហការគ្នាជួយរៀបចំសង់រោងបុណ្យ ដើម្បីរង់ចាំទទួលសពប្ដីប្រពន្ធ ដែលសាច់ញាតិកំពុងធ្វើដំណើរទៅទទួលយកសពពីខេត្តព្រះសីហនុផងដែរ។
លោកកើត ចិន្តា មេឃុំបួរ បានឲ្យដឹងថា ជនរងគ្រោះទាំង២នាក់ប្ដីប្រពន្ធដែលបានស្លាប់យ៉ាងរន្ធត់នៅក្នុងព្រឹត្តិការណ៍អគារបាក់សង្កត់នៅឯខេត្តព្រះសីហនុនោះ គឺជនរងគ្រោះជាប្តីឈ្មោះទន់ ប្រុស អាយុ៤០ឆ្នាំ និងជនរងគ្រោះជាប្រពន្ធឈ្មោះហ៊ង ចន្ថា អាយុ៣៧ឆ្នាំ ។ ជនរងគ្រោះទាំង២នាក់ប្តីប្រពន្ធមានកូនប្រុសចំនួន៣នាក់ ដែលកូនទី១ អាយុ១៣ឆ្នាំ កូនទី២អាយុ១១ឆ្នាំ និងកូនទី៣ អាយុ៩ឆ្នាំ ក្រុមគ្រួសាររបស់ជនរងគ្រោះរស់នៅក្នុងភូមិឃុំ ដែលកំពុងរៀបចំធ្វើបុណ្យខាងលើ។
លោកមេឃុំបួរបានបញ្ជាក់ថា ពេលនេះក្រុមគ្រួសារ និងសាច់ញាតិបានធ្វើដំណើរទៅដល់ខេត្តព្រះសីហនុ ដើម្បីទទួលយកសពជនរងគ្រោះទាំង២នាក់ប្ដីប្រពន្ធមកធ្វើបុណ្យនៅឯស្រុកកំណើត ខណៈមន្ត្រីអាជ្ញាធរ និងអ្នកភូមិ រួមទាំងសាច់ញាតិជាច្រើននាក់កំពុងរង់ចាំទទួលដោយក្តីក្តុកក្តួលបំផុត។
បើមើលទិដ្ឋភាពនៃទីកន្លែងប្រារព្ធពិធីបុណ្យសព គេសង្កេតឃើញអ្នកចូលរួមរំលែកទុក្ខជាមួយនឹងក្រុមគ្រួសារនៃសពបាននាំគ្នារៀបចំដំឡើងរោងបុណ្យ រោងចុងភៅ និងឧបករណ៍បំពងសំឡេងយ៉ាងមមាញឹក ខណៈលោកតាអាចារ្យជាច្រើននាក់ក៏កំពុងរៀបចំទីតាំងសម្រាប់តម្កល់សពប្ដីប្រពន្ធ ដែលអ្នកចូលរួមរំលែកទុក្ខទាំងអស់ ម្នាក់ៗស្ថិតក្នុងទឹកមុខស្រងូតស្រង៉ាត់ ក្រោមដំណក់ទឹកភ្នែករលីងរលោងនៃក្រុមគ្រួសារ និងញាតិមិត្តជិតឆ្ងាយមួយចំនួនផងដែរ ដែលមើលទៅគួរឲ្យសង្វែគ ។
សូមបញ្ជាក់ថា ជនរងគ្រោះទាំង២នាក់ប្ដីប្រពន្ធខាងលើនេះ គឺជាពលរដ្ឋរស់នៅខេត្តបាត់ដំបង ហើយបានចាកចេញពីស្រុកកំណើតទៅធ្វើជាកម្មករសំណង់ និងបានស្នាក់នៅក្នុងអគារកម្ពស់៧ជាន់របស់ក្រុមហ៊ុនចិនឯខេត្តព្រះសីហនុដែលកំពុងសាងសង់ ហើយក៏បានរលំបាក់កាលពីវេលាទៀបភ្លឺថ្ងៃទី២២ មិថុនា បណ្តាលឱ្យមានអ្នកស្លាប់ និងអ្នករងរបួសជាច្រើននាក់ ៕ (កែសម្រួលដោយ ៖ ធីតា)
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
