រាជធានីភ្នំពេញ ៖ សេចក្តីរាយការណ៍បានបន្តទៀតថា រយៈពេលជាច្រើនម៉ោងមកហើយ អណ្តាតភ្លើងមិនព្រមថមថយ បានឆេះរាលដាលដល់លំនៅឋាន១ខ្នង និងផ្ទះជួល២បន្ទប់ថែមទៀត គិតនៅ ត្រឹមម៉ោងជិត៣រសៀលថ្ងៃទី២២ មិថុនា នេះ បន្ទាប់ពីត្របាក់នៅឃ្លាំងស្តុកហ្គាសហើយរាលដល់ភូមិគ្រឹះដ៏ធំស្កឹមស្គៃរបស់ម្ចាស់នោះ ស្ថិតនៅចំណុចឃ្លាំងលេខ១២ ផ្លូវបេតុង ក្រុម៤ ក្នុងភូមិទួលថ្ងាន់ សង្កាត់ទួលសង្កែទី២ ខណ្ឌប្ញស្សី។
សេចក្តីរាយការណ៍បន្តថា តែទោះបីជាយ៉ាងណា ហេតុការណ៍រន្ធត់នេះ មិនបណ្តាលឱ្យមានមនុស្សរងគ្រោះថ្នាក់នោះទេ ។ គួរបញ្ជាក់ដែរថា ហេតុការណ៍នេះ បង្កឱ្យភ្ញាក់ផ្អើល កាលពីវេលាម៉ោង១០និង៤០នាទីព្រឹកម្ល៉េះ ។ ហើយភ្លាមៗ រថយន្តពន្លត់អគ្គីភ័យជាច្រើនគ្រឿងទៅអន្តរាគមន៍បាញ់ពន្លត់ ។
ទាក់ទិនការកើតមានអគ្គីភ័យ ត្រូវបានសមត្ថកិច្ចអោយដឹងថា បណ្តាលមកពីជាងផ្សាដែកមកធ្វើធ្នើរដាក់ហ្គាសក្នុងបរិវេណឃ្លាំង ជាហេតុបណ្តាលអោយកម្ទេចភ្លើងខ្ទាតធ្លាក់ទៅប៉ះនឹងកំប៉ុងហ្គាសតូចៗក៏ផ្ទុះឆេះតែម្តង ។ ឃ្លាំងដែលត្រូវភ្លើងឆាបឆេះនោះមានទំហំប្រមាណ២០ម៉ែត្រគុណ៤០ម៉ែត្រ មានម្ចាស់ឈ្មោះ សេង ហួត ភេទប្រុសអាយុ ៤២ឆ្នាំ ជានគរបាលនៅក្រសួងមហាផ្ទៃ។
តាមព័ត៌មានថា កំប៉ុងហ្គាសតូច និងធំមានរាប់ម៉ឺនកំប៉ុងនិងធុងឯនោះ បានផ្ទុះឆេះផ្សែងហុយទ្រលោមទៅលើអាកាសផ្អើលមួយចំហៀងរាជធានីភ្នំពេញ ។ ដោយសារអំណាចហ្គាសនិងភ្លើង បានឆេះរាលដាលយ៉ាងរហ័ស និងឆេះដល់ភូមិគ្រឹះមួយខ្នង កំពស់៣ជាន់របស់ថៅហ្គាសយ៉ាងសន្ធោសន្ធៅ រងការខូចខាតស្ទើរតែទាំងស្រុង ព្រមទាំងឆេះរាលដាលទៅផ្ទះអ្នកជិតខាងមួយខ្នង និងបន្ទប់ជួលចំនួន២បន្ទប់ទៀត។
តាមនគរបាលបានដឹងដែរថា នៅពេលកើតមានអគ្គិភ័យ រថយន្តពន្លត់មាន៣៣គ្រឿងរបស់ស្នងការនគរបាលរាជធានីភ្នំពេញ ព្រមទាំងអង្គភាពផ្សេងៗបានទៅអន្តរាគមន៍បាញ់អស់៦១រថយន្ត គិតអស់រយៈពេលប្រមាណជាង៣ម៉ោង ភ្លើងក៏បានរលត់ជាស្ថាពរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
