ប្រកួតមិត្តភាពសោះ! Loftus-Cheek ត្រូវរបួសធ្ងន់មិនបានលេង UEL Final និងអាចអវត្តមានមួយឆ្នាំពេញ!

អង់គ្លេស៖ កីឡាករ Ruben Loftus-Cheek បានជួបជាមួយនឹងគ្រូពេទ្យជំនាញ ដើម្បីពិនិត្យទៅលើស្ថានភាពរបួសដាច់សរសៃពួររបស់គេ និងត្រៀមធ្វើការវះកាត់ឆាប់ៗនេះ។ នេះបើតាមការឱ្យដឹងពីក្លិប Chelsea។ ដោយឡែក បើយោងតាមប្រភពពី Daily Mail បានឱ្យដឹងថា Loftus-Cheek ត្រូវប្រឈមនឹងការអវត្តមានរហូតដល់ ១២ខែបន្ទាប់ពីការវះកាត់ ក្រោយពេលដែលរូបគេប៉ះទង្គិច នឹងទទួលរងរបួសក្នុងការប្រកួតមិត្តភាពរវាង Chelsea ទល់នឹងក្រុម New England Revolution។

យ៉ាងណាមិញ ក្រោយពីរងរបួសធ្ងន់ធ្ងរបែបនេះ Loftus-Cheek នឹងត្រូវអវត្តមានពីការប្រកួតវគ្គផ្តាច់ព្រ័ត្រ UEFA Europa League ទល់នឹង Arsenal នាថ្ងៃទី ២៩ ខែឧសភាខាងមុខ ក៏ដូចជាមិនបានចូលរួមជាមួយក្រុមជម្រើសជាតិអង់គ្លេសសម្រាប់យុទ្ធនាការ UEFA Nation League នាខែក្រោយនេះផងដែរ។ លើសពីនេះទៅទៀត ប្រសិនបើស្ថានភាពរបួសពិតជាធ្ងន់ធ្ងរខ្លាំងមែននោះ Loftus-Cheek នឹងត្រូវអវត្តមានពីលើវាលស្មៅពេញមួយរដូវកាលក្រោយតែម្តង៕