មួយថ្ងៃៗ ក្រៅពីរៀន និងការងារមុខកុំព្យូទ័រ ម្នាក់ៗចំណាយរាប់ម៉ោងលើ ស្មាតហ្វូន គួបផ្សំបរិស្ថានខ្យល់ពុល កម្ដៅថ្ងៃ និងរបបអាហារផ្ដេសផ្ដាស ភ្នែកយើងប្រែពីថ្លាឆ្វង់ ទៅជាល្អក់លឿងៗបណ្ដើរ ហេតុនេះត្រូវចេះការពារភ្នែកឲ្យបានល្អ កុំឲ្យមានបញ្ហាទើបស្តាយក្រោយ។ “Hello គ្រូពេទ្យ” នឹងណែនាំអាហារល្អៗប៉ុន្មានមុខ អាចជួយភ្នែកឲ្យបានសុខភាពល្អ។
១- ខ្លាញ់ត្រី
ត្រីទឹកត្រជាក់ សម្បូរអាស៊ីដខ្លាញ់អូមេហ្គា ៣ និង DHA មានអត្ថប្រយោជន៍យ៉ាងច្រើនសម្រាប់រាងកាយទាំងមូល មិនមែនសម្រាប់តែភ្នែកមួយមុខនោះទេ។ វាល្អសម្រាប់ស្បែក សក់ សុខភាពទូទៅ ជាពិសេសជួយការពារប្រឆាំងចង្កោមរោគសញ្ញាស្ងួតភ្នែក ជំងឺខូចរ៉េទីនភ្នែក និងភ្នែកឡើងបាយ ជាដើម។ របស់ល្អទាំងនេះមាននៅក្នុងពពួកត្រីសមុទ្រ ដូចជា សាឌីន (Sardines) ត្រី Mackerel ត្រីធូណា (Tuna) ត្រីសាលម៉ុន (Salmon) និងត្រីត្រៅ (Trout)។
២- ការ៉ុត
ការ៉ុត ប្រមូលផ្តុំដោយវីតាមីនសារធាតុរ៉ែខនិជ និងជាតិបេតាការ៉ូតែន (Beta-carotene) ដែលជាប្រភេទវីតាមីន A ។ សារធាតុទាំងនេះ រួមចំណែកយ៉ាងច្រើនចំពោះសុខភាពភ្នែក ការពារគំហើញ ជួយរេទីនភ្នែក និងជំរុញផ្នែកដទៃទៀតនៃភ្នែក ឲ្យដំណើរការបំពេញមុខងារបានត្រឹមត្រូវ។ អ៊ីចឹង គួរមានទម្លាប់ញ៉ាំការ៉ុត ឬទឹកការ៉ុតប្រចាំថ្ងៃ ដើម្បីភ្នែកភ្លឺថ្លាល្អ។
៣- បន្លែស្លឹកបៃតង
បន្លែ ជាពិសេសបន្លែស្លឹកបៃតង មិនគ្រាន់តែមានប្រយោជន៍សម្រាប់ស្បែក និងប្រព័ន្ធរំលាយអាហារប៉ុណ្ណោះទេ ថែមទាំងរក្សាភ្នែកឲ្យនៅភ្លឺ និងថ្លាស្រឡះ។ បន្លែបៃតងមានជាតិ Zeaxanthin និងលុយតេអ៊ីន (Lutein) ក្រាស់ក្រែល សារធាតុប្រឆាំងអុកស៊ីតកម្ម កាត់បន្ថយ ជំងឺខូចទ្រុឌទ្រោមចំណុចពណ៌លឿងរបស់រេទីនភ្នែក និងភ្នែកឡើងបាយ។ ស្ពៃខាល (kale) ផ្កាខាត់ណាបៃតង ស្ពៃពួយឡេង ខាត់ណាស្លឹក ផ្លែប៊ើរ គ្រាប់សណ្ដែកបារាំង មានប្រសិទ្ធភាពជួយដល់ភ្នែកកាន់តែប្រសើរឡើងក្នុងរយៈពេលខ្លី។
៤- គ្រាប់អាល់ម៉ុន
គ្រាប់អាល់ម៉ុន អាចជាអាហារជំនួសដ៏ល្អសម្រាប់អាហារគ្មានប្រយោជន៍ផ្សេងៗ។ ញ៉ាំគ្រាប់អាល់ម៉ុន ៣០ ក្រាម/ថ្ងៃ បង្កើនវីតាមីន E ជួយការពារភ្នែក។
៥- គ្រាប់ធញ្ញជាតិសម្រូប
គ្រាប់ធញ្ញជាតិសម្រូប ឬ Whole Grains មានផ្ទុកជាតិស្ករគ្លុយកូស (GI) ដែលមានប្រសិទ្ធភាពបន្ថយហានិភ័យជំងឺខូចពណ៌នៃរេទីនភ្នែក ពេលចាស់ទៅ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូន៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
