ខេត្តព្រះសីហនុ ៖ តាមសេចក្តីរាយការណ៍ឲ្យដឹងថា កាលពីព្រឹកថ្ងៃទី៦ ខែមិថុនា ឆ្នាំ២០១៩ នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានទទួលថវិកា ពីសប្បុរសជនប្រមាណជាង១ម៉ឺនដុល្លារអាមេរិក ជួយឧបត្ថមលើកទឹកចិត្តចំពោះកងកម្លាំងនគរបាលដែលខិតខំប្រឹងប្រែងស្រាវជ្រាវ និងឈានដល់ការបង្ក្រាបចាប់ខ្លួនជនជាឃាតកររំលោភហើយសម្លាប់ក្មេង ប្រុសស្រី២នាក់បងប្អូនកាលពីពេលកន្លងមក ។
សប្បុរសជនខាងលើរួមមាន ១-លោកឧកញ៉ា ទៀ វិចិត្រ ចំនួន៤០លានរៀល ២-លោក ឧកញ៉ា ឡាវ កាំង ចំនួន១ពាន់ដុល្លារ ៣-ឈ្មោះ អានីដួងចិត្ត ម្ចាស់ផ្ទះល្វែងបិតត្រាំង ចំនួន១ពាន់ដុល្លារដុល្លារអាមេរិក ៤-លោក ស្រី សៀ ម៉ាលីន ចំនួន១លានរៀល និង៥-លោក ហេង សុវណ្ណ ចំនួន១លានរៀល ។
ក្នុងនោះដែរសប្បុរសជនបានលើកឡើងថា ដើម្បីជាការលើកទឹកចិត្តដល់មន្ត្រីនគរបាលជាតិ ជំនាញព្រហ្មទណ្ឌក្រសួងមហាផ្ទៃ និងកម្លាំងជំនាញនៃស្នងការដ្ឋាននគរបាលខេត្តព្រះសីហនុ ព្រមទាំងស្នងការដ្ឋាននគបាលខេត្តព្រៃវែង ដែលមានស្នាដៃក្នុងការស្រាវជ្រាវបង្ក្រាបករណីឃាតកម្ម រំលោភសម្លាប់ក្មេងប្រុសស្រី២នាក់បងប្អូន នៅភូមិគគីរ ឃុំបិតត្រាំង ស្រុកព្រៃនប់ កាលពីថ្ងៃទី២៩ ឧសភា កន្លងទៅនេះ ។
លោកឧត្តមសេនីយ៍ទោ ជួន ណារិន្ទ ស្នងការ នគរបាលខេត្តព្រះសីហនុ បានមានប្រសាសន៍ថា លោកនឹងពាំនាំយកថវិការសប្បុរសធម៌ទាំងនេះ ទៅប្រគល់ជូនលោកឧត្តមសេនីយ៍ឯក ង៉េង ជួរ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃ ដើម្បីធ្វើ ការបែងចែក ចំពោះអង្គភាពជំនាញពាក់ព័ន្ធដែលរួមគ្នាសហការក្នុងការបង្ក្រាបករណីរំលោភសម្លាប់ ដោយទទួលបាននូវភាពជោគជ័យ១០០% នេះ ។
លោកស្នងការ ជួន ណារិន្ទ បានសង្កត់ធ្ងន់ថា ក្នុងនាមជាស្នងការនៃស្នងការដ្ឋាននគរបាលខេត្តព្រះសីហនុផ្ទាល់ សូមថ្លែងអំណរអរគុណចំពោះលោកឧកញ៉ា លោកជំទាវ លោក លោកស្រី ដែលមានសន្តានចិត្តចូលរួមចំណែកជួយដល់កងកំលាំងនគរបាលជាតិជា ពិសេសកំលាំងនគរបាលដែលបំពេញភារកិច្ច ជូនជាតិ និងប្រជាពលរដ្ឋ។
លោកស្នងការក៏បានជូនពរដល់លោកឧកញ៉ា លោកជំទាវ លោក លោកស្រី ដែលជាសប្បុរសជន សូមឱ្យមានសុខភាពល្អ មាំមួន និងជួបប្រទះតែសេចក្តីសុខ និងជោគជ័យក្នុងការប្រកបមុខរបរផ្សេងៗមានការរីកចំរើនទៅមុខជានិច្ច៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]