រាជធានីភ្នំពេញ ៖ រថយន្ដ RAV4 ពណ៌ខ្មៅ បើកបញ្ច្រាសទិសចរាចរណ៍ ហើយមិនខ្វល់ថា ប៉ះនរណាទេ បើទោះបីរថយន្ដកាមរីឆ្លាម ពណ៌ត្រីឆ្លូញ ខំប្រឹងគេចយ៉ាងណាក៏នៅតែប៉ះគ្នា បណ្ដាលឱ្យស្ទះចរាចរណ៍ទាំងកណ្ដាលអធ្រាត្រ។ ហេតុការណ៍ខាងលើកើតឡើងកាលពីវេលាម៉ោង១២និង១៥នាទីរំលងអធ្រាត្រ ឈានចូលថ្ងៃទី២០ មីនា នៅទល់មុខផ្សារស៊ីម៉លសូរិយា តាមវិថីប៉ាស្ទ័រ ក្នុងសង្កាត់ផ្សារថ្មីទី៣ ខណ្ឌដូនពេញ។
បើតាមសាក្សីនៅកន្លែងកើតហេតុបានឱ្យដឹងថា រថយន្ដ RAV4 ពណ៌ខ្មៅ បើកបរដោយបុរសម្នាក់ស្រវឹងស្រាបើកពីត្បូងទៅជើង តាមវិថីប៉ាស្ទ័រ ដោយបើកបញ្ច្រាសទិសដៅចរាចរណ៍ ចំណែករថយន្ដកាមរីឆ្លាម បើកពីជើងទៅត្បូង ខណៈទៅដល់ចំណុចកើតហេតុរថយន្ដកាមរីឆ្លាមខំប្រឹងបើកគេចដែរ តែរថយន្ដ RAV4 ដែលអ្នកបើកបរស្រវឹងហាក់បីដូចជាចង់បើកផ្លូវមួយតែម្នាក់ឯង ទើបធ្វើឱ្យរថយន្ដទាំងពីរគ្រឿងប៉ះគ្នាខូចខាតតិចតួច និងមិនបានរងរបួសទេ ។
ក្រោយពេលកើតហេតុបណ្ដាលឱ្យកកស្ទះចរាចរណ៍ទាំង យប់ ដោយសារជាតំបន់ទីប្រជុំជនមានភោជនីយដ្ឋាន និងផ្សារទំនើប។ ម្ចាស់រថយន្តទាំងពីរគ្រឿងក៏ជជែកគ្នាតឹងសរសៃ.ក ប៉ុន្ដែអ្វីដែលម្ចាស់រថយន្ដកាមរីឆ្លាមចង់បាននោះ គឺទាមទារត្រឹមតែពាក្យសុំទោសតែមួយម៉ាត់ពីភាគីរថយន្ដ RAV4 ប៉ុណ្ណោះ ។ ដើម្បីបញ្ចប់បញ្ហាអ្នកបើកបររថយន្ត RAV4 ក៏សុំទោសភាគីខាងរថយន្តកាមរីទៅ ៕
Bopha
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
