រាជធានីភ្នំពេញ ៖ បុរសមិនស្គាល់អត្តសញ្ញាណម្នាក់បានបើករថយន្តមួយគ្រឿងម៉ាកឡិចស៊ីស៥៧០ ក្នុងស្ថានភាពស្រវឹង ហើយបើកលឿនឆ្លងផ្លូវបំបែកជាបួន ក៏ជ្រុលបុកម៉ូតូម៉ាកស្មាស់មួយគ្រឿងជិះគ្នា២នាក់ បណ្តាលអោយស្ត្រីម្នាក់ស្លាប់នៅក្រោមរថយន្ត និងស្ត្រីម្នាក់ទៀតរងរបួសធ្ងន់ ។
ហេតុការណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី១៦ ខែឧសភា ឆ្នាំ២០១៩ តាមបណ្តោយផ្លូវ១០៨កែងផ្លូវ១៩ នៅចំណុចខាងកើតស្ពាននាគប្រមាណជា១០០ម៉ែត្រ ស្ថិតនៅក្នុងសង្កាត់វត្តភ្នំ ខណ្ឌដូនពេញ ។
ជនរងគ្រោះដែលស្លាប់ឈ្មោះគ្រីស ម៉ាស់ ភេទស្រី អាយុ២៧ឆ្នាំ ជាខ្មែរអ៊ិស្លាម ស្នាក់នៅម្តុំគីរីរម្យ មានស្រុកកំណើតនៅខេត្តត្បូងឃ្មុំ និងស្ត្រីម្នាក់ទៀតដែលរងរបួសធ្ងន់មិនស្គាល់អត្តសញ្ញាណនោះទេ ។ ស្ត្រីរងគ្រោះទាំង២នាក់ជិះម៉ូតូមួយគ្រឿងម៉ាកស្មាស់ ពណ៌ខ្មៅ ពាក់ស្លាកលេខភ្នំពេញ១AW-១៨៦៧ ។ ចំណែកភាគីខាងរថយន្តមួយគ្រឿងឡិចស៊ីស ៥៧០ មិនចាំស្លាកលេខ បើកបរដោយបុរសម្នាក់មិនស្គាល់អត្តសញ្ញាណ បានបើកគេចបាត់ស្រមោល ។
បើតាមប្រភពពីអ្នកស្គាល់ជនរងគ្រោះបានប្រាប់ឱ្យដឹងថា ស្ត្រីរងគ្រោះទាំង២នាក់ធ្វើការនៅក្នុងហាងណេត (Net) មួយកន្លែងនៅម្តុំផ្លូវ១១០ ហើយនៅវេលាម៉ោងកើតហេតុខាងលើ ស្ត្រីរងគ្រោះទាំង២នាក់បានខ្ចីម៉ូតូរបស់គេមួយគ្រឿងជិះទៅទិញម្ជូរហូប ។
តាមប្រភពព័ត៌មានពីសាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញស្ត្រី២នាក់ជាខ្មែរអ៊ិស្លាមបានជិះម៉ូតូមួយគ្រឿងម៉ាកស្មាស បើកបរតាមបណ្តោយផ្លូវ១៩ ក្នុងទិសដៅពីត្បូងទៅជើង លុះដល់ចំណុចកើតហេតុក៏ស្រាប់តែមានបុរសមិនស្គាល់អត្តសញ្ញាណម្នាក់បើកបររថយន្តមួយគ្រឿងម៉ាកឡិចស៊ីស៥៧០ ពណ៌ស មិនចាំស្លាកលេខ ធ្វើដំណើរតាមបណ្តោយផ្លូវ១០៨ក្នុងទិសដៅពីលិចទៅកើត បើកបរក្នុងល្បឿនយ៉ាងលឿនហើយស្រវឹងផងនោះបានបើកមកដល់ផ្លូវបែកជា៤មិនប្រុងប្រយ័ត្ន និងអត់បន្ថយល្បឿនទៀតនោះ ក៏ជ្រុលទៅបុកម៉ូតូជនរងគ្រោះពេញទំហឹង បណ្តាលឱ្យខ្ទាតទាំងម៉ូតូនិងមនុស្សចូលក្រោមកង់រថយន្តមួយគ្រឿងម៉ាកឡិចស៊ីស៤៧០ ពណ៌ស ដែលគេចតចោលនៅមុខផ្ទះ ធ្វើឱ្យស្ត្រីម្នាក់ដែលធ្លាក់ចូលក្រោមរថយន្តបានស្លាប់ និងស្ត្រីម្នាក់ទៀតបានរងរបួសធ្ងន់ ។
ប្រភពដដែលបានបន្តថា ភ្លាមៗនោះដែរ រថយន្តបង្កមិនបានឈប់នៅដោះស្រាយគ្នានោះទេ ក៏បន្ថែមល្បឿនបើកគេចបាត់ស្រមោល ។ ចំណែកស្ត្រីម្នាក់ដែលរងរបួសធ្ងន់ត្រូវបានរថយន្តសង្គ្រោះរបស់គ្លីនិកឯកជនមកដឹកយកទៅសង្គ្រោះភ្លាមៗផងដែរ ។
ក្រោយពេលកើតហេតុ សពជនរងគ្រោះត្រូវបានសាច់ញាតិដឹកយកទៅតម្កល់ដើម្បីធ្វើបុណ្យតាមប្រពៃណីនៅវត្តទឹកថ្លា ចំណែកម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌដូនពេញ រីឯរថយន្តមួយគ្រឿងម៉ាកឡិចស៊ីស៤៧០ ដែលចតស្ងៀមនោះ សមត្ថកិច្ចមិនបានយកទៅនោះទេ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]