កូរ៉េខាងត្បូង៖ មិនប៉ុន្មានខែចុងក្រោយនេះ បានលេចឮនូវព័ត៌មានចចាមអារ៉ាមខ្សឹបខ្សៀវជាច្រើន ពាក់ព័ន្ធទៅនឹងចំណងអាពាហ៍ពិពាហ៍ របស់កំពូលតារាសម្តែងប្រុសស្រីល្បីឈ្មោះ ប្រចាំប្រទេសកូរ៉េ គឺតារាសម្តែងស្រី Song Hye Kyo ដែលគ្រប់គ្នាស្គាល់ថា ហ៊ាន់ ជីអ៊ុន ជាមួយនឹងស្វាមីវ័យក្មេងជាងគឺតារាប្រុស Song Joong Ki ដោយបានលេចឮពាក្យចចាមអារ៉ាមកន្លងមកថា ចំណងអាពាហ៍ពិពាហ៍របស់អ្នកទាំងពីរ កំពុងតែមានការរង្គោះរង្គើ អាចនឹងឈានដល់ការលែងលះគ្នាថែមទៀតផង។
ប៉ុន្តែទោះជាយ៉ាងណា កាលពីថ្ងៃទី២៦ ខែឧសភាពម្សិលមិញនេះ ដោយសារតែក្រសែភ្នែកអ្នកគាំទ្រមានភាពរវាសស្ទាត់ជំនាញខ្លាំង ទើបពួកគេបានរកឃើញនូវភស្តុតាងមួយចំនួន ដែលអាចបញ្ជាក់បានថា ចំណងអាពាហ៍ពិពាហ៍របស់តារាសម្តែងមួយគូនេះ នៅតែមានភាពផ្អែមល្ហែមល្អូកល្អឺន មិនដូចព័ត៌មានដែលបានចុះផ្សាយកន្លងមកនោះទេ។
ជាការពិតណាស់ ដោយកាលពីម្សិលមិញនេះ តារាសម្តែងប្រុស Song Joong Ki បានទៅរៀនជិះសេះហាត់សមដើម្បីថតខ្សែភាពយន្តថ្មីរឿង «Asadal Chronicles» ដោយក្នុងនោះគេបានចាប់អារម្មណ៍ឃើញថា លោកបានពាក់នូវអាវដៃវែងធំរលុងពណ៌ក្រហម ដែលលើអាវនោះបានសរសេរថា៖ «Every Momment Is Special» ដែលអ្នកគាំទ្រចាំបានយ៉ាងច្បាស់ថា ជាអាវរបស់ភរិយាសំណព្វចិត្តរបស់លោក គឺអ្នកនាង Song Hye Kyo ដែលគេធ្លាប់ឃើញនាងពាក់សម្តែង នៅក្នុងខ្សែភាពយន្តរឿង « Encounter» ។
យ៉ាងណាមិញ នេះគឺជារឿងល្អមួយ ដែលធ្វើឲ្យអ្នកគាំទ្រក៏ដូចជាមហាជនទូទាំងប្រទេស ដែលស្រលាញ់គាំទ្រតារាសម្តែងគូស្វាមីភរិយាមួយគូនេះ សប្បាយចិត្តយ៉ាងខ្លាំង បន្ទាប់ពីឃើញអ្នកទាំងពីរមានសុភមង្គលបែបនេះផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]