កូនខ្លះស្រួល បៅដោះម៉ាក់ៗសុខភាពស្រាប់តែទៅចាប់ចិត្តក្បាលកំប៉ុងទឹកដោះគោ ប៉ុន្តែកូនខ្លះយ៉ាប់នោះយ៉ាប់ អង្កៀមម៉ាក់ៗរាប់ឆ្នាំមិនព្រមឈប់មឹមៗទៀត បទពិសោធនេះ ពិតជាគួរឲ្យធុញទ្រាន់ណាស់ ត្រូវអត់គ្នាយើង? អ៊ីចឹង “Hello គ្រូពេទ្យ” នឹងណែនាំវិធីផ្តាច់ដោះកូន គួរផ្តាច់ពេលណាស់ទើបល្អ ហើយផ្តាច់របៀបម៉េច។
១- ដំណើរការផ្ដាច់ដោះ
ការផ្ដាច់ដោះ ជាដំណើរធម្មជាតិកើតឡើងនៅពេលអូនៗចាប់ផ្ដើមចេះញ៉ាំអាហារបន្ថែមក្រៅពីទឹកដោះម្ដាយ ដូចជាទឹក អាហាររឹង និងប្រភពអាហារពីទឹកដោះគោ និងទឹកផ្លែឈើ។ ទោះបីយ៉ាងនេះក្តី បើទឹកដោះម្ដាយកាន់តែតិចទៅៗ អូនៗក៏មិនអាចបន្តបៅបានទៀតដែរ។ ប្រភពអាហារូបត្ថម្ភសម្រាប់ក្មេង មានប្រភេទអាហារ និងប្រភេទភេសជ្ជៈ អាចជ្រើសរើសបានដើម្បីជួយបំប៉នកូនយើងឲ្យមានសុខភាពល្អ។
២- ពេលវេលាល្អបំផុតដើម្បីផ្ដាច់ដោះ
អ្នកជំនាញ បានណែនាំឲ្យបំបៅដោះកូនយ៉ាងហោចណាស់រយៈពេល ៦ខែ បន្ទាប់ពីសម្រាល និងការបំបៅរួមជាមួយអាហារ រហូតដល់យ៉ាងហោចណាស់អាយុ ១ ខួប ឬលើសពីនេះ អាស្រ័យលើការសម្រេចចិត្ត។ ចាំថាការផ្ដាច់ដោះ ជាបញ្ហាផ្ទាល់ខ្លួន មិនមែនត្រូវការអ្នកដទៃចូលរួមសម្រេចចិត្តទេ។ គ្នាយើង គួរពិចារណាឡើងវិញលើពេលវេលា យើងគិតថាសមស្របសម្រាប់ផ្ដាច់ដោះ ដូចជា មានផ្ទៃពោះជាថ្មី លែងមានទឹកដោះ ឬហេតុផលចាំបាច់ណាមួយ។
៣- វិធីសាស្ត្រផ្ដាច់ដោះ
– ដំណើរការសន្សឹមៗ៖ ផ្ដាច់ដោះត្រូវធ្វើសន្សឹមៗ និងមួយជំហានៗ ដើម្បីការពារកុំឲ្យដោះប្រែទៅជាឈឺចាប់ខ្លាំង នាំឲ្យរំខានអារម្មណ៍យើង និងដើម្បីទុកពេលកូនគ្រប់គ្រាន់ សម្របខ្លួនទៅនឹងការផ្លាស់ប្ដូរនេះ។ នៅសប្ដាហ៍ដំបូង ក្នុងផែនការផ្ដាច់ដោះ គ្នាយើងគួរផ្ដល់ទឹកដោះគោម្សៅឲ្យអូនៗបៅបានម្ដង/ថ្ងៃ ដើម្បីបំពេញអារម្មណ៍កូន។
– រកជំនួយ៖ គ្រប់គ្នាដឹងហើយ ពេលផ្ដាច់ដោះកូនតូចៗ មានអារម្មណ៍មិនស្រួលប៉ុន្មានឡើយ ហើយក៏មិនងាយស្រួលដែរសម្រាប់ម៉ាក់ៗ ទទួលភារកិច្ចនេះតែម្នាក់ឯង។ ហេតុនេះ អាចរកជំនួយពីប៉ាៗ ឬអ្នកថែទាំក្មេង មកជួយបញ្ចុកអាហារអំឡុងពេលញ៉ាំអាហារប្រចាំថ្ងៃ។
– ព្យាយាមម្ដងហើយម្តងទៀត៖ មានមូលហេតុជាច្រើន អូនៗមានអារម្មណ៍មិនស្រួលអំឡុងពេលផ្លាស់ប្ដូរពីការបំបៅដោះ មកបៅទឹកដោះគោម្សៅ។ ក្មេងខ្លះមិនព្រមបៅក្បាលដបទេ ហេតុនេះ ព្យាយាមផ្លាស់ប្ដូរដប និងក្បាលដោះឲ្យបានញឹកញាប់ ព្រោះក្មេងតូចៗមួយចំនួនចូលចិត្តក្បាលដោះហូរលឿន ប៉ុន្តែមួយចំនួនទៀត ចូលចិត្តក្បាលដោះហូរសន្សឹមៗ។ មានកូនរឿងដ៏អស្ចារ្យបំផុតចំពោះក្នុងជីវិតគ្រួសារសម្រាប់មនុស្សគ្រប់គ្នា ហើយមានក្ដីរំភើបរីករាយបំផុតពេលឃើញអូនៗមានសុខភាពល្អ។
ក្នុងករណីមានសំណួរ ឬមន្ទិលសង្ស័យជុំវិញបញ្ហាសុខភាពអ្នក ជម្រើសល្អបំផុតសូមពិគ្រោះនិងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Groupមិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]