ម៉ាឡេស៊ី៖ មិនថានៅស្រុកខ្មែរ ឬនៅម៉ាឡេស៊ីនោះទេ ប្រជាជនភាគច្រើនចូលចិត្តហូបទុរេនណាស់។ ជាក់ស្តែងមានទាំងការ៉េមធ្វើពីទុរេន បង្អែមទុរេន នំធ្វើពីទុរេន និងមានរបស់ហូបជាច្រើនដែលអាចធ្វើពីទុរេនច្រើនទៀត។ តែថ្មីៗនេះ ហាងមួយកន្លែងនៅក្នុងប្រទេសម៉ាឡេស៊ី បានបែកគំនិត ច្នៃប្រឌិតយកទុរេនយកទៅដុត ហើយមានភ្ញៀវបរទេសជាច្រើនចូលចិត្តហូបវាខ្លាំងណាស់។
យោងតាមប្រភពបានឱ្យដឹងថា ទុរេនទាំងនេះ ត្រូវយកវាទៅខ្ចប់ជាមួយនឹងក្រដាសរុំអាលុយមីញ៉ូមជាមុនសិន បន្ទាប់មកក៏យកវាទៅដុតដោយប្រើប្រាស់ធ្យូងប្រមាណ ៤៥នាទី។ ស្តាប់ទៅពិតជាប្លែក ប៉ុន្តែមើលទៅពិតជាគួរឱ្យចង់ហូបពិតមែន។ យ៉ាងណាមិញ ក្រោយពីដុតរួច អ្នកពុំគួរហូបវាភ្លាមៗនោះទេ គួរតែទុកវាឱ្យត្រជាក់សិន រួចចាំហូបវា។
ប្រសិនបើអ្នកមានឱកាសបានទៅលេងប្រទេសម៉ាឡេស៊ី ហើយចង់ហូបវាមែននោះ អ្នកអាចទៅផ្សាររាត្រី Jalan Gaya នៅតំបន់ Kota Kinabalu បានដោយចំណាយអស់ត្រឹមតែជាង ១៥ដុល្លារតែប៉ុណ្ណោះ លោកអ្នកអាចហូបវាបានហើយ។
អ្នកដែលបង្កើតទុរេនដុតនេះគឺលោក Dennis Chan ហើយលោកបាននិយាយថា មូលហេតុដែលលោកបែកគំនិតនេះឡើង ព្រោះតែលោកឃើញហាងនៅជិតនោះមានលក់ដូងដុត។ ដូច្នេះលោកក៏សាកដុតទុរេនម្តង មានអីឆ្ងាញ់ ហើយទទួលបានការគាំទ្រច្រើនពីសំណាក់ភ្ញៀវទេសចរជាតិនិងអន្តរជាតិជាហូរហែ។
លោក Dennis បានបន្តនិយាយទៀតថា ចាប់តាំងពីខ្ញុំបានបង្កើតទុរេនដុតមក គឺមានភ្ញៀវបរទេសជាច្រើនចូលចិត្តហូបណាស់ ជាពិសេសភ្ញៀវមកពីចិន កូរ៉េខាងត្បូង និងភ្ញៀវជាតិដទៃផ្សេងទៀត។
ដូច្នេះ ប្រសិនបើអ្នកមានឱកាសបានទៅលេងម៉ាឡេស៊ី សូមកុំភ្លេចចូលទៅផ្សាររាត្រី Jalan Gaya នៅតំបន់ Kota Kinabalu ឱ្យសោះ៕
ទស្សនារូបភាពនិងវីដេអូខាងក្រោម៖
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]