គ្នាយើងស្គាល់ប្រេងអូលីវអត់? ទោះខ្លះមិនស្គាល់ ក៏ធ្លាប់ឮពីអត្ថប្រយោជន៍ប្រេងរុក្ខជាតិប្រភេទខ្លះៗដែរ។ គ្រាន់ស្តាប់ឈ្មោះ ដឹងថាផលិតផលបរទេសហើយ ប៉ុន្តែសម័យនេះប្រេងអូលីវនៅស្រុកខ្មែរក៏សម្បូរដែរ ហាងទំនិញល្មមៗ មិនបាច់ផ្សារទំនើបក៏មានលក់ អ៊ីចឹងនាំគ្នាងាកមកប្រើប្រេងប្រភេទនេះម្តងមើល៍ “Hello គ្រូពេទ្យ” នឹងប្រាប់ពីអត្ថប្រយោជន៍ប្រេងរុក្ខជាតិប្រភេទនេះ ឲ្យបានដឹងទាំងអស់គ្នា។
១- អ្វីទៅជាប្រេងអូលីវ?
អូលីវ ជាប្រេងចម្រាញ់ពីផ្លែអូលីវ អាចយកទៅចម្អិនម្ហូប ប្រើជាគ្រឿងសម្អាង និងឱសថរុក្ខជាតិក៏បាន។ គេក៏អាចយកទៅប្រើជាប្រេងឥន្ធនៈ ឬដុតចង្កៀងបានទៀតផង ខណៈប្រេងអូលីវមានទម្រង់ដូចខាងក្រោម៖
– Virgin olive oil៖ ជាប្រេងមានជាតិអាស៊ីដតិច ហើយប្រើដើម្បីចម្អិនអាហារ។
– Extra virgin olive oil៖ មានជាតិអាស៊ីដកាន់តែតិច ហើយគេចម្រាញ់ដោយកិនផ្លែអូលីវស្រស់តែម្តង។
– Pure olive oil៖ មានកម្រិតអាស៊ីដខ្ពស់ ផលិតយកប្រេងចម្រាញ់រួច លាយជាមួយVirgin oil។
– Lampante oil៖ ជាពពួកប្រេងឥន្ធនៈ មិនអាចយកទៅចម្អិនម្ហូបបានទេ។
២- គុណប្រយោជន៍ប្រេងអូលីវចំពោះសុខភាព
ប្រេងអូលីវ ពពួលប្រើចម្អិនម្ហូប និងប្រើជាឱសថរុក្ខជាតិ គឺមានប្រយោជន៍ច្រើនចំពោះសុខភាពដូចជា៖
– សុខភាពបេះដូង៖ ដោយសារមានសារធាតុខ្លាញ់មិនឆ្អែត (Monounsaturated Fatty Acid) ប្រមាណ ៧០% អាចជួយបន្ថយជាតិកូលេស្តេរ៉ូលក្នុងឈាម ជួយកាត់បន្ថយការប្រឈមជំងឺបេះដូងបាន។ មិនត្រឹមតែប៉ុណ្ណោះ ប្រេងអូលីវ ក៏ជួយបង្កើនកូលេស្តេរ៉ូលល្អ(HDL) ថែមទៀតផង។ រដ្ឋបាលចំណីអាហារ និងឱសថអាមេរិក FDA បានណែនាំឲ្យញ៉ាំប្រេងអូលីវ ត្រឹម ២ ស្លាបព្រាបាយ អាចជួយជាប្រយោជន៍ដល់សុខភាពបេះដូងបានច្រើន។
– ស្រកទម្ងន់៖ ដោយសារសម្បូរទៅដោយខ្លាញ់មិនឆ្អែត វានឹងមិនធ្វើឲ្យយើងឡើងទម្ងន់ឡើយ ហើយមានការសិក្សាគាំទ្រអំណះអំណាងនេះ ដោយបង្ហាញថា ប្រេងអូលីវ នៅតំបន់មេឌីទែរ៉ាណេ ពិតជាជួយសម្រកទម្ងន់បានមែន។
– ធ្វើមេតាបូលីស៖ ប្រេងអូលីវ ជួយបង្កើនកម្រិតមេតាបូលីស ការលូតលាស់ឆ្អឹង និងខួរក្បាលបានល្អ។ លើសពីនេះ ក៏មានវីតាមីន E ដែលជាសារធាតុប្រឆាំងអុកស៊ីតកម្មដ៏សំខាន់ សម្រាប់រាងកាយទៀតផង ហេតុនេះ ប្រេងអូលីវ ល្អសម្រាប់ទាំងក្មេង ទាំងចាស់។
– ប្រព័ន្ធរំលាយអាហារ៖ ក្នុងវិស័យវេជ្ជសាស្រ្ត ប្រេងអូលីវ ត្រូវបានគេប្រើដើម្បីសម្អាតពោះវៀន និងជួយឲ្យពោះវៀនដើរស្រួល។
– ការពារភាពចាស់៖ ដោយសារផ្ទុកពេញដោយសារធាតុប្រឆាំងអុកស៊ីតកម្ម ប្រេងអូលីវ អាចជួយយើងរក្សាវ័យនៅក្មេងកាន់យូរអង្វែង។ ក្នុងគ្រឿងសំអាង ប្រេងអូលីវ ត្រូវបានគេស្គាល់ថា មានមុខងារប្រឆាំងភាពចាស់ ហើយគ្នាយើងប្រើប្រេងនេះ អាចធ្វើឲ្យស្បែកស្អាតភ្លឺថ្លា។
– ការពារក្រួសក្នុងថង់ទឹកប្រមាត់៖ ប្រេងអូលីវ អាចការពារកុំក្រួសក្នុងតម្រងនោម បង្កើតជារូបរាងនិងបង្កបញ្ហាចំពោះសុខភាពយើង។
– ជួយដល់ជញ្ជាំងកោសិកា៖ សារធាតុ Polyphenol ក្នុងប្រេងអូលីវ ជួយឲ្យជញ្ជាំងកោសិការឹងមាំ និងមានសុខភាពល្អ។ ប្រេងនេះ ក៏មានមុខងារ អាចជួយឲ្យជញ្ជាំងសរសៃអាក់ទែ មានភាពយឺត និងជួយយើងចៀសផុតពីហានិភ័យបញ្ហាបេះដូងជាច្រើន។
– ការពារជំងឺមហារីក៖ ប្រេងអូលីវ ត្រូវគេជឿថា មានសមត្ថភាពប្រឆាំងការរីកលូតលាស់នៃកោសិកាមហារីកបាន។ តាមការសិក្សាជាច្រើនបង្ហាញថា ប្រេងអូលីវ មានជាតិអាស៊ីដ អាចការពារចាប់តាំងពីដំណាក់កាលដំបូងនៃមហារីករន្ធគូទ (Rectum Cancer) និងមហារីកពោះវៀនបាន។ ការសិក្សាមួយទៀតយល់ថា ដោយសារប្រេងមានសារធាតុ Hydroxytyrosol ទើបធ្វើឲ្យស្រីៗអស់រដូវ ការពារខ្លួនពីជំងឺមហារីកសុដន់ទៀតផង។
– ការពារកុំឲ្យលើសឈាម៖ យោងតាមការសិក្សាថ្មីៗនេះ របបអាហារសម្បូរជាតិ នីទ្រីត នីត្រាត (រកឃើញភាគច្រើនក្នុងបន្លែបៃតង) និងជាតិខ្លាញ់មិនឆ្អែត (ឃើញក្នុងប្រេងអូលីវ) អាចធ្វើឲ្យថយចុះហានិភ័យជំងឺលើសឈាម។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
