បញ្ហានេះតែងកើតមានចំពោះស្រីៗគ្រប់រូប មិនថាម៉ាក់ៗថ្មីថ្មោង ឬធ្លាប់មានបេប៊ីពីមុនទេ។ រឿងមានទឹកដោះតិច ឬគិតខ្លួនឯងគ្មានទឹកដោះគ្រប់គ្រាន់ អាចដោយសារអារម្មណ៍ ឬបញ្ហាណាមួយ ប៉ុន្តែកុំទាន់សម្រេចចិត្តភ្លាម ជ្រើសម្សៅ៉ទឹកដោះគោបំបៅបេប៊ីអី ព្រោះទឹកដោះយើងមានសារៈសំខាន់ណាស់សម្រាប់ការលូតលាស់របស់បេប៊ី។ “Hello គ្រូពេទ្យ” នឹងប្រាប់មូលហេតុ ក៏ដូចជាវិធីជួយឲ្យមានទឹកដោះច្រើនឲ្យគ្នាយើងបានដឹង។
១- ហេតុអីបានជាគ្មានទឹកដោះគ្រប់គ្រាន់?
បញ្ហាបំបៅដោះ ម៉ាក់ៗគ្រប់រូបតែងជួបប្រទះនោះ គឺស្ថានភាពមួយធ្វើឲ្យយើងគិតថា ជឿថាខ្លួនឯងគ្មានទឹកដោះគ្រប់គ្រាន់សម្រាប់បំបៅបេប៊ី ខណៈការពិត ទឹកដោះយើងមានគ្រប់គ្រាន់សោះ។ រឿងនេះ អាចមកពីម៉ាក់ៗថ្មីថ្មោងមួយចំនួន ពុំទាន់មានជំនឿចិត្តគ្រប់គ្រាន់ក្នុងការបំបៅដោះកូនដោយផ្ទាល់។ លើសពីនេះ ម៉ាក់ៗភាគច្រើននៅមិនទាន់ឲ្យតម្លៃទឹកដោះខ្លួន ស្មើនឹងម្សៅទឹកដោះគោ បើទោះបីជាមានការអះអាង ណែនាំទឹកដោះម៉ាក់ៗ ជាសារជាតិចិញ្ចឹមល្អបំផុតសម្រាប់បេប៊ីក៏ដោយ។
គ្នាយើងមួយចំនួនតែងភ័ន្តច្រឡំរឿងទឹកដោះតិច ឬច្រើនដោយសម្គាល់សញ្ញាខុសៗគ្នា ប៉ុន្តែអ្វីគួរសម្គាល់នោះ ត្រូវផ្តោតលើការឡើងទម្ងន់របស់បេប៊ី ទើបត្រឹមត្រូវ។ បេប៊ីបៅដោះម៉ាក់ៗ មិនងាយធាត់ជ្រុល ដូចបេប៊ីបៅម្សៅទឹកដោះគោនោះទេ។ ជំនាញបានបញ្ជាក់ថា បេប៊ីអាចឡើងទម្ងន់ទ្វេរដងអំឡុងពេល ៥-៦ ខែប៉ុណ្ណោះ ហើយគុណនឹងបីនៅពេលអាយុ ១ ខួប។ ដើម្បីដឹងថា បេប៊ីទទួលទឹកដោះពីយើងគ្រប់គ្រាន់ ឬមិនគ្រប់គ្រាន់ គ្នាយើងអាចសម្គាល់រឿងនេះបានយ៉ាងងាយ តាមរយៈខោទឹកនោម ព្រោះបច្ចុប្បន្នក្មេងៗភាគច្រើនតែងប្រើខោទឹកនោមជាធម្យម ៤-៦ ខោ/មួយថ្ងៃ ខណៈលាមកមានពណ៌លឿងស្រាល កកៗ មានន័យថា បេប៊ីទទួលទឹកដោះមិនគ្រប់គ្រាន់ហើយ។ ក្រៅពីនេះ យើងក៏អាចតាមដានមើលស្បែក និងភ្នែកបេប៊ីបានដូចគ្នា។
២- ម៉ាក់ៗតែភ័ន្តច្រឡំខ្លួនឯងមានទឹកដោះតិច
កុំទាន់បារម្ភអី ទោះទឹកដោះមានតិច មិនគ្រប់ឲ្យបេប៊ីបៅ យើងនៅតែអាចកែខៃបាន ដោយប្រើវិធីបុរាណ ព្រោះជាច្រើនជំនាន់មកហើយ គេជឿថាថ្នាំរុក្ខជាតិខ្លះមានសុវត្ថិភាពចំពោះម៉ាក់មានទឹកដោះតិច ជួយឲ្យមានទឹកដោះច្រើនវិញ ប៉ុន្តែមុនប្រើត្រូវពិភាក្សាជាមួយគ្រូពេទ្យជំនាញជាមុន។ ម្យ៉ាងទៀត របបអាហារក៏មានឥទ្ធិពលខ្លាំងចំពោះការផលិតទឹកដោះរបស់ម៉ាក់ៗដូចជា ដោយជាធម្មតាពេទ្យបានណែនាំឲ្យស្រីៗញ៉ាំបន្លែ ផ្លែឈើ ស៊ុប ត្រីសាច់ឲ្យបានច្រើន ពិសេសផ្លែល្ហុង ដើម្បីសម្បូរទឹកដោះ ហើយទឹកដោះដែលផលិតចេញក៏ពោរពេញដោយសារធាតុចិញ្ចឹមសម្រាប់ការលូតលាស់របស់បេប៊ីទៀតផង។
៣- ដោះស្រាយបញ្ហាដែលអាចធ្វើឲ្យទឹកដោះចេញតិច
នៅមានហេតុផលមួយចំនួន ដែលអាចប៉ះពាល់ដល់ការផលិតទឹកដោះ មួយក្នុងចំនោមនោះ គឺការទុកដាក់បេប៊ីមិនបានត្រឹមត្រូវ ព្រោះពេលបេប៊ីនៅឆ្ងាយតែឯង នឹងបណ្តាលឲ្យខ្វះការភ្ញោចសុដន់របស់ម៉ាក់ៗ ធ្វើឲ្យការផលិតទឹកដោះបានតិចដូចគ្នា។ ទឹកដោះតិចពេក ក៏អាចមកពីរូបរាងនៃចុងដោះផងដែរ ពិសេសចុងដោះសំប៉ែត ឬលឹបចូលក្នុងធ្វើឲ្យបេប៊ីពិបាកបៅ។ បញ្ហាមួយទៀត បើយើងពន្យារការបំបៅដោះកូន ដោយសារឈឺចុងសុដន់ ឬមានអារម្មណ៍រំខាន ក៏ជាមូលហេតុនាំឲ្យរាំងស្ទះការផលិតទឹកដោះដែរ។ បំបៅដោះមិនទៀងទាត់ ក៏អាចបង្កបញ្ហានេះដូចគ្នា ហើយដើម្បីដោះស្រាយ គ្នាយើងត្រូវដាក់បេប៊ីលើទ្រូងពេលមឹមដោះ និងឲ្យបានញឹកញាប់ យ៉ាងហោចណាស់ ៨ ដង/ថ្ងៃ។ ពេលបេប៊ីបៅញឹកញាប់ សុដន់ក៏ផលិតទឹកដោះបានច្រើនទៅតាមហ្នឹងដែរ ហើយបើយើងទម្លាប់កូនបៅម្សៅ៉ទឹកដោះគោជំនួយ នឹងធ្វើឲ្យបេប៊ីលែងចង់បៅដោះម៉ាក់ៗមិនខាន។ ក្រៅពីនេះ បញ្ហាស្ត្រេសក៏ជារឿងមិនអាចចៀសផុត ទាំងអំឡុងពេលកំពុងពពោះ និងក្រោយសម្រាល ហើយជាកត្តាចម្បងធ្វើឲ្យការផលិតទឹកដោះបានតិច។
៤- វិធីសាស្ត្រជួយឲ្យមានទឹកដោះច្រើន
ដូចបានរៀបរាប់ខាងលើ របបអាហារ ផឹកទឹក និងគេងឲ្យបានគ្រប់គ្រាន់ អាចបង្កើនការផលិតទឹកដោះបាន។ ក្រៅពីនេះ ម៉ាក់ៗគួរចៀសវាងប្រើដបទឹកដោះគោ ឬក្បាលដោះជ័រ នៅពេលផ្តល់ទឹក ឬទឹកដោះឲ្យបេប៊ី ព្រោះធ្វើបែប បេប៊ីអាចច្រឡំ មិនដឹងមួយណាជាចុងដោះម៉ាក់ៗនោះទេ។ គួរតែប្រើកែវ ស្លាបព្រា ឬសឺរ៉ាំង បើចាំបាច់។
បើនៅតែមានបញ្ហា គួរទៅពិគ្រោះជាមួយគ្រូពេទ្យ។ គ្រូពេទ្យអាចចេញវេជ្ជបញ្ជាថ្នាំឈ្មោះ Domperidone ដើម្បីជួយបង្កើនការផលិតអ័រម៉ូនប្រូឡាក់ទីន (Prolactin) ដែលសំខាន់ជួយបង្កើនការផលិតទឹកដោះ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
