ម៉ាឡេស៊ី៖ បុរសម្នាក់ ត្រូវបានអ្នកលេងអ៊ីនធើណេតជាច្រើននាក់ សរសើរជាខ្លាំង បន្ទាប់ពីរូបលោកបានចំណាយពេលសម្អាតទីក្រុងរាល់ថ្ងៃ បើទោះបីជារូបលោកក្រក្តី។
បុរសចិត្តល្អរូបនេះមានឈ្មោះថា Husin Kasim រស់នៅក្នុងទីក្រុង Taiping ហើយលោករមែងតែងតែសម្អាតផ្លូវដោយស្ម័គ្រចិត្តរាល់ថ្ងៃ ដោយមិនរំពឹងចង់បានអ្វីត្រលប់មកវិញនោះទេ។ ជាក់ស្តែង លោកបាននិងកំពុងតែសម្អាតផ្លូវ Taiping អស់មួយរយៈមកហើយ ទើបរូបលោកទទួលបានការចាប់អារម្មណ៍ខ្លាំងបែបនេះ។
យោងតាមសារព័ត៌មានបរទេសមួយបានឱ្យដឹងថា លោក Husin កើតនៅក្នុងរដ្ឋ Johor តែលោកមកទីក្រុង Taiping នេះដើម្បីមើលថែរក្សាម្តាយដែលកំពុងតែឈឺរបស់លោក។ លោកពិតជាស្រលាញ់ទីក្រុង Taiping ខ្លាំងណាស់ បើទោះបីជាលោកគ្មានការងារច្បាស់លាស់ក្តី ក៏លោកសុខចិត្តចំណាយពេលវេលារបស់លោកដើម្បីសម្អាតទីក្រុងនេះឱ្យមានភាពស្រស់ស្អាតផងដែរ។
អ្នករាល់គ្នាប្រាកដជាងឿយឆ្ងល់ហើយថា មូលហេតុអ្វីបានជាគាត់ធ្វើបែបនេះ?
លោក Husin បាននិយាយថា៖
«ខ្ញុំស្រលាញ់ទីក្រុងមួយនេះ ចង់ឃើញទីក្រុងមួយនេះមានសភាពស្រស់ស្អាត ហើយខ្ញុំគ្រាន់តែធ្វើអ្វីដែលខ្ញុំអាចធ្វើបានតែប៉ុណ្ណោះ។»
ជាធម្មតាលោក Husin តែងតែសម្អាតផ្លូវនេះរាល់ព្រឹក ហើយប្រសិនបើគាត់រវល់នោះ គាត់នឹងមកសម្អាតពេលយប់វិញ។
ម្យ៉ាងវិញទៀត ដើម្បីចិញ្ចឹមក្រពះ លោក Husin ក៏មានលក់ស្លឹកថ្នាំបុរាណ និងដូងមួយចំនួនផងដែរ។
លោក Husin ជាមនុស្សមិនចង់បានមុខមាត់អីទេ បើទោះបីជាលោកបានធ្វើអំពើល្អជួយសង្គមក្តី ក៏លោកមិនចង់ឱ្យគេថតរូបរបស់លោកនោះទេ ប៉ុន្តែត្រូវបានក្រុមសារព័ត៌មានម៉ាឡេស៊ីធ្វើការបញ្ចុះបញ្ចូលលោក ទើបលោកព្រមថតរូប ហើយបានចែករំលែករឿងនេះដើម្បីបំផុស លើកទឹកចិត្តដល់អ្នកដទៃ។
លោក Husin បានបន្តនិយាយថា៖
«ការចូលរួមចំណែកធ្វើកិច្ចការសង្គមរបស់ខ្ញុំគឺតូចណាស់ ប៉ុន្តែខ្ញុំមានអារម្មណ៍រីករាយ នៅពេលខ្ញុំបានធ្វើរឿងទាំងអស់នេះ។»
គួរឱ្យដឹងផងដែរថា ជាទូទៅនៅលើផ្លូវ Taiping សំបូរមនុស្សបោះចោលសំរាមគ្មានសណ្តាប់ធ្នាប់ណាស់ ហើយតាំងពីលោកសម្អាតផ្លូវនេះរាល់ថ្ងៃ កន្លែងនេះប្រែក្លាយទៅជាស្រស់ស្អាតឡើងវិញ។
យ៉ាងណាមិញ រឿងមួយនេះបានល្បីពេញបណ្តាញសង្គមម៉ាឡេស៊ី ហើយអ្នកប្រើប្រាស់បណ្តាញសង្គមជាច្រើននាក់ សុទ្ធសឹងតែកោតសរសើរនូវទឹកចិត្តដ៏ល្អរបស់លោក Husin Kasim គ្រប់ៗគ្នា៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]