រាជធានីភ្នំពេញ ៖ បុរសអ្នករើសអេតចាយម្នាក់ បានត្រូវសមត្ថកិច្ចចាប់ឃាត់់ខ្លួនយកទៅសាកសួរនៅប៉ុស្តិ៍នគរបាលចតុមុខ ក្រោយពីមានបុរសជនជាតិវៀតណាមម្នាក់អះអាងថា បានបាត់កាបូបលុយហើយមានការសង្ស័យទៅលើអ្នករើសអេតចាយរូបនេះ ដែលនៅអង្គុយផឹកស្រាជាមួយនឹងបុរសម្នាក់ទៀតនៅក្បែរនោះ ។ ពេលនោះ បុរសជាជនសង្ស័យបានលោតចូលទៅក្នុងទឹកទន្លេក្នុងគោលបំណងរត់គេចខ្លួន ប៉ុន្តែពេលហែលដល់ពាក់កណ្តាលទន្លេទៅហើយ សមត្ថកិច្ចក៏ចេញអូប័រមួយគ្រឿងតាមចាប់បានពីក្នុងទន្លេមកវិញភ្លាមៗដែរ ។
ហេតុការណ៍នេះ បង្កឲ្យមានការភ្ញាក់ផ្អើលឡើងកាលពីវេលាម៉ោងប្រមាណ៣និង៤៥នាទីរសៀលថ្ងៃទី១៦ ខែឧសភាកន្លងទៅ នៅមាត់ច្រាំងទន្លេខាងក្រោយសណ្ឋាគារហ៊ីម៉ាវ៉ារី ក្នុងសង្កាត់ចតុមុខ ខណ្ឌដូនពេញ ។ ប្រភពព័ត៌មានពីនគរបាលឱ្យដឹងថា បុរសជាជនសង្ស័យដែលត្រូវបានចាប់ឃាត់ខ្លួននេះឈ្មោះផាន់ តុលា អាយុ២៩ឆ្នាំ ពុំមានទីលំនៅពិតប្រាកដទេ ។ ចំណែកឯបុរសដែលប្រាប់ថាបាត់កាបូបលុយឈ្មោះ ឌី សំណាង ជាជនជាតិវៀតណាម អាយុ៣១ឆ្នាំ មានទីលំនៅម្តុំគីឡូម៉ែត្រលេខ៧ ខណ្ឌឫស្សីកែវ ។
មុនពេលកើតហេតុ ជនជាតិវៀតណាមរូបនេះកំពុងកាត់ដែកទីបនៅចំណុចខាងលើ ហើយពេលនោះមេឃរកកល់ភ្លៀង ដោយខ្លាចទទឹកក៏បានយកកាបូបលុយដែលនៅក្នុងនោះមានលុយជាង១០ម៉ឺនរៀល ទូរស័ព្ទដៃមួយគ្រឿង រួមទាំងរបស់របរមួយចំនួនទៀតទៅដាក់ក្រោមម្លប់លើមាត់ច្រាំង ។
ប្រភពដដែលឲ្យដឹងទៀតថា ក្រោយពីបុរស ជនជាតិវៀតណាមម្នាក់ខាងលើទុកកាបូបលុយរបស់ខ្លួនក្រោមម្លប់ត្រឹមត្រូវហើយ ក៏ទៅធ្វើការបន្តទៀត ។ លុះបន្តិចក្រោយមក ទើបរូបគាត់ទៅរកមើលកាបូបលុយរបស់ខ្លួនមិនឃើញ និងបានដើរទៅសួរបុរសជាជនសង្ស័យរូបនេះ ដែលកំពុងអង្គុយផឹកស្រាជាមួយបុរសម្នាក់ទៀតនៅក្បែរនោះ តែត្រូវបដិសេធថាមិនដឹងឡើយ ។
ដោយមិនអស់ចិត្ត បុរសម្ចាស់កាបូបក៏បានទៅប្រាប់មន្ត្រីសមត្ថកិច្ចដែលនៅក្បែរនោះ ក្នុងបំណងសុំឱ្យជួយសួរនាំបន្ថែមលើជនសង្ស័យ។ គ្រាន់តែឃើញសមត្ថកិច្ចទៅដល់ ជនម្នាក់នេះក៏បានលោតចូលទៅក្នុងទឹកទន្លេ ប៉ុន្តហែលទៅដល់ពាក់កណ្តាលទន្លេ ក៏ត្រូវសមត្ថកិច្ចចេញអូប័រមួយគ្រឿងទៅតាមចាប់បាន និងប្រគល់ឱ្យនគរបាលប៉ុស្តិ៍ចតុមុខនាំយកទៅសាកសួរ ។
ពេលឃាត់ខ្លួននាំមកសាកសួរនៅប៉ុស្តិ៍នគរបាលចតុមុនោះ រូបគេបដិសេធថាមិនបានលួចយកកាបូបលុយដូចការចោទប្រកាន់នោះឡើយ ។ម្យ៉ាងទៀត រូបគេជាមនុស្សបែកថ្នាំ និងទើបតែចេញពីមណ្ឌលកែប្រែព្រៃស្ពឺបានប៉ុន្មានថ្ងៃប៉ុណ្ណោះ។ ចំណែកឯបុរសជនជាតិវៀតណាមនោះវិញក៏មិនបានដឹងថា ជនសង្ស័យណាជាអ្នកលួចយកកាបូបលុយរបស់ខ្លួនឲ្យច្បាស់លាស់ឡើយ ។
ក្រោយពីការរៀបរាប់របស់បុរសជនជាតិវៀតណាមនោះមិនច្បាស់លាស់ ទើបគ្រាន់តែតម្រូវឲ្យរូបគេដាក់ពាក្យបណ្តឹងតែប៉ុណ្ណោះ មិនអាចធ្វើការចោទប្រកាន់ទៅលើជនសង្ស័យរូបនេះបានឡើយ ម្យ៉ាងទៀត ក៏មិនមានភ័ស្តុតាងនៅជាប់់នឹងខ្លួនគេដែរ ។ ចំណែកឯបុរសជាជនសង្ស័យខាងលើ សមត្ថកិច្ចសម្រេចបញ្ជូនទៅមន្ទីរសង្គមកិច្ច ព្រោះរូបគេជាមនុស្សប្រើប្រាស់ថ្នាំញៀន និងកំពុងតែមានអាការបែកថ្នាំ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]