ភ្នំពេញ៖ ទីបំផុតតារាចម្រៀង ចាន់ សម័យ មានផ្ទះសម្បែងសម្រាប់ឲ្យប្រពន្ធកូនរស់នៅនឹងគេ ឈប់នៅផ្ទះជួលទៀតហើយ បន្ទាប់ពីសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អាណិតអាសូរ ទិញផ្ទះឲ្យលោកក្នុងបុរីឡេងណាវ៉ាត្រា។ ពិធីប្រគល់បានធ្វើឡើងនៅល្ងាចថ្ងៃទី ២១ ខែឧសភា ឆ្នាំ២០១៩ ក្រោមវត្តមានឧកញ៉ា ឡេង ណាវ៉ាត្រា និងលោក ហេង ឡុង ស្ថាបនិកសមាគមមិត្តស្ម័គ្រចិត្តសិល្បៈជួយសង្គម។
ផ្ទះដែលសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ទិញឲ្យតារាចម្រៀង ចាន់ សម័យ នោះ គឺជាវីឡាតឿមានសល់ដីជុំវិញផ្ទះ ដែលមើលទៅគួរឲ្យចង់របស់នៅតែម្ដង ស្ថិតក្នុងបុរីឡេងណាវ៉ាត្រាគម្រោងទី៦ ជិតផ្សារទូលពង្រ។
ឧកញ៉ា ឡេង ណាវ៉ាត្រា បានថ្លែងថា លោកពិតជារំភើបចិត្តខ្លាំងជំនួសតារាចម្រៀងលោក ចាន់ សម័យ ដែលមានសំណាងត្រូវបានសម្ដេចទាំងពីរ អាណិតអាសូរទិញផ្ទះឲ្យបែបនេះ។ ទន្ទឹមគ្នានោះដែរ សម្រាប់លោកឧកញ៉ាថា គឺជាមោទនភាព និងមហាកិត្តិយសបំផុតដែលសម្ដេចម៉ែ បានសម្រេចទិញនៅក្នុងបុរីឡេងណាវ៉ាត្រានេះតែម្ដង។
ក្រោយពីទទួលបាន ផ្ទះយ៉ាងស្រស់ស្អាតហើយនៅក្នុងបុរីក្នុងរាជធានីភ្នំពេញថែមទៀតលោក ចាន់ សម័យ បានសម្ដែងអារម្មណ៍រំភើបខ្លាំងណាស់ ដោយកន្លងមកលោកមិនធ្លាប់ស្រមៃថា និងមានផ្ទះផ្ទាល់ខ្លួនដើម្បីឲ្យប្រពន្ធកូនស្នាក់នៅឡើយ។ ម្ចាស់បទ «សុំមេមាន់មួយ» លោកសូមអរគុណខ្លាំងណាស់ដល់សម្ដេចទាំងពីរ ដែលមានចិត្តប្រោសប្រណីដល់រូបលោក និងក្រុមគ្រួសារ ដែលចាប់ពីពេលនេះលោកមានផ្ទះសម្បែងផ្ទាល់ខ្លួនរស់នៅនឹងគេឯង ឈប់នៅផ្ទះជួលហើយ។
ជាមួយគ្នានេះលោក ចាន់ សម័យ សូមជូនពរសម្ដេចទាំងពីរបានសម្រេចនូវពុទ្ធពរទាំង ៤ ប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍តរៀងទៅ។
សូមបញ្ជាក់ផងដែរថាលោក ចាន់ សម័យ បានប្រឡូកលើវិស័យចម្រៀងជាង ១០ ឆ្នាំហើយ ម្ចាស់បទ «សុំមេមាន់មួយ» ត្រូវបានគេដឹងថាមានជំងឺរបេងឆ្អឹង ដោយលោកបានកើតជំងឺមួយនេះ តាំងពីអាយុ ១៤ ឆ្នាំមកម្ល៉េះ តែចាប់ផ្ដើមធ្វើទុក្ខខ្លាំងប្រហែល ៥ឆ្នាំចុងក្រោយនេះ។ លោកបាត់មុខពីសិល្បៈជាច្រើនឆ្នាំ ហើយចុងក្រោយធ្លាយពីព័ត៌មានស្ដីពីស្ថានភាពរបស់លោកជួបការលំបាកខ្លាំង បន្ទាប់មានមិត្តភក្ដិបង្ហោះពីជីវភាពរបស់លោកដើរស្ទូចត្រីលក់ ដើម្បីរកប្រាក់ចិញ្ចឹមកូនទាំង ៥ នាក់ ដែលកំពុងតែរបស់នៅផ្ទះជួយមួយកន្លែង ក្នុងទឹកដីខណ្ឌជ្រោយចង្វារ។ ដំណឹងស្ថានភាពជីវភាពរបស់លោកធ្វើឲ្យមហាជនសម្ដែងការអាណិតអាសូរជាខ្លាំង និងបានជួយឧបត្ថម្ភលោកជាបន្តបន្ទាប់ ជាពិសេសគឺសម្ដេចទាំង២តែម្ដង។
ជាមួយនឹងការងារសិល្បៈវិញ លោកមិនធ្លាប់នឹកស្រមៃថានឹងវិលចូលសិល្បៈវិញទេ បន្ទាប់ពីបានស្ងប់ស្ងាត់ក្នុងវិថីនេះមិនតិចជាង ១០ ឆ្នាំ។ ប៉ុន្តែក្រោយផ្ទុះព័ត៌មានពីស្ថានភាពក្រីក្រ និងជំងឺរបស់លោក ហើយត្រូវបានមហាជនជិតឆ្ងាយនៅតែអាណិតស្រលាញ់នឹករលឹក ព្រមទាំងជួយឧបត្ថម្ភជាច្រើន ធ្វើឲ្យលោកកែប្រែគំនិតនេះឡើងវិញ។ បច្ចុប្បន្នលោកកំពុងតែច្រៀងក្នុងផលិតកម្ម Galaxy របស់ឧកញ៉ា ឡេង ណាវ៉ាត្រានេះតែម្ដង៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]