រាជធានីភ្នំពេញ ៖ យុវជនម្នាក់ក្នុងចំណោមបក្សពួក២នាក់ត្រូវប្រជាការពារសង្កាត់ទួល សង្កែ ចាប់ខ្លួនកាលពីវេលាម៉ោង៤និង៣០នាទីរសៀលថ្ងៃទី២០ មីនា នៅផ្លូវលេខ៩៣ បន្ទាប់ពីជននេះជិះម៉ូតូធ្វើសកម្មភាពឆក់ខ្សែ.កនៅមុខស្ថាន ទូតបារាំង ហើយព្យាយាមបើករត់ក៏ជួបគ្រោះថ្នាក់ចរាចរណ៍ តាមវិថីព្រះមុនីវង្ស សង្កាត់ស្រះចក ខណ្ឌដូនពេញ ។
ជនសង្ស័យដែលត្រូវចាប់ខ្លួនឈ្មោះអេង គឹមឡែន ភេទប្រុស អាយុ១៨ឆ្នាំ មានលំនៅក្នុងសង្កាត់បឹងកក់ទី២ ខណ្ឌទួលគោក ។ ឯម្ចាស់ខ្សែ.កពុំត្រូវគេស្គាល់អត្តសញ្ញាណឡើយ គេចខ្លួនបាត់ពុំបានដាក់ពាក្យបណ្តឹងទេ ។ តាមព័ត៌មានឱ្យដឹងថា នៅមុនពេលកើតហេតុជនសង្ស័យ និងបក្សពួកបានជិះម៉ូតូម៉ាកឌ្រីម C125 ស៊េរី២០១២ ពណ៌ខ្មៅ តាមបណ្តោយវិថីព្រះមុនីវង្ស។ លុះមកដល់មុខស្ថានទូតបារាំង ក៏ធ្វើសកម្មភាពឆក់ខ្សែ.កពីស្ត្រីម្នាក់កំពុងជិះម៉ូតូស្តេប មួយគ្រឿង តែពុំបានសម្រេចឡើយ ។
ប្រភពបន្តឱ្យដឹងទៀតថា ខណៈធ្វើដំណើរមកដល់ផ្លូវលេខ៩៣ ក្បែរផ្សារទួលសង្កែ ជនសង្ស័យបានជិះប៉ះជាមួយរថយន្តមួយគ្រឿង បណ្តាលឱ្យធ្លាក់អ្នកជិះពីក្រោយ ហើយត្រូវកម្លាំងប្រជាការពារចាប់ខ្លួនបានម្នាក់។ ចំណែកម្នាក់ទៀតជិះម៉ូតូគេចខ្លួនបាត់ ៕
ដោយ ៖ Bopha
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]