Felix និយាយពី សៀង ចន្ធា និងតបទៅអ្នករិះគន់បែបណា ក្រោយឈ្នះប៉ាគីស្ថាន?

ភ្នំពេញ៖ ក្រុមជម្រើសជាតិកម្ពុជា បានប្រកួតឈ្នះក្រុមជម្រើសជាតិប៉ាគីស្ថាន ដោយលទ្ធផល ២-០ សម្រាប់ការប្រកួតជើងទី១ វគ្គជម្រុះ FIFA World Cup ២០២២ និង AFC Asian Cup ២០២៣ នៅមុខទស្សនិកជនរាប់ម៉ឺននាក់ នាពហុកីឡដ្ឋានជាតិអូឡាំពិកកាលពីម្សិលមិញនេះ។ គ្រាប់បាល់ទាំង២គ្រាប់របស់កម្ពុជា ធ្វើបានសម្រេចដោយកីឡាករយុវជនសាលាបាល់ទាត់ជាតិបាទី សៀង ចន្ធា និងមួយគ្រាប់ទៀតជាការធ្វើបានសម្រេចដោយកីឡាករចាស់វស្សា គួច សុកុម្ភៈ។ 

ដោយឡែក នៅក្នុងសន្និសីទកាសែតក្រោយការប្រកួត លោក Felix G.Dalmas បាននិយាយថា៖ “ខ្ញុំពិតជាសប្បាយចិត្តខ្លាំងចំពោះលទ្ធផលនេះ ហើយខ្ញុំសូមអរគុណយ៉ាងខ្លាំងចំពោះក្រុមការងារ កីឡាករ ព្រមទាំងអ្នកគាំទ្រទាំងអស់ដែលបានរួមគ្នា បង្កើតឱ្យមានលទ្ធផលដ៏ល្អនាថ្ងៃនេះ”។ ជាងនេះទៅទៀត លោក Felix បាននិយាយពីកីឡាករវ័យក្មេង សៀង ចន្ធា បែបនេះថា៖ “ពួកយើងបានធ្វើការជាមួយគ្នាជាយូរមកហើយ លើសពីនេះទៀតពួកយើងបានយល់ចិត្តគ្នាច្រើន ហើយចន្ធាបើទោះបីជាមានវ័យក្មេងមែន ប៉ុន្តែគាត់រៀបចំខ្លួនបានល្អ ទាំងផ្លូវកាយ និងផ្លូវចិត្ត បែបនេះទើបខ្ញុំចង់ឱ្យចន្ធាស្រេកឃ្លានការវិវឌ្ឍន៍ខ្លួនបន្ថែមទៀត សម្រាប់ពេលអនាគត”។

យ៉ាងណាមិញ ចំពោះការរិះគន់មុនការប្រកួតកន្លងមក លោក Felix G.Dalmas តបទៅកាន់ការរិះគន់នេះថា៖ “ខ្ញុំមិនមានអ្វីនិយាយឡើយចំពោះការរិះគន់ទាំងនេះ ប៉ុន្តែខ្ញុំនៅតែសូមអរគុណចំពោះការរិះគន់របស់អ្នកគាំទ្រទាំងអស់កន្លងមក ត្បិតថាអ្នកគាំទ្រទាំងអស់មានការរិះគន់ច្រើនទៅលើរឿងនេះ ដោយសារតែពួកគេមានការព្រួយបារម្ភ និងចង់ឱ្យក្រុមជម្រើសជាតិកម្ពុជាមានការរីកចម្រើន”៕