អ៊ីតាលី៖ កីឡាករ Cristiano Ronaldo នឹងត្រូវប្រឈមមុខនឹងការកោះហៅតទល់រឿងក្តីរំលោភសេពសន្ថវៈសាជាថ្មីម្តងទៀត បន្ទាប់ពីមេធាវីរបស់ដើមចោទរបស់នាង Kathryn Mayorga កំណត់បានអាស័យដ្ឋានរបស់កីឡាកររូបនេះនៅអ៊ីតាលី។ កីឡាករ Cristiano Ronaldo បានបដិសេធដាច់ខាត ចំពោះការចោទប្រកាន់របស់នាង Mayorga ដែលបានអះអាងថា កីឡាករសញ្ជាតិព័រទុយហ្គាល់រូបនេះបានបៀតបៀនទៅលើនាងកាលពីជាង ១០ឆ្នាំមុន នៅឯសណ្ឋាគារ Las Vegas។
យ៉ាងណាមិញ ក្រុមប៉ូលិសនៅសហរដ្ឋអាមេរិកបានបើកកកាយរឿងក្តីនេះសាជាថ្មីកាលពីខែតុលាកន្លងទៅ ហើយមេធាវីរបស់នាង Mayorga ក៏បានចាប់ផ្តើមស៊ើបរកអាស័យដ្ឋានពិតប្រាកដរបស់ Ronaldo តាំងពីពេលនោះមក។
បើតាម Mirror បានឱ្យដឹងថា អាស័យដ្ឋានរបស់ Ronaldo នៅអ៊ីតាលី ត្រូវបានក្រុមមេធាវីស្វែងរកឃើញ បន្ទាប់ពីបានស្រាវជ្រាវទិន្នន័យអចលនវត្ថុដែលរក្សាទុកដោយអាជ្ញាធរមានសមត្ថកិច្ចរបស់អ៊ីតាលី។ មកដល់ពេលនេះ ក្រុមមេធាវីរបស់នាង Mayorga បានចាប់ផ្តើមស្នើសុំនីតិវិធីជាផ្លូវការ ដើម្បីបញ្ជូនពាក្យបណ្តឹង និងដីកាតុលាការមកកាន់អ៊ីតាលី ខណៈដែលគេរំពឹងថាឯកសារនឹងត្រូវបានផ្ញើមកដល់នៅប៉ុន្មានសប្តាហ៍ទៀត បន្ទាប់ពីត្រូវបានបកប្រែរួចរាល់។ កាលពីខែមុន ចៅក្រមរបស់អាមេរិកម្នាក់ បានអនុញ្ញាតពេលវេលាបន្ថែមទៀតសម្រាប់កំណត់អាស័យដ្ឋានរបស់កីឡាកររូបនេះ សម្រាប់ដំណើរការនីតិវិធីរបស់តុលាការ។
គួរបញ្ជាក់ថា រឿងនេះបានកើតឡើងក្រោយពេលដែលតារាម៉ូឌែលនាង Mayorga បានអះអាងថា Cristiano Ronaldo បានចាប់រំលោភនាងនៅក្នុងបន្ទប់ប្រណីតមួយរបស់សណ្ឋាគារ Las Vegas។ ក្រោយមកកីឡាកររូបនេះ បានឱ្យលុយនាងចំនួន ២៩៥,០០០ផោន ដើម្បីឱ្យរូបនាងបិទមាត់នៅស្ងៀម និងលាក់រឿងនេះ ហើយនាងបានបញ្ជាក់ថា នាងបានទទួលលុយនោះមែនដោយសារនាងមានអារម្មណ៍ភ័យខ្លាច។ ប៉ុន្តែយ៉ាងណាក៏ដោយ កីឡាករ Cristiano Ronaldo បានបដិសេធយ៉ាងដាច់អហង្ការចំពោះការចោទប្រកាន់នេះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]