ចប់សព្វគ្រប់! ពេលនេះរឿងក្តីក្តាំរំលោភសេពសន្ថវៈរបស់ Ronaldo ត្រូវបានបិទចោល

អាមេរិក៖ រឿងរ៉ាវចោទប្រកាន់អំពីករណីរំលោភសេពសន្ថវៈ ដែលពាក់ព័ន្ធជាមួយកីឡាករ Cristiano Ronaldo ត្រូវបានសម្រេចបិទសំណុំរឿងចោលដោយស្ងៀមស្ងាត់។ គួរបញ្ជាក់ឱ្យដឹងថា នាង Kathryn Mayorga បច្ចុប្បន្នមានអាយុ ៣៤ឆ្នាំ បានអះអាងថាកីឡាករ Ronaldo បានបំពានមកលើនាង កាលពីអំឡុងឆ្នាំ ២០០៩ នៅឯសណ្ឋាគារមួយនៅទីក្រុង Las Vegas។ នាងបានឱ្យដឹងទៀតថា ក្រោយពេលកើតហេតុ នាងត្រូវបានមេធាវីរបស់ Ronaldo បង្ខំឱ្យចុះហត្ថលេខាលើកិច្ចព្រមព្រៀងមួយដែលមិនបានបញ្ចេញឱ្យឃើញ។

ប៉ុន្តែយ៉ាងណាក្តី ក្រោយមករឿងរ៉ាវនេះមិនបានចប់ឡើយ ដោយនាង Mayorga បានធ្វើការប្តឹងប្តល់ ហើយតុលាការទីក្រុង Las Vegas ក៏បានដំណើរការសំណុំរឿងនេះកាលពីឆ្នាំមុន។ យ៉ាងណាមិញ បើតាម Bloomberg បានឱ្យដឹងថា កាលពីខែមុន មេធាវីរបស់នាង Mayorga បានដកពាក្យបណ្តឹងវិញដោយស្ម័គ្រចិត្ត ដោយមិនបានបកស្រាយពីមូលហេតុឡើយ។ យ៉ាងណាក្តី Ronaldo បានចេញមុខបដិសេធដាច់ខាតចំពោះការចោទប្រកាន់ខាងលើនេះ។

យ៉ាងណាមិញ បណ្តាសារព័ត៌មានល្បីជាច្រើនមានចម្ងល់ថា តើភាគីទាំងពីរយល់ព្រមគ្នាដោយរបៀបណា ទើបរឿងរ៉ាវក្តីក្តាំធំមួយអាចបញ្ចប់ទៅដោយស្ងាត់ៗបែបនេះ??