រាជធានីភ្នំពេញ ៖ បុរសជាអ្នករើសអេតចាយម្នាក់ត្រូវបានកម្លាំងមានសមត្ថកិច្ចចាប់ឃាត់់ខ្លួន យកទៅធ្វើការ សាកសួរនៅនគរបាលប៉ុស្តិ៍ចតុមុខ ក្រោយពីមានបុរសជនជាតិវៀតណាមម្នាក់បានអះអាងថា បានបាត់កាបូបលុយ ហើយមានការសង្ស័យទៅលើរូបគេដែលនៅអង្គុយផឹកស្រាជាមួយនឹងបុរសម្នាក់ទៀតនៅក្បែរនោះ។
គ្រាន់តែឃើញ បែបនោះ បុរសជាជនសង្ស័យក៏បានលោតចូលទៅក្នុងទឹកទន្លេក្នុងបំណងរត់គេចខ្លួន ដល់ពាក់កណ្តាលទន្លេ ទៅហើយនោះ កម្លាំងមានសមត្ថកិច្ចក៏បានចេញអូប័រមួយគ្រឿងជិះដេញតាមចាប់បានយកមកវិញភ្លាមៗផងដែរ។
ហេតុការណ៍នេះដែរបានបង្កការភ្ញាក់ផ្អើលកាលពីវេលាម៉ោង៣ និង៤៥នាទីរសៀល ថ្ងៃទី១៦ ខែឧសភា ឆ្នាំ២០១៩ នៅចំណុចមាត់ច្រាំងទន្លេខាងក្រោយសណ្ឋាគារ ហ៊ីម៉ាវ៉ារី ក្នុងសង្កាត់ចតមុខ ខណ្ឌដូនពេញ។
តាមប្រភពព័ត៌មាន ពីនគរបាលបានប្រាប់ឱ្យដឹងថា បុរសជាជនសង្ស័យដែលបានចាប់ឃាត់ខ្លួនមានឈ្មោះ ផាន់ តុលា អាយុ២៩ឆ្នាំ មុខរបររើសអេតចាយ និងមានទីលំនៅមិនពិតប្រាកដ។ ចំណែកឯបុរសរងគ្រោះដែលបានអះអាថាបានបាត់ កាបូបលុយរបស់ខ្លួននោះមានឈ្មោះ ឌី សំណាង ជាជនជាតិវៀតណាម អាយុ៣១ឆ្នាំ មុខរបរជាងដែក មានទីលំនៅម្តុំគីឡូលេខ៧ ខណ្ឌឫស្សីកែវ។
មុនពេលកើតហេតុ ខណៈដែលបុរសជាជនរងគ្រោះ កំពុងតែធ្វើការកាត់ដែកទីបនៅចំណុចខាងលើ ហើយមេឃបម្រុងនឹងភ្លៀងខ្លាចទទឹកនោះ រូបគេក៏បានយកកាបូបលុយពណ៌ខ្មៅរបស់គេមួយ ដែលមានលុយចំនួនជាង១០ម៉ឺនរៀល ទូរស័ព្ទដៃម៉ាក វីវ៉ូ ពណ៌ស មួយគ្រឿង រួមទាំងរបស់របរមួយចំនួនទៀតនៅខាងក្នុងយកទៅដាក់ក្នុងម្លប់លើមាត់ច្រាំងខាងលើ។
តាមប្រភពដដែលបានប្រាប់បន្តទៀតថា ក្រោយពីបុរសជនជាតិវៀតណាមម្នាក់ខាងលើបានរៀបចំទុកកាបូបលុយ របស់ខ្លួនក្នុងម្លប់ត្រឹមត្រូវរួចហើយរូបគេក៏បានចុះទៅធ្វើការបន្តទៀត លុះបន្តិចក្រោយមកទើបរូបគេក៏បានឡើង ទៅលើរកមើលកាបូបលុយរបស់ខ្លួនមិនឃើញក៏បានដើរ ទៅសួរបុរសជាជនសង្ស័យម្នាក់ខាងលើដែលកំពុងតែ អង្គុយផឹកស្រា ជាមួយបុរសម្នាក់ទៀតនៅក្បែរនោះតែត្រូវគេឆ្លើយប្រាប់ថាមិនដឹង។
ដោយមិនអស់ចិត្តបុរសរងគ្រោះ ក៏បានទៅប្រាប់កម្លាំងមានសមត្ថកិច្ចដែលនៅក្បែរនោះក្នុងបំណងជួយសួរនាំ គ្រាន់តែបានឃើញមានកម្លាំង មានសមត្ថកិច្ចចុះទៅដល់នោះ រូបគេក៏បានរត់លោតចូលទៅក្នុងទឹកទន្លេហែលទៅដល់ពាក់កណ្តាលទន្លេទើប កម្លាំងមានសមត្ថកិច្ចចេញអូប័រមួយគ្រឿងទៅតាមចាប់បានយកមកវិញ និងប្រគល់ឱ្យកម្លាំងនគរបាលប៉ុស្តិ៍ចតុមុខ យកទៅធ្វើការសាកសួរ។
ក្រោយពីកម្លាំងមានសមត្ថកិច្ចចាប់ឃាត់ខ្លួនបុរសជាជនសង្ស័យយក មកធ្វើការសាកសួរនៅនគរបាលប៉ុស្តិ៍ចតុមុខនោះ រូបគេបានបដិសេធថា ខ្លួនមិនបានលួចយកកាបូបលុយ របស់ជនរងគ្រោះតាមការចោទប្រកាន់នោះឡើយម្យ៉ាងទៀតរូបគេក៏ជាមនុស្សបែកថ្នាំ និង ទើបតែចេញពីមណ្ឌលកែប្រែព្រៃស្ពឺបានប៉ុន្មានថ្ងៃប៉ុណ្ណោះ។
ចំណែកឯបុរសជនជាតិវៀតណាមរងគ្រោះ វិញក៏មិនបានដឹងថាជនសង្ស័យណាម្នាក់បានលួចយកកាបូបលុយរបស់ខ្លួនឲ្យច្បាស់លាស់។ ក្រោយពីទទួលបានចម្លើយពីបុរសជនជាតិវៀតណាមរងគ្រោះម្នាក់ខាងលើមិនច្បាស់លាស់រួចហើយក៏តម្រូវអោយរូបគេបានត្រឹមតែដាក់ពាក្យបណ្តឹងតែប៉ុណ្ណោះមិនអាចធ្វើការចោទប្រកានន់ទៅលើរូបគេបានឡើយ ម្យ៉ាងទៀតក៏មិនមានភស្តុតាងនៅជាប់់នឹងខ្លួនគេដែរ។
ចំណែកឯបុរសជាជន សង្ស័យខាងលើកម្លាំងមានសម្ថកិច្ច ក៏បានសម្រេចបញ្ជូនខ្លួនទៅកាន់មន្ទីរសង្គមកិច្ចបន្តតែប៉ុណ្ណោះ ព្រោះរូបគេជាមនុស្សប្រើប្រាស់ថ្នាំញៀន និង កំពុងតែមានអាការៈបែកថ្នាំផងដែរ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]