កីឡាការិនីបាល់ទាត់ម្នាក់ ត្រូវគេប្រទះឃើញស្លាប់ដោយគ្មានអ្នកដឹង!

កូឡុំប៊ី៖ របាយការណ៍ប៉ូលិសបានឱ្យដឹងថា សាកសពរបស់កីឡាការិនីបាល់ទាត់ម្នាក់ត្រូវបានគេប្រទះឃើញ ក្រោយពីត្រូវបានក្រុមគ្រួសារដាក់ពាក្យបណ្តឹងថាបាត់ខ្លួនកាលពីប៉ុន្មានថ្ងៃមុន។

ជនរងគ្រោះមានឈ្មោះថា Leidy Asprilla គឺជាកីឡាការិនីបាល់ទាត់នៅក្នុងប្រទេសកូឡុំប៊ី។ ប៉ូលិសនិយាយថា សាកសពរបស់នាងត្រូវបានប្រទះឃើញកាលពីថ្ងៃពុធ នៅលើដងផ្លូវក្បែរម៉ូតូមួយគ្រឿងក្នុងតំបន់ Valle del Cauca ភាគនិរតីប្រទេសកូឡុំប៊ី។ សមត្ថកិច្ចជំនាញបានប្រាប់ថា ចំពោះមូលហេតុនៃការស្លាប់នឹងត្រូវស៊ើបអង្កេតនាពេលក្រោយ។

កីឡាការិនី Asprilla ធ្លាប់បង្ហាញខ្លួនឱ្យក្រុមជម្រើសជាតិនារីរបស់កូឡុំប៊ី ក្នុងការប្រកួតកីឡាអូឡាំពិកកាលពីឆ្នាំ ២០១៦ កន្លងទៅ។ សព្វថ្ងៃនេះ នាងប្រកបអាជីពនៅក្លិប Orsomarso នៅតំបន់ Valle del Cauca។ ក្រុមគ្រួសាររបស់នាងបានរាយការណ៍ទៅប៉ូលិសថា នាងបានបាត់ខ្លួននៅថ្ងៃអាទិត្យ ក្រោយពេលដែលចាកចេញពីផ្ទះទៅឌុបមិត្តភក្តិដើម្បីទៅហ្វឹកហាត់ជាមួយក្លិប៕