ជំងឺបេះដូង ជាឃាតករសាហាវបំផុតសម្លាប់មនុស្សជាច្រើនរៀងរាល់ឆ្នាំ ហើយពេលណាគ្នាយើង ឬចាស់ៗកើតជំងឺនេះ មិនត្រឹមតែមានសុខភាពទន់ខ្សោយទេ តែត្រូវចំណាយលុយកាក់ច្រើនសន្ធឹកសន្ធាប់ ទៅទិញថ្នាំគ្រប់គ្រងជំងឺ ព្រោះថ្នាំសម្រាប់ជំងឺប្រភេទនេះមានតម្លៃខ្ពស់ខ្លាំងណាស់។ បើពិបាកយ៉ាងនេះ ហេតុអីមិននាំគ្នាបង្ការកុំឲ្យកើតមានជំងឺនេះទៅ? អត្ថបទ “Hello គ្រូពេទ្យ” នឹងប្រាប់ពីអាហារបំប៉នមួយចំនួនមានប្រយោជន៍ខ្លាំង តម្លៃក៏មិនថ្លៃ អាចជួយការពារជំងឺកាចសាហាវជាច្រើន ពិសេសជួយឲ្យបេះដូងមានសុខភាពល្អតែម្តង។
១- ជាតិសរសៃ និងជាតិខ្លាញ់ (Sterol)
– អាហារសម្បូរជាតិសរសៃ (Fiber)៖ ជាអាហារដ៏ល្អសម្រាប់សុខភាពទូទៅ សម្បូរក្នុងគ្រាប់ធញ្ញជាតិ បន្លែ និងផ្លែឈើ ជួយបន្ថយកម្រិត កូលេស្តេរ៉ូល ពីអាហារដែលយើងញ៉ាំ។ គួរញ៉ាំជាតិសរសៃ យ៉ាងតិច ២៥-៣០ ក្រាមក្នុងមួយថ្ងៃ ហើយសម្រាប់ប្រុសៗអាយុ ៥០ឆ្នាំ គួរញ៉ាំឲ្យបាន ៣៨ ក្រាមក្នុងមួយថ្ងៃ។
យើងអាចទទួលបានសារធាតុនេះពីអាហារ និងថ្នាំបំប៉ន ព្រោះសារជាតិ Blond Psyllium Husk ដែលជាទម្រង់មួយនៃជាតិសរសៃ មានក្នុងថ្នាំបំប៉ន ផ្តល់ប្រយោជន៍កាត់បន្ថយខ្លាញ់អាក្រក់ LDL និងបង្កើនខ្លាញ់ល្អ HDL ក្នុងសរសៃឈាម។ មានថ្នាំបំប៉នផ្សេងទៀតមានផ្ទុក ជាតិសរសៃ ដូចជា Wheat Dextrin, Methylcellulose, Polycarbophil និងកាល់ស្យូម ជាដើម។
ចាំថា ពេលលេបថ្នាំបំប៉នមានជាតិសរសៃ សូមកុំលេបញឹកពេក ព្រោះបើលេបលើសកម្រិតធ្វើឲ្យដើរខ្យល់ច្រើន និងរមួលសាច់ដុំ។ សូមបង្កើនកម្រិតបន្តិចម្តងៗ និងផឹកទឹកឲ្យបានច្រើនពេលលេបថ្នាំ។
– ជាតិខ្លាញ់ Sterols និង Stanols៖ សារជាតិទាំង ២ ទទួលបានពីការញ៉ាំគ្រាប់ធញ្ញជាតិ និងផ្លែឈើ តែប្រើថ្នាំជំនួយសុខភាពក៏ជាជម្រើសល្អដូចគ្នា អាចកាត់បន្ថយ កូលេស្តេរ៉ុល ពីអាហារយើងញ៉ាំ នឹងបំពេញតម្រូវការបេះដូង។
Sterols និង Stanols មានក្នុងអាហារជាច្រើន ដូចជា ទឹកក្រូច ប័រផលិតពីប្រេងរុក្ខជាតិ ទឹកដោះគោជូរ ជាដើម។ គ្រាន់តែញ៉ាំឲ្យបាន ២ ក្រាមក្នុងមួយថ្ងៃ អាចធ្វើឲ្យខ្លាញ់អាក្រក់ LDL ធា្លក់ចុះក្នុងកម្រិតទាប។
២- សារធាតុ Lycopene
Lycopene ជាសារធាតុជំនួយសុខភាព មានក្នុងបន្លែ ផ្លែឈើ ជាពិសេសផ្លែប៉េងប៉ោះតែម្តង សម្បូរសារជាតិប្រឆាំងអុកស៊ីតកម្ម ហើយពេលសារធាតុ Lycopene ក្នុងសរសៃឈាមមានច្រើន នាំឲ្យកាត់បន្ថយកត្តាប្រឈមជំងឺបេះដូង ខណៈប្រុសៗ មានសារធាតុនេះទាបប្រឈមជំងឺដាច់សរសៃឈាមខួរក្បាល (Stroke) និងជំងឺសរសៃឈាមបេះដូង ជាងគ្នាយើងមានសារធាតុនេះខ្ពស់ ដល់ទៅ ៣ ដង។ មួយទៀតបើជាតិ Lycopene ទាបនាំឲ្យមានកំណកខ្លាញ់តាមជញ្ជាំងសរសៃឈាម ធ្វើឲ្យសរសៃឈាមឡើងក្រាស់ និងរឹង។
៣- អាស៊ីដអូមេហ្គា ៣
ជាប្រភេទអាស៊ីដ ផ្តល់ប្រយោជន៍ខ្ពស់សម្រាប់សុខភាព សម្បូរក្នុងគ្រាប់ Walnuts គ្រាប់ពូជច្នៃ និងសាច់ត្រីតំបន់ត្រជាក់ ដូចជា ត្រីធូណា ត្រីសាល់ម៉ុន ជាដើម។ អ្នកវិទ្យាសាស្ត្រ បានធ្វើការពិសោធន៍ខ្លាញ់ត្រីជាច្រើនឆ្នាំ បង្ហាញថា អាចកាត់បន្ថយការប្រឈមជំងឺគាំងបេះដូង និងដាច់សរសៃឈាមខួរក្បាល (Stroke) ជួយសម្រួលកម្រិត អាំងស៊ុយលីន ទៀតផង។ មុខងារសំខាន់មួយទៀតរបស់អាស៊ីដអូមេហ្គា ៣ គឺប្រឆាំងការរលាក ព្រោះករណីរលាកអាចបង្កឲ្យជំងឺបេះដូងកាន់តែធ្ងន់ធ្ងរ ជាប់ទាក់ទងកង្វះអាស៊ីដអូមេហ្គា ៣ ក្នុងខ្លួន។ ត្រូវចាំថាថ្នាំបំប៉នសុខភាព មានអាស៊ីដអូមេហ្គា ៣ មានប្រយោជន៍ ចំពោះគ្នាយើងទាំងពេញវ័យ និងអូនៗតូចៗ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
