West Ham ប្រាប់ទៅបងប្អូនត្រកូល Manchester ថា កីឡាករម្នាក់នេះមិនសម្រាប់ “លក់” ឡើយ

អង់គ្លេស៖ យោងតាមប្រភពពីសារព័ត៌មាន Sky Sport បានឱ្យដឹងថា ក្លិប West Ham United បានបដិសេធសំណើរបស់ក្លិបត្រកូល Manchester ទាំងពីរគឺ Manchester City និង Manchester United ជុំវិញការចរចាចង់បានខ្សែបម្រើ Declan Rice របស់ក្លិប។ កីឡាករវ័យ ២០ឆ្នាំរូបនេះ កំពុងតែបង្ហាញខ្លួនបានយ៉ាងល្អជាមួយក្លិប West Ham ដោយបង្ហាញខ្លួនបាន ៣៤ប្រកួតក្នុងក្របខណ្ឌ English Premier League នារដូវកាល ២០១៨/២០១៩ កន្លងទៅ ព្រមទាំងបង្ហាញខ្លួនជាមួយក្រុមជម្រើសជាតិអង់គ្លេសបាន ៣ប្រកួតផងដែរកាលពីពេលថ្មីៗនេះ។

បើទោះបីជាមានការបង្ហាញចំណាប់អារម្មណ៍ពីក្លិបកំពូលទាំងពីរនេះ ក៏ប៉ុន្តែក្លិប West Ham បានបង្ហាញពីជំហររបស់ខ្លួន ដែលចង់រក្សាទុកកីឡាកររូបនេះ យ៉ាងហោចណាស់ឱ្យបានមួយរដូវកាលទៀតសិន មុននឹងពិចារណាក្នុងការលក់ចេញ។ គួរឱ្យដឹងដែរថា កីឡាករ Declan Rice ត្រូវបានលោក Ole Solskjaer ចាត់ទុកជាគោលដៅសំខាន់មួយដែលត្រូវនាំចូល សម្រាប់រៀបចំក្រុមឡើងវិញ ខណៈដែល Man City ចង់បានកីឡាកររូបនេះ ប្រសិនបើពួកគេបរាជ័យក្នុងការនាំយកខ្សែបម្រើ Rodri ពី At.Madrid៕