ព័ត៌មានលម្អិតបង្ហាញពីល្បិចរបស់បុរសជនជាតិស្បែកខ្មៅ និងស្រីស្នេហ៍ បង្កើត Facebook ក្លែងក្លាយបោកប្រាស់ប្រជាពលរដ្ឋ, ឧត្តមសេនីយ៍ឯក រ័ត្ន ស្រ៊ាង អំពាវនាវដល់មហាជន សូមកុំមានចិត្តលោភលន់ (Video inside)

(ភ្នំពេញ)៖ អាវុធហត្ថរាជធានីភ្នំពេញ បានបញ្ជូនជនជាតិស្បែកខ្មៅម្នាក់ រួមជាមួយស្រីស្នេហ៍ ជាជនជាតិខ្មែរ ទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ ពាក់ព័ន្ធករណីឆបោកតាមរយៈការទំនាក់ទំនង ក្នុងបណ្តាញសង្គមហ្វេសប៊ុក កាលពីថ្ងៃទី១៥ ខែមិថុនា ឆ្នាំ២០១៩។

ជនសង្ស័យឈ្មោះ NWOSU MARTINS អាយុ៣១ឆ្នាំ ជនជាតិអាហ្រ្វិកខាងត្បូង និង ស្រីស្នេហ៍ឈ្មោះ កាន ឡានីន ហៅស្រីអូន អាយុ៣៥ឆ្នាំ ជនជាតិខ្មែរ បានបង្កើតអាខោន ហ្វេសប៊ុកក្លែងបន្លំ ទំនាក់ទំនងមកជនរងគ្រោះឲ្យទុកចិត្តនិងសន្យា ផ្ញើលុយមកជនរងគ្រោះ បន្ទាប់មកប្រើល្បិចឲ្យជនរងគ្រោះចេញថ្លៃសេវានិងពន្ធផ្សេងៗ ដោយផ្ញើតាមវីងជាបន្តបន្ទាប់ចំនួន០៣លើក (លើកទី១ចំនួន ៥៥០$, លើកទី២ចំនួន ៥,៣០០$ និងលើកទី៣ចំនួន ៤,៧០០$ )។

ដោយមានការសង្ស័យ ជនរងគ្រោះក៏បានដាក់ពាក្យបណ្តឹងដល់សមត្ថកិច្ចអាវុធហត្ថរាជធានីភ្នំពេញ។ ក្រោយពេលទទួលពាក្យបណ្តឹង កម្លាំងជំនាញនៃការិយាល័យ បទល្មើសព្រហ្មទណ្ឌ អាវុធហត្ថរាជធានីភ្នំពេញ បានធ្វើការស្រាវជ្រាវយ៉ាងយកចិត្តទុកដាក់ រហូតឈានទៅកំណត់មុខសញ្ញា និងធ្វើការឃាត់ខ្លួន ជនសង្ស័យបានជាក់ស្តែង នៅថ្ងៃទី១១ ខែមិថុនា ឆ្នាំ២០១៩ ព្រមទាំងបានស្រាវជ្រាវឃើញថា ជនសង្ស័យខាងលើ គឺធ្លាប់បានប្រើល្បិចបោកប្រាស់ជនរងគ្រោះអស់ជាច្រើនរយនាក់ផងដែរ។

ជាមួយករណីខាងលើនេះ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថ រាជធានីភ្នំពេញ បានលើកឡើងថា គេអាចបោកយើងបាននៅពេលណាដែល យើងមានចិត្ត លោភលន់ក្នុងខ្លួន ដូច្នេះលោកសូមយកមេរៀននេះ អំពាវនាវដល់បងប្អូនប្រជាពលរដ្ឋ សូមមេត្តាមានការប្រុងប្រយ័ត្នឲ្យបានខ្ពស់។ កុំមានចិត្តលោភលន់ កុំត្រេកត្រអាលជាមួយរង្វាន់ ឬអំណោយដែលគ្មានប្រភព គ្មានប្រវត្តច្បាស់លាស់ និងត្រូវចងចាំថាគ្មានអ្វី បានមកដោយងាយស្រួល ដោយយើងមិនបានប្រឹងប្រែងចំណាយកម្លាំងញើសឈាមរកវានោះទេ និងសូមពិចារណាឲ្យបានហ្មត់ចត់ មុនជឿទៅលើអ្វីមួយ ជៀសវាងចាញ់បោក ចាញ់ការលួងលោមរបស់ជនជនបោកប្រាស់ទាំងឡាយ៕

ចង់ជ្រាបកាន់តែច្បាស់សូមទស្សនាវីដេអូខាងក្រោម៖

ប្រភព៖ freshnews