ស្របពេលដែលក្រសួងសុខាភិបាលបានប្រកាសអាសន្នកាលពីដើមឆ្នាំថា ជំងឺគ្រុនឈាមអាចផ្ទុះនៅដើមឆ្នាំ ២០១៩ ថ្មីៗនេះមានក្មេងស្រីម្នាក់នៅខេត្តរតនគីរីបានស្លាប់ដោយសារជំងឺគ្រុនឈាម។
ភ្នាក់ងារចម្លងជំងឺគ្រុនឈាមគឺមូសខ្លាញី ដើម្បីចូលរួមទប់ស្កាត់ការកើតជំងឺគ្រុនឈាមលើមនុស្សគ្រប់វ័យ ពិសេសកូនក្មេង ម៉ាក់ប៉ាត្រូវដឹងពីរោគសញ្ញា និងវិធីបង្ការជំងឺនេះ។ រោគសញ្ញាសំខាន់១ ដែលយើងចាំបាច់ត្រូវតែប្រុងប្រយ័ត្នខ្ពស់នោះ គឺកូនក្តៅខ្លួនលើសពី២ថ្ងៃ ហើយប្រើថ្នាំបញ្ចុះកម្តៅនៅតែមិនបាត់ ត្រូវប្រញាប់នាំកូនទៅពេទ្យ ហើយធ្វើតេស្តឈាមដើម្បីរកជំងឺគ្រុនឈាម ។
នាយកមន្ទីរពេទ្យកុមារជាតិ លោកវេជ្ជបណ្ឌិត ញឹប អង្គារបុស្ស ពន្យល់ថា ការធ្វើរោគវិនិច្ឆ័យបានលឿន និងការព្យាបាលត្រឹមត្រូវ ត្រឹមតែរយៈពេល ៧-៨ ថ្ងៃ ក្មេងដែលកើតជំងឺគ្រុនឈាម សឹងតែ ១០០ នាក់ ជាទាំង ១០០ នាក់ ឯអត្រាស្លាប់មិនដល់ ១ នាក់ផង។ ចំណែកឯមូលហេតុដែលក្មេងកើតជំងឺគ្រុនឈាមឈានទៅគ្រោះថ្នាក់ដល់ជីវិតនោះ បណ្តាលមកពីការបញ្ជូនកូនមកពេទ្យយឺតយ៉ាវ ឬព្យាបាលមិនត្រឹមត្រូវតាមក្បូនពេទ្យ និងប្រើថ្នាំផ្សំផ្តេសផ្តាស។
១- រោគសញ្ញាជំងឺគ្រុនឈាម
– ក្តៅខ្លួនពី ៣៩-៤០ អង្សារសេ
– មុខក្រហម
– ឈឺក្បាល ឈឺប្រឡង់ភ្នែកចាក់ទៅក្រោយ
– ចង់ក្អួត ឬក្អួត
– ឈឺពោះ
– ឈឺសាច់ដុំ និងសន្លាក់ដៃជើង
– មានស្នាមអុចៗក្រហមលើស្បែក
– ហូរឈាមតាមអញ្ចាញធ្មេញជាដើម។
២- វិធីបង្ការជំងឺគ្រុនឈាម
– បំបាត់ជម្រកមូសខ្លា នៅតាមសំបកកង់ឡាន-ម៉ូតូ និងកំប៉ុងចាស់ៗ
– កម្ចាត់ដង្កូវទឹកនៅក្នុងពាង អាង ថូផ្កា ថ្លុក ឬវត្ថុដក់ទឹកផ្សេងទៀត
– គ្របពាង ឬអាងទឹកឲ្យជិត
– ដាក់ថ្នាំអាបែតសម្លាប់ដង្កូវទឹក ឬចិញ្ចឹមកូនត្រី ៧ ពណ៌
– គ្រប់គ្រង កប់ ឬកម្ទេច វត្ថុដែលអាចដក់ទឹក បង្កើតជាជម្រកមូសខ្លា
– គេងក្នុងមុង
– ពាក់ខោអាវជិតៗ មានពណ៌ចាំងៗ
– លាបក្រែម ឬបាញ់ស្ព្រៃយ៍ការពារមូសខាំពេលចេញទៅកន្លែងងងឹត។
ករណីគ្រុនឈាមនៅទូទាំងប្រទេសក្នុងដើមឆ្នាំ ២០១៩ នេះ មានការកើនឡើងជាងឆ្នាំ ២០១៨ កន្លងទៅបើប្រៀបធៀបនឹងពេលវេលាដូចគ្នា។ ការកើននៃជំងឺគ្រុនឈាមនេះ លោកនាយកមន្ទីរពេទ្យកុមារជាតិ បញ្ជាក់ថា ដោយសារតែឆ្នាំ២០១៩ នេះជាខួបរបស់ជំងឺគ្រុនឈាម ដែលតែងតែផ្ទុះនៅរៀងរាល់ ៣ ឬ ៥ ឆ្នាំម្តង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]