ខេត្តសៀមរាប ៖ បើតាមការឱ្យដឹងពីក្រុមគ្រួសារសាច់ញាតិស្ត្រីរងគ្រោះ បានរៀបរាប់ប្រាប់ភ្នាក់ងារកោះសន្តិភាព នៅរសៀលថ្ងៃទី២២ ឧសភា ថា ក្មួយស្រីរបស់គាត់ដែលមានជំងឺលើសឈាមផងនិងបេះដូងផងនោះ ក៏បានមកឱ្យអ្នកគ្រូពេទ្យតាមភូមិជួយសង្គ្រោះ ខណៈកំពុងចុកពោះខ្លាំង។
បន្ទាប់ពីអ្នកគ្រូពេទ្យនោះពិនិត្យភ្លាម មិនទាន់ដឹងអីផង ក៏ឱ្យដាក់សេរ៉ូមបានប្រហែល១០នាទី ស្រាប់តែអ្នកជំងឺដាច់ខ្យល់ស្លាប់បាត់នៅនឹងផ្ទះអ្នកគ្រូពេទ្យនោះតែម្តង ដែលបង្កឱ្យមានការភ្ញាក់ផ្អើលពេញស្រុកជីក្រែង ។ ចំពោះមូលហេតុមកពីពេទ្យស្ទើរភ្លើងចេះបន្តិចបន្ទួច ចង់បានលុយគេពេក នេះបើតាមសម្តីរបស់ក្រុមគ្រួសារសព ។
ហេតុការណ៍បណ្តាលឱ្យស្ត្រីម្នាក់ស្លាប់នោះ កើតឡើងកាលពីវេលាម៉ោង០៣រសៀលថ្ងៃទី២០ ឧសភា ស្ថិតនៅភូមិអន្លង់ព្រីងលើ ឃុំអន្លង់សំណរ ស្រុកជីក្រែង ខេត្តសៀមរាប។
លោកវរៈសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានប្រាប់តាមទូរស័ព្ទនៅល្ងាចថ្ងៃទី ២២ ឧសភា ថា ជនរងគ្រោះដែលស្លាប់មានឈ្មោះ លាង វង ភេទស្រី អាយុ៤៧ឆ្នាំ មានទីលំនៅក្នុងភូមិតាគម ឃុំអន្លង់សំណរ ស្រុកជីក្រែង ខេត្តសៀមរាប ។ ចំណែកអ្នកគ្រូពេទ្យមានឈ្មោះ មិន វឌ្ឍនា អាយុ ៣១ឆ្នាំ ជាពេទ្យមធ្យម បម្រើការងារនៅមណ្ឌលសុខភាពជីក្រែង រស់នៅភូមិអន្លង់ព្រីងលើ ឃុំអន្លង់សំណរ ស្រុកជីក្រែង ខេត្តសៀមរាប។
ព័ត៌មានបន្ថែមកោះសន្តិភាពនឹងផ្សាយជូនបន្ត។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]