តាំងពីដើមរៀងមក ចាស់ៗតែងមានត្រណមច្រើនយ៉ាងចំពោះស្រីៗមានផ្ទៃពោះ ដើម្បីរក្សាគភ៌ឲ្យនៅគង់ មានសុខភាពល្អ។ ក្នុងចំណោមត្រណមទាំងនោះ មានមួយចំនួនគឺជាទស្សនៈយល់ខុស ប្រាសចាកពីផ្នែកវេជ្ជសាស្ត្រទៅវិញ។
ថ្ងៃនេះ Hello គ្រូពេទ្យ នឹងស្រាយចម្ងល់នូវទស្សនៈយល់ខុសទាំងនោះជាមួយវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។
១- មុជទឹកយប់ធ្វើឲ្យកូនថ្លោស?
ការដែលស្រីៗមានពោះពុងមុជទឹកពេលយប់មិនមែនធ្វើកូនថ្លោសនោះទេ កូនថ្លោសអាចមកពីរបបអាហាររបស់ម៉ាក់ៗច្រើនជាង ដូចជាការញុំាបន្លែ ផ្លែឈើលើសកម្រិត។ ការពិតទៅចាស់ៗហាមស្រីៗមានផ្ទៃពោះមិនឲ្យងូតទឹកនៅពេលយប់ ខ្លាចងងឹតធ្វើឲ្យរអិលដួល ប៉ះពាល់ដល់កូនក្នុងពោះប៉ុណ្ណោះ។
២- ញ៉ាំពពួកខ្ចៅខ្យងធ្វើឲ្យកូនកើតមកហៀរទឹកមាត់?
មិនអាចនោះទេ! មកទល់ពេលនេះគ្មានភស្តុតាងណាបញ្ជាក់ថា ការញ៉ាំពពួកខ្ចៅខ្ចង លៀស គ្រុំ ធ្វើឲ្យកើតមកហៀរទឹកមាត់នោះទេ។ ផ្ទុយទៅវិញ ការដែលកូនហៀរទឹកមាត់មិនឈប់រហូតដល់ធំ អាចមកពីអណ្តាតធំ មានការបង្ករោគ នៅក្រពេញទឹកមាត់ ឬមានបញ្ហាប្រព័ន្ធសរសៃប្រសាទជាដើម។ ចំណែកឯការញ៉ាំខ្ចៅខ្យងអាចធ្វើឲ្យម៉ាក់ៗមិនស្រួលពោះ ឆ្លងពពួកសត្វល្អិត-ព្រូន ចូលក្នុងពោះវៀន ដូច្នេះទោះវាមិនធ្វើឲ្យកូនហៀរទឹកមាត់ ក៏យើងមិនគួរញ៉ាំដែរ។
៣- ញ៉ាំគ្រាប់ជីរ-ល្ង ស្រួលកើតកូន?
កូនកើតស្រួល ឬពិបាក អាស្រ័យទៅលើទម្រង់រាងកាយយើង ទំហំក្បាលកូន ទំហំអាងត្រគាកម៉ាក់ៗ ម្យ៉ាងវិញទៀតបើកូនថ្លោសខ្លាំងក៏ពិបាកកើតដែរ មិនមែនមកពីការញ៉ាំគ្រាប់ជីរ ឬល្ងនោះទេ។
៤- ហាមរួមភេទពេលមានផ្ទៃពោះ?
ពេទ្យហាមរួមភេទតែក្នុងករណីដែលម៉ាក់ៗមានបញ្ហាសុកពាំងមាត់ស្បូន កូនកើតមិនគ្រប់ខែ មានធ្លាក់ឈាមតាមទ្វារមាស មានឆ្លងជំងឺកាមរោគនៅប្រដាប់ភេទ មានការបែកទឹកភ្លោះមុនពេលសម្រាល និងមាត់ស្បូនបើកប៉ុណ្ណោះ។ ទោះជាពេទ្យមិនហាមក្តី តែស្រីៗគ្នាយើងមិនសូវមានចំណង់ប៉ុន្មានទេអំឡុងពពោះ ណាមួយចាញ់កូនទៀតរឹតតែអត់អារម្មណ៍។
៥- ចូលចិត្តញ៉ាំបបរធ្វើឲ្យកើតមកមិនស្អាត?
រឿងនេះក៏មិនពិតដែរ សម្បុរស្បែកកូនស្អាត ឬមិនស្អាត អាស្រ័យលើរបបអាហារ សម្បុរម៉ាក់ប៉ា និងអនាម័យខ្លួនប្រាណម៉ាក់ៗ បើម៉ាក់មានការបង្ករោគផ្សិតអំឡុងពពោះនោះស្បែកកូនក៏មិនស្អាតដែរ។
៦- ញ៉ាំម្នាស់ធ្វើឲ្យរលូតកូន
ការភាន់ច្រឡំនេះ គឺដោយសារក្នុងផ្លែម្នាស់មានអង់ហ្ស៊ីម Bromelain ។ ពួកគេអះអាងថា អង់ហ្ស៊ីម Bromelain បំបែកជាតិប្រូតេអ៊ីន ហើយកូនទើបតែបង្កកំណើតថ្មីៗក្នុងផ្ទៃពោះ គឺផ្សំបង្កើតឡើងដោយជាតិប្រូតេអ៊ីន អ៊ីចឹងការញ៉ាំអង់ហ្ស៊ីម Bromelain អាចបណ្តាលឲ្យមានការហូរឈាម និងរលូតកូនបាន តែគ្មានភស្តុតាងគាំទ្រការអះអាងនេះទេ ផ្ទុយទៅវិញ ម៉ាក់ៗញ៉ាំម្នាស់ក្នុងបរិមាណល្មម មានសុវត្ថិភាព។
៧- ទឹកដូងមិនល្អចំពោះស្រីៗមានផ្ទៃពោះ?
ក្នុងទឹកដូងសម្បូររ៉ែប៉ូតាស្យូម ម៉ាញេ៉ស្យូម កាល់ស្យូម និងផូស្វរ ជួយទប់ទល់បញ្ហាទល់លាមក បង្ការអការៈចាញ់កូន ក្អួតចង្អោរ ជួយការលូតលាស់ទារក និងលំនឹងទឹកភ្លោះបានល្អ។
៨- ហាត់ប្រាណធ្វើឲ្យរលូតកូន?
ហាត់ប្រាណល្អចំពោះស្រីៗមានផ្ទៃពោះ ពេទ្យហាមតែការហាត់ប្រាណណាដែលត្រូវប្រើកម្លាំង និងកាយវិការខ្លាំងៗប៉ុណ្ណោះ។
៩- មើលអេកូនញឹកញាប់ពេកអាចប៉ះពាល់ដល់កូនក្នុងពោះ?
គ្មានការសិក្សាបែបវិទ្យាសាស្ត្រណាបញ្ជាក់ថា ការមើលអូកេសាស្ត្រច្រើនធ្វើឲ្យប៉ះពាល់ដល់កូនក្នុងពោះនោះទេ តែវាបានផ្តល់អត្ថប្រយោជន៍ច្រើនដល់យើងវិញ ដោយអាចដឹងពីការវិវត្តរបស់កូន។
១០-ចាញ់កូនពេកធ្វើឲ្យរលូតកូន?
មានម៉ាក់ៗជាច្រើនយល់ច្រឡំថា ការចាញ់កូនខ្លំាងអាចធ្វើឲ្យរលូតកូន តាមពិតមិនអ៊ីចឹងទេ អាការៈចាញ់កូនគឺតែងតែកើតមានអំឡុងត្រីមាសទី១ នៃការពពោះ ដោយសារតែការកើនឡើងកម្រិតអ័រម៉ូននៅក្នុងខ្លួន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក នារី និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
