ខេត្តបន្ទាយមានជ័យ ៖ តាមសេចក្តីរាយការណ៍បឋមបានឱ្យដឹងថា ទើបតែបញ្ជូនជនជាតិចិនចំនួន១២នាក់ទៅសាលាដំបូងខេត្តបន្ទាយមានជ័យ ពីបទចាប់ជំរឹតទារប្រាក់ពីជនជាតិចិនដូចគ្នាកាលពីពេលកន្លងមក ស្រាប់តែនៅថ្ងៃទី១៧ មិថុនា ២០១៩ បានទទួលព័ត៌មានពីនាយកដ្ឋាននគរបាលព្រហ្មទណ្ឌថា មានករណីចាប់ជំរិតទារប្រាក់ពីជនជាតិខ្មែរដូចគ្នា ពីភ្នំពេញមកដល់ខេត្តបន្ទាយមានជ័យ ។
លុះនៅវេលាម៉ោង១១និង៣០នាទីយប់ថ្ងៃទី១៧ ខែមិថុនា ឆ្នាំ២០១៩ កំលាំងជំនាញព្រហ្មទណ្ឌកំរឹតស្រាលខេត្ត និងកំលាំងអធិការដ្ឋាននគរបាលគ្រប់ស្រុក-ក្រុង ដឹកនាំដោយលោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានបញ្ចេញកម្លាំងទាំងយប់ធ្វើការស្រាវជ្រាវ និងត្រួតពិនិត្យឆែកឆេរ នៅតាមដងផ្លូវជាតិ និងតាមសណ្ឋាគារ ឬផ្ទះសំណាក់ដែលមានការសង្ស័យ រហូតឈានដល់ការបង្ក្រាប និងចាប់ឃាត់ខ្លួនជនសង្ស័យចំនួន៣នាក់នៅសណ្ឋាគារស៊ីធី ប៉ោយប៉ែត ស្ថិតក្នុងក្រុងប៉ោយប៉ែត ខេត្តបន្ទាយមានជ័យ ដោយមានការសម្របសម្រួលពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយជ័យ រួចបាននាំខ្លួនជសង្ស័យទាំង៣នាក់មកធ្វើការសាកសួរនៅស្នងការដ្ឋាននគរបាលខេត្ត ។
លោកឧត្តមសេនីយ៍ត្រីស្នងការរងទទួលផែននគរបាលព្រហ្មទណ្ឌបានឲ្យដឹងថា ជនរងគ្រោះក្នុងករណីចាប់ជំរឹតទារប្រាក់ខាងលើឈ្មោះ ថៅ ណាក់ ភេទប្រុស អាយុ៣៧ឆ្នាំ រស់នៅសង្កាត់ បឹងទំពុន ខណ្ឌមានជ័យ ភ្នំពេញ ។
ចំណែកជនសង្ស័យទាំង៣នាក់ខាងលើ រួមមាន ១-ឈ្មោះព្រាប វណ្ណា ភេទប្រុស ឆ្នាំ២៣ឆ្នាំ ជាអ្នកបើកបររថយន្ត និងជាសមគំនិត ២-ឈ្មោះ ព្រាប វណ្ណះ ភេទប្រុស អាយុ២៩ឆ្នាំ ជាអ្នកចាប់ជំរឹត និង៣-ឈ្មោះ វ៉ាន់ ស្រេត ភេទប្រុស ឆ្នាំ២៨ឆ្នាំ ជាសមគំនិត និងដកហូតរថយន្តមួយគ្រឿងម៉ាកឡិចស៊ីស ៣០០ ពណ៌កាំម៉ៃ ស្លាកលេខ ភ្នំពេញ ២AL-៨០០៤ ជាមធ្យោបាយដឹកជញ្ជូនជនរងគ្រោះពីភ្នំពេញរហូតមកដល់ក្រុងប៉ោយប៉ែត រួមទាំងទូរស័ព្ទដៃចំនួន៣គ្រឿង និងសម្ភារៈផ្ទាល់ខ្លួនមួយចំនួនរបស់ក្រុមជនសង្ស័យ។
លោកឧត្តមសេនីយ៍ស្នងការរងបានបញ្ជាក់ថា យោងតាមការបំភ្លឺរបស់ជនរងគ្រោះបាននិយាយថា មុនពេលកើតហេតុ នៅវេលាម៉ោងប្រមាណជា១០ទៅ១១ព្រឹកថ្ងៃទី១៧ ខែមិថុនា ឆ្នាំ២០១៩ ជនសង្ស័យឈ្មោះព្រាប វណ្ណះ បានទូរស័ព្ទមកបបួលគាត់ទៅហូបបាយជាមួយគ្នា ស្របពេលនោះគាត់ក៏បានទៅជាមួយ ហើយក៏ត្រូវជនសង្ស័យចាប់គាត់ពេលចេញពីភ្នំពេញបានបន្តិច បន្ទាប់មកជនសង្ស័យឈ្មោះព្រាប វណ្ណះ បានធ្វើសកម្មភាពចងមុខ ចងដៃ ដោយប្រើស្គុត និងគំរាមឲ្យគ្នីគ្នាវាយសម្លាប់គាត់ បើមិនផ្តល់ប្រាក់ឲ្យពួកគេចំនួន៣ពាន់ដុល្លាទេនោះ ។
តាមប្រភពពីជនរងគ្រោះបានបន្តថា បន្ទាប់មកជនសង្ស័យបានយកទូរស័ព្ទរបស់គាត់ខលទៅប្អូនស្រីគាត់ឲ្យរកលុយចំនួន៣ពាន់ដុល្លារ តែបានចំនួន១.៥០០ដុល្លារ រួចដាក់ចូលក្នុងកុងធនាគាររបស់ជនសង្ស័យឈ្មោះព្រាប វណ្ណះ ។
នៅចំពោះមុខសមត្ថកិច្ច ជនសង្ស័យឈ្មោះ ព្រាប វណ្ណះ បានសារភាពថា ខ្លួនពិតជាបានប្រព្រឹត្តអំពើចាប់ជំរឹតនោះមែន ក៏ព្រោះតែជនរងគ្រោះបានបំផ្លាញសេចក្តីស្នេហារបស់ខ្លួន ព្រោះខ្លួនមានសង្សាម្នាក់នៅប្រទេសអូស្ត្រាលី និងម្នាក់ទៀតនៅស្រុកខ្មែរ ហើយជនរងគ្រោះបាននិយាយប្រាប់សង្សារបស់ខ្លួននៅអូស្ត្រាលីថា ខ្លួនមានសង្សាម្នាក់នៅស្រុកខ្មែរ ធ្វើឲ្យនាងជាសង្សារនៅអូស្ត្រាលីឈប់ទំនាក់ទំនងជាមួយខ្លួន ទើបខ្លួនមានកំហឹងក៏រៀបចំផែនការចាប់ជំរឹតទារលុយចំនួន៣ពាន់ដុល្លារ តែបានត្រឹមតែ១ពាន់៥០០ដុល្លាប៉ុណ្ណោះដាក់ចូលក្នុងកុងរបស់ខ្លួន ។ ចំពោះលុយដែលខ្លួនជំរឹតបាននោះក៏មិនយកមកចាយទេ គឺយកទៅជួយមន្ទីរពេទ្យកុមារបុប្ផាអង្គរ ។ លុយនោះខ្លួនមិនទាន់បានដកយកនោះទេ។
លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានបញ្ជាក់ថា នេះគឺជាករណីទី២ដែលកម្លាំងនគរបាលខេត្តធ្វើការបង្ក្រាបបានជាបន្តបន្ទាប់ ដែលករណីទី១-ជនជាតិចិនចាប់ជំរឹតជនជាតិចិនដូចគ្នា និងលើកទី២-ខ្មែរចាប់ជំរឹតខ្មែរ ។ ដោយករណីចាប់ជំរឹតនេះដែលកើតមាននៅរាជធានីភ្នំពេញខាងលើនេះ បច្ចុប្បន្នជនសង្ស័យទាំង៣នាក់ត្រូវបានកម្លាំងនគរបាលជំនាញរៀបចំសំណុំរឿងប្រគល់ជូនកម្លាំងនគរបាលនាយកដ្ឋានព្រហ្មទណ្ឌ ដើម្បីចាត់ការបន្តតាមនីតិវិធី ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]