ខេត្តសៀមរាប ៖ មន្ត្រីនៃមជ្ឈមណ្ឌលអង្គរសម្រាប់ការអភិរក្សជីវចម្រុះអះអាងថា អណ្តើកភ្នំ ឬអណ្តើកព្រិចត្រូវបានអង្គការសហភាពអន្តរជាតិ ដើម្បីអភិរក្សធម្មជាតិ (IUCN) កាលពីពេលថ្មីៗនេះចាត់ចូលជាប្រភេទសត្វដែលរងការគំរាមកំហែងខ្លាំងប្រឈមនឹងការផុតពូជនៅកម្ពុជា ។
លោក Michael Meyerhoff នាយកប្រចាំប្រទេសនៃមជ្ឈមណ្ឌលអង្គររសម្រាប់អភិរក្សជីវចម្រុះ (ACCB) បានសម្តែងការព្រួយបារម្ភចំពោះស្ថានភាពអណ្តើកភ្នំ ដោយលោកបានលើកឡើងថា «ការដែលអណ្តើកភ្នំត្រូវបានចាត់ទុកជាប្រភេទសត្វដែលរងការគំរាមកំហែងខ្លាំងប្រឈមនឹងការផុតពូជនោះ គឺបន្ទាប់ពីក្រុមជំនាញរបស់អង្គការ IUCN បានចុះសិក្សា និងវាយតម្លៃជាសកលនៃការថយចុះនូវចំនួនសត្វប្រភេទនេះជាង៨០ភាគរយក្នុងចន្លោះពេល៩០ឆ្នាំ ចុងក្រោយនេះ ហើយមូលហេតុចម្បងបំផុត គឺមកពីការបាត់បង់ព្រៃដែលជាទីលំនៅ និងការជួញដូរ»។
លោកបានបន្តថា ច្រើនជាង៥០ភាគរយនៃពពួកសត្វអណ្តើកជាង៣៦០ប្រភេទនៅទូទាំងពិភពលោក និង១៤ប្រភេទនៅប្រទេសកម្ពុជាកំពុងតែរងការគំរាមកំហែងយ៉ាងខ្លាំង ហើយអាចប្រឈមនឹងការផុតពូជនៅពេលខាងមុខ។ លោកបានបញ្ជាក់ថា ដោយមើលឃើញពីការរងគ្រោះនៃពពួកសត្វប្រភេទនេះទើបគម្រោងនៃការបង្កាត់ពូជអណ្តើកភ្នំ ឬអណ្តើកព្រិចនេះ បានចាប់ផ្តើមកាលពីឆ្នាំ២០១៣ ហើយនៅក្នុងឆ្នាំ២០១៨កន្លងទៅនេះមជ្ឈមណ្ឌលរបស់លោកបានបង្កាត់កូនអណ្តើកភ្នំចំនួន៧៣ក្បាល ចំណែកឯនៅក្នុងឆ្នាំ២០១៩ គិតរហូតមកដល់ពេលនេះ គឺមានកូនអណ្តើកភ្នំចំនួន៣៥ក្បាល ហើយដែលបានញាស់ ហើយលោកសង្ឃឹមថានឹងទទួលបានទិន្នផលប្រហាក់ប្រហែលនឹងឆ្នាំ២០១៨ ។ លោកបានបន្ថែមថា មានសត្វអណ្តើក ប្រមាណ៥០០ក្បាល ចែកជា០៩ប្រភេទកំពុងរស់នៅក្នុងមជ្ឈមណ្ឌលក្នុងនោះអណ្តើកភ្នំ គឺមានប្រមាណ៣០០ក្បាល ។
លោកបានបន្តថា នៅក្នុងប្រទេសប្រទេសកម្ពុជាការធ្លាក់ចុះនៃ ចំនួនអណ្តើកភ្នំ គឺដោយសារកត្តាជាច្រើនក្នុងនោះកត្តាចម្បងបំផុត គឺការបាត់បង់ទីជម្រក ការបាត់បង់ជីវៈចម្រុះ និងការជួញដូរ ហើយទម្លាប់ និងជំនឿនៃការទិញអណ្តើក ដើម្បីព្រលែង ដើម្បីរំដោះគ្រោះ ឬបានបុណ្យនោះក៏ជាកត្តាដែលបណ្តាលឱ្យមានការធ្លាក់ចុះផងដែរ ដោយអ្នកលក់ ឬក្រុមជួញដូរនឹងបន្តចាប់ និងដាក់អន្ទាក់កាន់តែច្រើនឡើងៗ បើទោះជាអណ្តើកភ្នំ ត្រូវបានការពារដោយច្បាប់នៃព្រះរាជាណាចក្រកម្ពុជាក៏ដោយ ។
សូមបញ្ជាក់ថា អណ្តើកភ្នំ ឬអណ្តើកព្រិច គឺជាប្រភេទអណ្តើកដែលមានមាឌតូច ហើយអណ្តើកពេញវ័យមានទម្ងន់មិនលើសពី៣.៥គីឡូក្រាម ដោយអណ្តើកញីមានមាឌធំជាងអណ្តើកឈ្មោល ហើយអណ្តើកពេញវ័យអាចបន្តពូជបាននៅពេលមានអាយុពី៦ទៅ៨ឆ្នាំ ។ អណ្តើកប្រភេទនេះត្រូវបានប្រទះឃើញនៅតំបន់ជួរភ្នំក្រវ៉ាញ និងតំបន់ទំនាបភាគខាងត្បូង និងភាគខាងជើងនៃដងទន្លេមេគង្គ ហើយស្ថិតក្នុងបញ្ជីក្រហមនៃប្រភេទសត្វដែលរងការគំរាមកំហែងខ្លាំងប្រឈមនឹងការផុតពូជ ដោយអង្គការ IUCN ។
ប្រទេសកម្ពុជា គឺប្រទេសមួយដែលមានជីវៈចម្រុះដ៏សំបូរបែប នៅក្នុងតំបន់អាស៊ីអាគ្នេយ៍ ដោយមានរុក្ខជាតិប្រមាណជាង៨.២៦០ប្រភេទ ថនិកសត្វជាង២០០ប្រភេទ សត្វដែលអាចរស់នៅក្នុងទឹក និងលើគោក ព្រមទាំងល្មូនជាង២៥០ប្រភេទ ត្រីជាង៨៧៤ប្រភេទ និងសត្វស្លាបជាង៦០០ប្រភេទ ។ ហើយនៅប៉ែកនិរតីនៃប្រទេស គឺតំបន់ជួរភ្នំក្រវាញដែលលាតសន្ធឹង ប្រមាណ១០.០០០គីឡូម៉ែត្រការ៉េ គឺជាតំបន់អភិរក្សជីវៈចម្រុះដ៏សំខាន់ដោយមានសត្វចតុប្បាទធំៗជាច្រើនប្រភេទដូចជា ដំរី ខ្លាឃ្មុំ ខ្ទីង ជាដើម កំពុងរស់នៅ និងតំបន់អភិរក្សមួយចំនួនទៀត នៅក្នុងភូមិភាគឦសានក្នុងខេត្តមណ្ឌលគិរី និងរតនគិរី ប៉ុន្តែសត្វព្រៃ និងជីវៈចម្រុះទាំងនេះបានថមថយចុះខ្លាំង តាមរយៈការរុករានទីលំនៅ ការទន្ទ្រានដីព្រៃ ដើម្បីធ្វើកសិកម្ម ការជួញដូរ ៕ កែសម្រួលដោយ ៖សុឃាក់
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]