ដំឡូងជ្វាពណ៌ស្វាយ ដែលមានឈ្មោះវិទ្យាសាស្រ្ត Dioscorea Alata ក្នុងប្រភេទអម្បូរដំឡូងដែលប្រភពចេញពីតំបន់អាស៊ីអាគ្នេយ៍ ហើយយើងអាចងាយរកបាន នៅតាមផ្សារ ឬប្រទះតាមរទេះដែលគេអាំងឆ្អិនស្រាប់ដាក់លក់តាមផ្លូវ។ មិនត្រឹមតែមានរសជាតិឆ្ងាញ់ ដំឡូងជ្វាពណ៌ស្វាយ ដែលគេអាចហៅម្យ៉ាងទៀតថា ដំឡូងទឹកនោះ ផ្ទុកសារធាតុមានអត្ថប្រយោជន៍សម្រាប់សុខភាពច្រើននឹកស្មានមិនដល់៖
១- សម្បូរសារធាតុចិញ្ចឹម
ដំឡូងជ្វាពណ៌ស្វាយមួយដុំ ឬប្រហែល (១០០ក្រាម) ផ្តល់សារធាតុចិញ្ចឹមដល់រាងកាយដូចជា៖
- កាឡូរី ១៤០
- កាបូនអ៊ីដ្រាត ២៧ ក្រាម
- ប្រូតេអ៊ីន ១ ក្រាម
- ហ្វៃបឺរ ៤ក្រាម
- សូដ្យូម ០,៨៣%
- ប៉ូតាស្យូម ១៣,៥%
- កាល់ស្យូម ២%
- ជាតិដែក ៤ %
- វីតាមីន C ៤០%
- វីតាមីន A ៤%
ជាពិសេស ដំឡូងនេះសម្បូរដោយសារធាតុ Anthocyanins ដែលការសិក្សាបានបញ្ជាក់ថា វាជួយកាត់បន្ថយសម្ពាធឈាមខ្ពស់ក្នុងរាងកាយ បន្ថយហានិភ័យជំងឺហើមរលាក ប្រឆាំងមហារីក និងជំងឺទឹកនោមផ្អែមប្រភេទ២។
២- សម្បូរសារធាតុប្រឆាំងអុកស៊ីតកម្ម និងប្រឆាំងរោគមហារីក
ដំឡូងពណ៌ស្វាយ មានសារធាតុជួយកោសិការបស់រាងកាយឲ្យចាកឆ្ងាយពីការខូចខាត ដែលបង្កដោយម៉ូលេគុលម្យ៉ាងហៅថា រ៉ាឌីកាល់សេរី។ រ៉ាឌីកាល់សេរីនេះ មានជាប់ទាក់ទងនឹងរោគមហារីក និងជំងឺបេះដូង ទឹកនោមផ្អែម ព្រមទាំងជំងឺសរសៃប្រសាទ ហើយសារធាតុប្រឆាំងអុកស៊ីតកម្មមាននៅក្នុងដំឡូងជ្វាពណ៌ស្វាយ នឹងបង្ការពីជំងឺទាំងនេះ។
៣- មិនប៉ះពាល់សារធាតុស្ករក្នុងឈាម
ដំឡូងនេះមានអត្រា Glycemic (ចំណាត់ថ្នាក់កាបូនអ៊ីដ្រាត ពី ០ ទៅ១០០) ទាប ពោលគឺ ២៤ ដែលមានន័យថាកម្រិតនេះ មានធាតុកាបូនអ៊ីដ្រាតបំបែកជាស្ករយឺត ហើយមិនប៉ះពាល់កម្រិតគ្លុយកូស(ស្ករ)ក្នុងឈាម ហេតុនេះកាបូនអ៊ីដ្រាតពីដំឡូងនេះបម្លែងជាថាមពល ជាជាងជំរុញជាតិស្ករ។
៤- អាចបន្ថយហានិភ័យជំងឺហឺត
ការស្រាវជ្រាវប្រមាណ ៤០ ករណី បានរកឃើញថា អត្រាជំងឺហឺតកើតលើយុវជនច្រើន គឺជាប់ពាក់ព័ន្ធនឹងកង្វះវីតាមីន A និងវីតាមីន C។ រាងកាយស្រូបយកវីតាមីន A និងវីតាមីន C ច្រើន អាចកាត់បន្ថយហានិភ័យជំងឺហឺតបាន ហើយសារធាតុទាំងនេះសម្បូរនៅក្នុងដំឡូងជ្វាពណ៌ស្វាយ។
៥- ជួយប្រព័ន្ធរំលាយអាហារ
ដំឡូងសម្បកពណ៌ត្នោត សាច់ពណ៌ស្វាយដ៏ឈ្ងុយឆ្ងាញ់នេះ អាចជួយសម្រួលប្រព័ន្ធរំលាយអាហាររបស់យើងដើរស្រួលបាន។ នេះក៏ព្រោះតែដំឡូងទឹកនេះ មានធាតុកាបូនអ៊ីដ្រាតម្យ៉ាង ដែលជំរុញឲ្យមានបាក់តេរីល្អ ឈ្មោះ Bifido ដែលជួយបំបែកកាបូនអ៊ីដ្រាត និងសារធាតុហ្វៃបឺរ (សរសៃ) ជំរុញឲ្យដំណើរការរំលាយបានយ៉ាងល្អ។ ការសិក្សាមួយទៀត ក៏បានពិសោធបង្ហាញដែរថា ដំឡូងពណ៌ស្វាយមានសារធាតុប្រឆាំងនឹងដំណើររលាកនៃពោះវៀនធំផងដែរ៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
