ខេត្តបន្ទាយមានជ័យ ៖ សត្វទុង និងសត្វត្រដក់ សរុបចំនួន៣ក្បាល ជាប្រភេទសត្វដែលកំពុងរងការវិនាស ផុតពូជដោយក្រុមព្រានព្រៃលបលួចបរបាញ់ជាអាហារ ត្រូវបានមន្ត្រីឧទ្យានុរក្ស និងអង្គការអភិរក្សសត្វព្រៃ ដែលមានឈ្មោះ WCS និងអង្គការ ACCB នៅព្រឹកថ្ងៃទី១៤ ខែមិថុនា ឆ្នាំ២០១៩នេះ យកកមកលែងនៅ ឧទ្យានតំបន់ការពារទេសភាពអាងទឹកត្រពាំងថ្ម ស្ថិតក្នុងភូមិត្រពាំងថ្មកណ្តាល ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ដើម្បីការពារអភិរក្សឱ្យបានគង់វង្ស។
សត្វទាំង៣ក្បាលនោះមានសត្វទុង១ក្បាល និងសត្វត្រដក់តូច២ក្បាល។ លោក យឹម លី ប្រធានមន្ទីរបរិស្ថានខេត្តបន្ទាយមានជ័យ បានប្រាប់ឱ្យដឹងថា៖ សត្វទាំង៣ក្បាលខាងលើត្រូវបានអង្គការអភិរក្សសត្វព្រៃឈ្មោះ WCS និងអង្គការ ACCB យកមកពីខេត្តសៀមរាប ហើយលែងនៅតំបន់ការពារអភិរក្សក្នុងឧទ្យានតំបន់ការពារទេសភាពអាងទឹកត្រពាំងថ្ម។ អង្គការទាំង២នេះ កន្លងមកក៏បានយកសត្វត្រដក់២ក្បាលមកប្រលែងនៅទីនេះផងដែរ ដើម្បីរក្សាការពារបញ្ចៀស ពីការបរបាញ់ពីសំណាក់ព្រានព្រៃ។
លោកប្រធានមន្ទីរបរិស្ថានខេត្តបន្ទាយមានជ័យប្រាប់ឱ្យដឹងទៀតថា៖ ប្រភេទសត្វទុង,ក្រៀល,ក្រសា,ត្រដក់ ជាពពួកសត្វត្រូវបានក្រសួងបរិស្ថានការពារអភិរក្ស ដើម្បីទុកសម្រាប់បម្រើលើវិស័យទេសចរណ៍។ ពពួកសត្វទាំងនេះភាគច្រើនរស់នៅក្នុងតំបន់ព្រៃរនាម និងនៅតាម ស្ទឹង បឹង ទន្លេ ហើយវាស៊ីត្រីជាអាហារ។
ពពួកសត្វទាំងនោះ នៅខេត្តបន្ទាយមានជ័យ មាន៣កន្លែងសម្រាប់ការពារអភរិក្ស និងកន្លងមកមន្ត្រីបរិស្ថានក៏បានសហការជាមួយនឹងអាជ្ញាធរមូលដ្ឋាន បានយកចិត្តទុកដាក់ផ្សព្វផ្សាយទៅដល់ប្រជាពលរដ្ឋឱ្យចូលរួមថែរក្សាការពារ និងអប់រំហាមឃាត់មិនឱ្យ នាំគ្នាបរបាញ់សត្វទាំងនោះឡើយ។
ពីព្រោះសត្វទាំងនោះកំពុងរងការវិនាសផុតពូជ បើសិនគ្មានវិធានការ ការពារទប់ស្កាត់ឱ្យមានប្រសិទ្ធភាពទេនោះ។ ប្រធានមន្ទីរបរិស្ថានខេត្តបន្ទាយមានជ័យ លោក យឹម លី បញ្ជាក់ឱ្យដឹងទៀតថា៖ កិច្ចការងារការពារអភិរក្សពពួកសត្វស្លាប មានសត្វទុង,ក្រៀល,ក្រសា,ត្រដក់, កាលពីកន្លងទៅនេះមន្ត្រីឧទ្យានុរក្សតំបន់ការពារទេសភាពអាងទឹកត្រពាំងថ្មបានចុះល្បាតចំណុចត្រពាំងតាមុក និងធ្លាប់បានជួបប្រទះជនខិលខូចប្រព្រឹត្តបទល្មើសដើរឆ្លុះសត្វ និងបានឃាត់ខ្លួន៦នាក់យកមកអប់រំធ្វើកិច្ចសន្យា បញ្ឈប់សកម្មភាពបរបាញ់សត្វព្រៃក្នុងតំបន់អភិរក្សនេះនិងដកហូតកាំភ្លើងខ្យល់៥ដើមផងដែរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]